౧. సీతిభావసుత్తవణ్ణనా

౮౫. నవమస్స పఠమే సీతిభావన్తి నిబ్బానం, కిలేసవూపసమం వా. నిగ్గణ్హాతీతి అచ్చారద్ధవీరియతాదీహి ఉద్ధతం చిత్తం ఉద్ధచ్చపక్ఖతో రక్ఖణవసేన నిగ్గణ్హాతి. పగ్గణ్హాతీతి అతిసిథిలవీరియతాదీహి లీనం చిత్తం కోసజ్జపాతతో రక్ఖణవసేన పగ్గణ్హాతి. సమ్పహంసేతీతి సమప్పవత్తచిత్తం తథాపవత్తియం పఞ్ఞాయ తోసేతి ఉత్తేజేతి వా. యదా వా పఞ్ఞాపయోగమన్దతాయ ఉపసమసుఖానధిగమేన వా నిరస్సాదం చిత్తం భావనాయ న పక్ఖన్దతి, తదా జాతిఆదీని సంవేగవత్థూని పచ్చవేక్ఖిత్వా సమ్పహంసేతి సముత్తేజేతి. అజ్ఝుపేక్ఖతీతి యదా పన చిత్తం అలీనం అనుద్ధతం అనిరస్సాదం ఆరమ్మణే సమప్పవత్తం సమ్మదేవ భావనావీతిం ఓతిణ్ణం హోతి, తదా పగ్గహనిగ్గహసమ్పహంసనేసు కిఞ్చి బ్యాపారం అకత్వా సమప్పవత్తేసు అస్సేసు సారథీ వియ అజ్ఝుపేక్ఖతి, ఉపేక్ఖకోవ హోతి. పణీతాధిముత్తికోతి పణీతే ఉత్తమే మగ్గఫలే అధిముత్తో నిన్నపోణపబ్భారో.

సీతిభావసుత్తవణ్ణనా నిట్ఠితా.