౨. దుతియో పరిచ్ఛేదో

ఖన్ధత్తయసఙ్ఖేపో

౭౩. వేదనానుభవో తేధా, సుఖదుక్ఖముపేక్ఖయా;

ఇట్ఠానిట్ఠానుభవనమజ్ఝానుభవలక్ఖణా.

౭౪. కాయికం మానసం దుక్ఖం, సుఖోపేక్ఖా చ వేదనా;

ఏకం మానసమేవేతి, పఞ్చధిన్ద్రియభేదతో.

౭౫. యథా తథా వా సఞ్ఞాణం, సఞ్ఞా సతినిబన్ధనం;

ఛధా ఛద్వారసమ్భూతఫస్సజానం వసేన సా.

౭౬. సఙ్ఖారా చేతనా ఫస్సో,

మనక్కారాయు సణ్ఠితి;

తక్కో చారో చ వాయామో,

పీతి ఛన్దోధిమోక్ఖకో.

౭౭. సద్ధా సతి హిరోత్తప్పం, చాగో మేత్తా మతి పున;

మజ్ఝత్తతా చ పస్సద్ధీ, కాయచిత్తవసా దువే.

౭౮. లహుతా ముదుకమ్మఞ్ఞపాగుఞ్ఞముజుతా తథా;

దయా ముదా మిచ్ఛావాచా, కమ్మన్తాజీవసంవరో.

౭౯. లోభో దోసో చ మోహో చ, దిట్ఠి ఉద్ధచ్చమేవ చ;

అహిరీకం అనోత్తప్పం, విచికిచ్ఛితమేవ చ.

౮౦. మానో ఇస్సా చ మచ్ఛేరం, కుక్కుచ్చం థినమిద్ధకం;

ఇతి ఏతేవ పఞ్ఞాస, సఙ్ఖారక్ఖన్ధసఞ్ఞితా.

౮౧. బ్యాపారో చేతనా ఫస్సో, ఫుసనం సరణం తహిం;

మనక్కారో పాలనాయు, సమాధి అవిసారతా.

౮౨. ఆరోపనానుమజ్జట్ఠా, తక్కచారా పనీహనా;

వీరియం పీననా పీతి, ఛన్దో తు కత్తుకామతా.

౮౩. అధిమోక్ఖో నిచ్ఛయో సద్ధా,

పసాదో సరణం సతి;

హిరీ పాపజిగుచ్ఛా హి,

ఓత్తప్పం తస్స భీరుతా.

౮౪. అలగ్గో చ అచణ్డిక్కం, చాగో మేత్తా మతి పన;

యాథావబోధో మజ్ఝత్తం, సమవాహితలక్ఖణం.

౮౫. ఛ యుగాని కాయచిత్తదరగారవథద్ధతా-

అకమ్మఞ్ఞత్తగేలఞ్ఞకుటిలానం వినోదనా.

౮౬. తానుద్ధతాదిథినాదిదిట్ఠాదీనం యథాక్కమం;

సేసకాదిఅసద్ధాదిమాయాదీనం విపక్ఖినో.

౮౭. దుక్ఖాపనయనకామా, దయా మోదా పమోదనా;

వచీదుచ్చరితాదీనం, విరామో విరతిత్తయం.

౮౮. లోభో దోసో చ మోహో చ,

గేధచణ్డమనన్ధనా;

కమేన దిట్ఠి దుగ్గాహో,

ఉద్ధచ్చం భన్తతం మతం.

౮౯. అహిరీకమలజ్జత్తం, అనోత్తప్పమతాసతా;

సంసయో విచికిచ్ఛా హి, మానో ఉన్నతిలక్ఖణో.

౯౦. పరస్సకసమ్పత్తీనం,

ఉసూయా చ నిగూహనా;

ఇస్సామచ్ఛేరకా తాపో,

కతాకతస్స సోచనా.

౯౧. థినం చిత్తస్స సఙ్కోచో, అకమ్మఞ్ఞత్తతా పన;

మిద్ధమిచ్చేవమేతేసం, లక్ఖణఞ్చ నయే బుధో.

౯౨. వేదనాదిసమాధన్తా, సత్త సబ్బగసఞ్ఞితా;

తక్కాదిఅధిమోక్ఖన్తా, ఛ పకిణ్ణకనామకా.

౯౩. సద్ధాదయో విరమన్తా, అరణా పఞ్చవీసతి;

లోభాదిమిద్ధకన్తాని, సరణాని చతుద్దస.

౯౪. ఇస్సామచ్ఛేరకుక్కుచ్చదోసా కామే దయా ముదా;

కామే రూపే చ సేసా ఛ-చత్తాలీస తిధాతుజా.

