(౧౨) ౨. అన్ధకవిన్దవగ్గో

౧-౪. కులూపకసుత్తాదివణ్ణనా

౧౧౧-౧౧౪. దుతియస్స పఠమే అసన్థవేసు కులేసు విస్సాసో ఏతస్సాతి అసన్థవవిస్సాసీ. అనిస్సరో హుత్వా వికప్పేతి సంవిదహతి సీలేనాతి అనిస్సరవికప్పీ. విస్సట్ఠాని విసుం ఖిత్తాని భేదేన అవత్థితాని కులాని ఘటనత్థాయ ఉపసేవతి సీలేనాతి విస్సట్ఠుపసేవీ. దుతియాదీని ఉత్తానత్థానేవ.

కులూపకసుత్తాదివణ్ణనా నిట్ఠితా.

౫-౧౩. మచ్ఛరినీసుత్తాదివణ్ణనా

౧౧౫-౧౨౩. పఞ్చమే ఆవాసమచ్ఛరియాదీని పఞ్చ ఇధ భిక్ఖునియా వసేన ఆగతాని, భిక్ఖుస్స వసేనపి తాని వేదితబ్బాని. ఆవాసమచ్ఛరియేన హి సమన్నాగతో భిక్ఖు ఆగన్తుకం దిస్వా ‘‘ఏత్థ చేతియస్స వా సఙ్ఘస్స వా పరిక్ఖారో ఠపితో’’తిఆదీని వత్వా సఙ్ఘికఆవాసం న దేతి. కులమచ్ఛరియేన సమన్నాగతో భిక్ఖు తేహి తేహి కారణేహి ఆదీనవం దస్సేత్వా అత్తనో ఉపట్ఠాకే కులే అఞ్ఞేసం పవేసమ్పి నివారేతి. లాభమచ్ఛరియేన సమన్నాగతో సఙ్ఘికమ్పి లాభం మచ్ఛరాయన్తో యథా అఞ్ఞే న లభన్తి, ఏవం కరోతి అత్తనా విసమనిస్సితతాయ బలవనిస్సితతాయ చ. వణ్ణమచ్ఛరియేన సమన్నాగతో అత్తనో వణ్ణం వణ్ణేతి, పరేసం వణ్ణే ‘‘కిం వణ్ణో ఏసో’’తి తం తం దోసం వదతి. వణ్ణోతి చేత్థ సరీరవణ్ణోపి, గుణవణ్ణోపి వేదితబ్బో.

ధమ్మమచ్ఛరియేన సమన్నాగతో – ‘‘ఇమం ధమ్మం పరియాపుణిత్వా ఏసో మం అభిభవిస్సతీ’’తి అఞ్ఞస్స న దేతి. యో పన – ‘‘అయం ఇమం ధమ్మం ఉగ్గహేత్వా అఞ్ఞథా అత్థం విపరివత్తేత్వా నాసేస్సతీ’’తి ధమ్మనుగ్గహేన వా – ‘‘అయం ఇమం ధమ్మం ఉగ్గహేత్వా ఉద్ధతో ఉన్నళో అవూపసన్తచిత్తో అపుఞ్ఞం పసవిస్సతీ’’తి పుగ్గలానుగ్గహేన వా న దేతి, న తం మచ్ఛరియం. ధమ్మోతి చేత్థ పరియత్తిధమ్మో అధిప్పేతో. పటివేధధమ్మో హి అరియానంయేవ హోతి, తే చ నం న మచ్ఛరాయన్తి మచ్ఛరియస్స సబ్బసో పహీనత్తాతి తస్స అసమ్భవో ఏవ. తత్థ ఆవాసమచ్ఛరియేన లోహగేహే పచ్చతి, యక్ఖో వా పేతో వా హుత్వా తస్సేవ ఆవాసస్స సఙ్కారం సీసేన ఉక్ఖిపిత్వా చరతి. కులమచ్ఛరియేన అప్పభోగో హోతి. లాభమచ్ఛరియేన గూథనిరయే నిబ్బత్తతి, సఙ్ఘస్స వా గణస్స వా లాభం మచ్ఛరాయిత్వా పుగ్గలికపరిభోగేన వా పరిభుఞ్జిత్వా యక్ఖో వా పేతో వా మహాఅజగరో వా హుత్వా నిబ్బత్తతి. వణ్ణమచ్ఛరియేన భవేసు నిబ్బత్తస్స వణ్ణో నామ న హోతి. ధమ్మమచ్ఛరియేన కుక్కుళనిరయే నిబ్బత్తతి. ఛట్ఠాదీని ఉత్తానత్థానేవ.

మచ్ఛరినీసుత్తాదివణ్ణనా నిట్ఠితా.

అన్ధకవిన్దవగ్గవణ్ణనా నిట్ఠితా.