౮. అరహత్తవగ్గో

౧-౩. దుక్ఖసుత్తాదివణ్ణనా

౭౫-౭౭. అట్ఠమస్స పఠమాదీసు నత్థి వత్తబ్బం. తతియే తివిధం కుహనవత్థున్తి పచ్చయప్పటిసేవనసామన్తజప్పనఇరియాపథప్పవత్తనసఙ్ఖాతం తివిధం కుహనవత్థుం. ఉక్ఖిపిత్వాతి ‘‘మహాకుటుమ్బికో మహానావికో మహాదానపతీ’’తిఆదినా పగ్గణ్హిత్వా లపనం. అవక్ఖిపిత్వాతి ‘‘కిం ఇమస్స జీవితం, బీజభోజనో నామాయ’’న్తి హీళేత్వా లపనం.

దుక్ఖసుత్తాదివణ్ణనా నిట్ఠితా.

౪. సుఖసోమనస్ససుత్తవణ్ణనా

౭౮. చతుత్థే యథావుత్తధమ్మాదీసు తస్స కిలేసనిమిత్తం దుక్ఖం అనవస్సనన్తి ‘‘సుఖసోమనస్సబహులో విహరతీ’’తి వుత్తం. కాయికసుఖఞ్చేవ చేతసికసోమనస్సఞ్చ బహులం అస్సాతి సుఖసోమనస్సబహులో. యవతి తేన ఫలం మిస్సితం వియ హోతీతి యోని, ఏకన్తికం కారణం. అస్సాతి యథావుత్తస్స భిక్ఖునో. పరిపుణ్ణన్తి అవికలం అనవసేసం.

సుఖసోమనస్ససుత్తవణ్ణనా నిట్ఠితా.

౫. అధిగమసుత్తవణ్ణనా

౭౯. పఞ్చమే ఆగచ్ఛన్తి ఏతేన కుసలా వా అకుసలా వాతి ఆగమనం, కుసలాకుసలానం ఉప్పత్తికారణం. తత్థ కుసలోతి ఆగమనకుసలో. ఏవం ధమ్మే మనసికరోతో కుసలా వా అకుసలా వా ధమ్మా అభివడ్ఢన్తీతి ఏవం జానన్తో. అపగచ్ఛన్తి కుసలా వా అకుసలా వా ఏతేనాతి అపగమనం. తేసం ఏవ అనుప్పత్తికారణం, తత్థ కుసలోతి అపగమనకుసలో. ఏవం ధమ్మే మనసికరోతో కుసలా వా అకుసలా వా ధమ్మా నాభివడ్ఢన్తీతి ఏవం జానన్తో. ఉపాయకుసలోతి ఠానుప్పత్తికపఞ్ఞాసమన్నాగతో. ఇదఞ్చ అచ్చాయికకిచ్చే వా భయే వా ఉప్పన్నే తస్స తికిచ్ఛనత్థం ఠానుప్పత్తియా కారణజాననవసేన వేదితబ్బం.

అధిగమసుత్తవణ్ణనా నిట్ఠితా.

౬-౭. మహన్తత్తసుత్తాదివణ్ణనా

౮౦-౮౧. ఛట్ఠే సమ్పత్తేతి కిలేసే సమ్పత్తే. సత్తమం ఉత్తానమేవ.

మహన్తత్తసుత్తాదివణ్ణనా నిట్ఠితా.

౮-౧౦. దుతియనిరయసుత్తాదివణ్ణనా

౮౨-౮౪. అట్ఠమే కాయపాగబ్భియాదీహీతి ఆది-సద్దేన వచీపాగబ్భియం మనోపాగబ్భియఞ్చ సఙ్గణ్హాతి. నవమాదీని ఉత్తానత్థానేవ.

దుతియనిరయసుత్తాదివణ్ణనా నిట్ఠితా.

అరహత్తవగ్గవణ్ణనా నిట్ఠితా.