(౨౨) ౨. అక్కోసకవగ్గో

౧-౨. అక్కోసకసుత్తాదివణ్ణనా

౨౧౧-౨. దుతియస్స పఠమే దసహి అక్కోసవత్థూహి అక్కోసకోతి ‘‘బాలోసి, మూళ్హోసి, ఓట్ఠోసి, గోణోసి, గద్రభోసీ’’తిఆదినా దసహి అక్కోసవత్థూహి అక్కోసకో. ‘‘హోతు, ముణ్డకసమణ, అదణ్డో అహన్తి కరోసి, ఇదాని తే రాజకులం గన్త్వా దణ్డం ఆరోపేస్సామీ’’తిఆదీని వదన్తో పరిభాసకో నామాతి ఆహ ‘‘భయదస్సనేన పరిభాసకో’’తి. లోకుత్తరధమ్మా అపాయమగ్గస్స పరిపన్థభావతో పరిపన్థో నామాతి ఆహ ‘‘లోకుత్తరపరిపన్థస్స ఛిన్నత్తా’’తి, లోకుత్తరసఙ్ఖాతస్స అపాయమగ్గపరిపన్థస్స ఛిన్నత్తాతి అత్థో. దుతియే నత్థి వత్తబ్బం.

అక్కోసకసుత్తాదివణ్ణనా నిట్ఠితా.

౩-౧౦. సీలసుత్తాదివణ్ణనా

౨౧౩-౨౨౦. తతియే (దీ. ని. టీ. ౨.౧౪౯) దుస్సీలోతి ఏత్థ దు-సద్దో అభావత్థో ‘‘దుప్పఞ్ఞో’’తిఆదీసు (మ. ని. ౧.౪౪౯) వియ, న గరహణత్థోతి ఆహ ‘‘అసీలో నిస్సీలో’’తి. భిన్నసంవరోతి ఏత్థ సమాదిన్నసీలో కేనచి కారణేన సీలభేదం పత్తో, సో తావ భిన్నసంవరో హోతు. యో పన సబ్బేన సబ్బం అసమాదిన్నసీలో ఆచారహీనో, సో కథం భిన్నసంవరో నామ హోతీతి? సోపి సాధుసమాచారస్స పరిహరణీయస్స భేదితత్తా భిన్నసంవరో ఏవ నామ. వినట్ఠసంవరో సంవరరహితోతి హి వుత్తం హోతి. తం తం సిప్పట్ఠానం. మాఘాతకాలేతి ‘‘మా ఘాతేథ పాణీన’’న్తి ఏవం మాఘాతఘోసనం ఘోసితదివసే. అబ్భుగ్గచ్ఛతి పాపకో కిత్తిసద్దో. అజ్ఝాసయేన మఙ్కు హోతియేవ విప్పటిసారిభావతో.

తస్సాతి దుస్సీలస్స. సమాదాయ వత్తితట్ఠానన్తి ఉట్ఠాయ సముట్ఠాయ కతకారణం. ఆపాథం ఆగచ్ఛతీతి తం మనసో ఉపట్ఠాతి. ఉమ్మీలేత్వా ఇధలోకన్తి ఉమ్మీలనకాలే అత్తనో పుత్తదారాదివసేన ఇధలోకం పస్సతి. నిమీలేత్వా పరలోకన్తి నిమీలనకాలే గతినిమిత్తుపట్ఠానవసేన పరలోకం పస్సతి. తేనాహ ‘‘చత్తారో అపాయా’’తిఆది. పఞ్చమపదన్తి ‘‘కాయస్స భేదా’’తిఆదినా వుత్తో పఞ్చమో ఆదీనవకోట్ఠాసో. వుత్తవిపరియాయేనాతి వుత్తత్థాయ ఆదీనవకథాయ విపరియాయేన ‘‘అప్పమత్తో తం తం కసివణిజ్జాదిం యథాకాలం సమ్పాదేతుం సక్కోతీ’’తిఆదినా. పాసంసం సీలమస్స అత్థీతి సీలవా. సీలసమ్పన్నోతి సీలేన సమన్నాగతో సమ్పన్నసీలోతి ఏవమాదికం పన అత్థవచనం సుకరన్తి అనామట్ఠం. చతుత్థాదీని ఉత్తానత్థానేవ.

సీలసుత్తాదివణ్ణనా నిట్ఠితా.

అక్కోసకవగ్గవణ్ణనా నిట్ఠితా.