౪-౫. సత్తావాససుత్తాదివణ్ణనా

౨౪-౨౫. చతుత్థే సత్తా ఆవసన్తి ఏతేసూతి సత్తావాసా, నానత్తసఞ్ఞిఆదిభేదా సత్తనికాయా. యస్మా తే తే సత్తనివాసా తప్పరియాపన్నానం సత్తానం తాయ ఏవ తప్పరియాపన్నతాయ ఆధారో వియ వత్తబ్బతం అరహన్తి. సముదాయాచారో హి అవయవస్స యథా ‘‘రుక్ఖే సాఖా’’తి, తస్మా ‘‘సత్తానం ఆవాసా, వసనట్ఠానానీతి అత్థో’’తి వుత్తం. సుద్ధావాసాపి సత్తావాసోవ ‘‘న సో, భిక్ఖవే, సత్తావాసో సులభరూపో, యో మయా అనావుత్థపుబ్బో ఇమినా దీఘేన అద్ధునా అఞ్ఞత్ర సుద్ధావాసేహి దేవేహీ’’తి (దీ. ని. ౨.౯౧) వచనతో. యది ఏవం తే కస్మా ఇధ న గహితాతి తత్థ కారణమాహ ‘‘అసబ్బకాలికత్తా’’తిఆది. వేహప్ఫలా పన చతుత్థేయేవ సత్తావాసే భజన్తీతి దట్ఠబ్బం. పఞ్చమం ఉత్తానమేవ.

సత్తావాససుత్తాదివణ్ణనా నిట్ఠితా.