౯౫. ఛన్దనిచ్ఛయమజ్ఝత్తమనక్కారా సఉద్ధవా;

దయాదీ పఞ్చ మానాదీ, ఛ యేవాపన సోళస.

౯౬. ఛన్దాదీ పఞ్చ నియతా, తత్థేకాదస నేతరా;

అహిరీకమనోత్తప్పం, లోకనాసనకం ద్వయం.

౯౭. ఏతే ద్వే మోహుద్ధచ్చాతి, చత్తారో పాపసబ్బగా;

లోకపాలదుకం వుత్తం, హిరిఓత్తప్పనామకం.

౯౮. ఆరమ్మణూపనిజ్ఝానా, ఝానఙ్గా తక్కచారకా;

పీతి ఏకగ్గతా చేతి, సత్త విత్తిత్తయేన వే.

౯౯. సద్ధా సతి మతేకగ్గ-ధితి లోకవినాసకా;

పాలకా నవ చేతాని, బలాని అవికమ్పతో.

౧౦౦. ఏత్థ సద్ధాదిపఞ్చాయు, కత్వాత్ర చతుధా మతిం;

వేదనాహి ద్విసత్తేతే, ఇన్ద్రియానాధిపచ్చతో.

౧౦౧. మనరూపిన్ద్రియేహేతే, సబ్బే ఇన్ద్రియనామకా;

బావీసతి భవన్తాయుద్వయం కత్వేకసఙ్గహం.

౧౦౨. దిట్ఠీహేకగ్గతాతక్కసతీవిరతియో పథా;

అట్ఠ నియ్యానతో ఆదిచతురో భిత్వాన ద్వాదస.

౧౦౩. ఫస్సో చ చేతనా చేవ,

ద్వేవేత్థాహారణత్తతో;

ఆహారా మనవోజాహి,

భవన్తి చతురోథవా.

౧౦౪. హేతు మూలట్ఠతో పాపే,

లోభాదిత్తయమీరితం;

కుసలాబ్యాకతే చాపి,

అలోభాదిత్తయం తథా.

౧౦౫. దిట్ఠిలోభదుసా కమ్మపథాపాయస్స మగ్గతో;

తబ్బిపక్ఖా సుగతియా, తయోతి ఛ పథీరితా.

౧౦౬. పస్సద్ధాదియుగాని ఛ, వగ్గత్తా యుగళాని తు;

ఉపకారా సతి ధీ చ, బహూపకారభావతో.

౧౦౭. ఓఘాహరణతో యోగా,

యోజనేనాభవగ్గతో;

సవనేనాసవా దిట్ఠి-

మోహేజేత్థ దుధా లుభో.

౧౦౮. దళ్హగ్గాహేన దిట్ఠేజా, ఉపాదానం తిధా తహిం;

దిట్ఠి దోసేన తే గన్థా, గన్థతో దిట్ఠిహ ద్విధా.

౧౦౯. పఞ్చావరణతో కామ-కఙ్ఖాదోసుద్ధవం తపో;

థినమిద్ధఞ్చ మోహేన, ఛ వా నీవరణానిథ.

౧౧౦. కత్వా తాపుద్ధవం ఏకం, థినమిద్ధఞ్చ వుచ్చతి;

కిచ్చస్సాహారతో చేవ, విపక్ఖస్స చ లేసతో.

౧౧౧. దిట్ఠేజుద్ధవదోసన్ధ-

కఙ్ఖాథినుణ్ణతీ దస;

లోకనాసయుగేనేతే,

కిలేసా చిత్తక్లేసతో.

౧౧౨. లోభదోసమూహమాన-దిట్ఠికఙ్ఖిస్సమచ్ఛరా;

సంయోజనాని దిట్ఠేజా, భిత్వా బన్ధనతో దుధా.

౧౧౩. తాని మోహుద్ధవంమానకఙ్ఖాదోసేజదిట్ఠియో;

దుధాదిట్ఠి తిధా లోభం, భిత్వా సుత్తే దసీరితా.

౧౧౪. దిట్ఠిలోభమూహమానదోసకఙ్ఖా తహిం దుధా;

కత్వా లోభమిమే సత్తానుసయా సముదీరితా.

౧౧౫. దిట్ఠి ఏవ పరామాసో, ఞేయ్యో ఏవం సమాసతో;

అత్థో సఙ్ఖారక్ఖన్ధస్స, వుత్తో వుత్తానుసారతో.

ఇతి సచ్చసఙ్ఖేపే ఖన్ధత్తయసఙ్ఖేపో నామ

దుతియో పరిచ్ఛేదో.