(౨౧) ౧. సప్పురిసవగ్గో

౧-౧౦. సిక్ఖాపదసుత్తాదివణ్ణనా

౨౦౧-౨౧౦. పఞ్చమస్స పఠమే అసప్పురిసోతి లామకపురిసో. పాణం అతిపాతేతీతి పాణాతిపాతీ. అదిన్నం ఆదియతీతి అదిన్నాదాయీ. కామేసు మిచ్ఛా చరతీతి కామేసుమిచ్ఛాచారీ. ముసా వదతీతి ముసావాదీ. సురామేరయమజ్జపమాదే తిట్ఠతీతి సురామేరయమజ్జపమాదట్ఠాయీ. పాణాతిపాతే సమాదపేతీతి యథా పాణం అతిపాతేతి, తథా నం తత్థ గహణం గణ్హాపేతి. సేసేసుపి ఏసేవ నయో. అయం వుచ్చతీతి అయం ఏవరూపో పుగ్గలో యస్మా సయంకతేన చ దుస్సీల్యేన సమన్నాగతో, యఞ్చ సమాదపితేన కతం, తతో ఉపడ్ఢస్స దాయాదో, తస్మా ‘‘అసప్పురిసేన అసప్పురిసతరో’’తి వుచ్చతి. సప్పురిసోతి ఉత్తమపురిసో. సప్పురిసేన సప్పురిసతరోతి అత్తనా చ కతేన సుసీల్యేన సమన్నాగతత్తా యఞ్చ సమాదపితో కరోతి, తతో ఉపడ్ఢస్స దాయాదత్తా ఉత్తమపురిసేన ఉత్తమపురిసతరో. ఏత్థ చ పరేన కతం దుస్సీల్యం సుసీల్యం వా ఆణత్తియా అత్తనా చ వచిప్పయోగేన కతన్తి ఆణాపనవసేన పసుతపాపస్స పుఞ్ఞస్స వా దాయాదో ‘‘తతో ఉపడ్ఢస్స దాయాదో’’తి వుత్తో. దుతియాదీని ఉత్తానత్థానేవ.

సిక్ఖాపదసుత్తాదివణ్ణనా నిట్ఠితా.

సప్పురిసవగ్గవణ్ణనా నిట్ఠితా.

౨౧౧-౨౨౦. దుతియో పరిసావగ్గో ఉత్తానత్థోయేవ.