చతుత్థో పరిచ్ఛేదో

౪. వీథిపరికమ్మకథా

౧౨౬. పఠమావజ్జనం పఞ్చ-దసన్నం పరతో భవే;

దుతియావజ్జనం హోతి, ఏకవీసతితో పరం.

౧౨౭. ఏకమ్హా పఞ్చవిఞ్ఞాణం, పఞ్చమ్హా సమ్పటిచ్ఛనం;

సుఖసన్తీరణం హోతి, పఞ్చవీసతితో పరం.

౧౨౮. సత్తతింసతితో హోతి, ఉపేక్ఖాతీరణద్వయం;

వోట్ఠబ్బనసరూపానం, ద్విన్నం కామజవా పరం.

౧౨౯. మగ్గాభిఞ్ఞా పరం ద్విన్నం, తిణ్ణన్నం లోకియప్పనా;

ఫలా చతున్నం పఞ్చన్నం, ఉపరిట్ఠఫలద్వయం.

౧౩౦. భవన్తి చత్తాలీసమ్హా, సుఖపాకా ద్విహేతుకా;

తథేకచత్తాలీసమ్హా, ఉపేక్ఖాయ సమాయుతా.

౧౩౧. హోన్తి సత్తతితో కామే, సుఖపాకా తిహేతుకా;

ద్వాసత్తతిమ్హా జాయన్తి, ఉపేక్ఖాసహితా పన.

౧౩౨. ఏకూనసట్ఠితో రూప-పాకా పాకా అరూపినో;

కమాట్ఠచత్తాలీసమ్హా, తథేకద్వితిహీనతో.

౧౩౩. పుబ్బసఙ్గహమిచ్చేవం, విగణేత్వా విచక్ఖణో;

పరసఙ్గహసఙ్ఖ్యాదిం, విభావేయ్య విసారదో.

౧౩౪. పఞ్చద్వారావజ్జనతో, దస చిత్తాని దీపయే;

సేసావజ్జనతో పఞ్చచత్తాలీసన్తి భాసితం.

౧౩౫. పఞ్చవిఞ్ఞాణతో పాపవిపాకా సమ్పటిచ్ఛనా;

పరమేకం ద్వయం పుఞ్ఞవిపాకా సమ్పటిచ్ఛనా.

౧౩౬. సన్తీరణా ద్విహేతుమ్హా, పాకా ద్వాదస జాయరే;

తిహేతుకామపాకమ్హా, ఏకవీసతి లబ్భరే.

౧౩౭. రూపావచరపాకమ్హా, పరమేకూనవీసతి;

నవట్ఠారూపపాకమ్హా, సత్త ఛాపి యథాక్కమం.

౧౩౮. పటిఘమ్హా తు సత్తేవ, సితమ్హా తేరసేరితా;

పాపపుఞ్ఞద్విహేతుమ్హా, ఏకవీసతి భావయే.

౧౩౯. ద్విహేతుకామక్రియతో, అట్ఠారస ఉపేక్ఖకా;

సత్తరస సుఖోపేతా, విభావేయ్య విచక్ఖణో.

౧౪౦. కామపుఞ్ఞతిహేతుమ్హా, తేత్తింసేవ ఉపేక్ఖకా;

తేపఞ్ఞాస సుఖోపేతా, భవన్తీతి పకాసితం.

౧౪౧. తిహేతుకామక్రియతో, చతువీసతిపేక్ఖకా;

సుఖితమ్హా తు దీపేయ్య, పఞ్చవీసతి పణ్డితో.

౧౪౨. దసరూపజవమ్హేకా-దసద్వాదస తేరస;

యథాక్కమం పఞ్చదస, ఆరుప్పా పరిదీపయే.

౧౪౩. ఫలమ్హా చుద్దసేవాహు, మగ్గమ్హా తు సకం ఫలం;

పరం సఙ్గహమిచ్చేవం, విగణేయ్య విసారదో.

౧౪౪. పుబ్బాపరసమోధాన-మితి ఞత్వా తతో పరం;

వత్థువీథిసమోధానం, యథాసమ్భవముద్దిసే.

౧౪౫. పఞ్చ వత్థూని నిస్సాయ, కమతో పఞ్చమానసా;

తేత్తింస పన నిస్సాయ, హదయం మానసా సియుం.

౧౪౬. కామపాకమనోధాతు-హసితుప్పాదమానసా;

దోసమూలాని మగ్గో చ, రూపజ్ఝానావ సబ్బథా.

౧౪౭. దసావసేసాపుఞ్ఞాని, కామపుఞ్ఞమహాక్రియా;

వోట్ఠబ్బారూపజవనం, సత్త లోకుత్తరాని చ.

౧౪౮. ద్వేచత్తాలీస చిత్తాని, పఞ్చవోకారభూమియం;

నిస్సాయ హదయం హోన్తి, అరూపే నిస్సయం వినా.

౧౪౯. ఆరుప్పపాకా చత్తారో, అనిస్సాయేతి సబ్బథా;

విత్థారేనట్ఠధా భిన్నం, సఙ్ఖేపా తివిధం భవే.

౧౫౦. తేచత్తాలీస నిస్సాయ, అనిస్సాయ చతుబ్బిధం;

నిస్సితానిస్సితా సేసా, ద్వేచత్తాలీస మానసా.

౧౫౧. పఞ్చ చిత్తప్పనా హోన్తి, కమేనేకేకవీథియం;

మనోధాతుత్తికం నామ, పఞ్చద్వారికమీరితం.

౧౫౨. సుఖతీరణవోట్ఠబ్బ-పరిత్తజవనా పన;

ఏకతింసాపి జాయన్తే, ఛసు వీథీసు సమ్భవా.

౧౫౩. మహాపాకా పనట్ఠాపి, ఉపేక్ఖాతీరణద్వయం;

ఛసు ద్వారేసు జాయన్తి, దస ముత్తా చ వీథియా.

౧౫౪. చుతిసన్ధిభవఙ్గానం, వసా పాకా మహగ్గతా;

నవ వీథివిముత్తాతి, దసధా వీథిసఙ్గహో.

౧౫౫. ఏకద్వారికచిత్తాని, పఞ్చఛద్వారికా తథా;

ఛద్వారికవిముత్తా చ, విముత్తాతి చ సబ్బథా.

౧౫౬. ఛత్తింస తయేకతింస, దస చేవ నవేతి చ;

ఞత్వా వీథిసమోధానం, గోచరఞ్చ సముద్దిసే.

౧౫౭. కమతో పఞ్చవిఞ్ఞాణా, లోకుత్తరమహగ్గతా;

అభిఞ్ఞావజ్జితా సబ్బా, పఞ్చతాలీస మానసా.

౧౫౮. యథాసమ్భవతో హోన్తి, రూపాదేకేకగోచరా;

పఞ్చగోచరమీరేన్తి, మనోధాతుత్తికం పన.

౧౫౯. సన్తీరణమహాపాకా, పరిత్తజవనాని చ;

వోట్ఠబ్బనమభిఞ్ఞా చ, తేచత్తాలీస సమ్భవా.

౧౬౦. ఛారమ్మణేసు హోన్తీతి, అట్ఠధా తివిధా పున;

ఏకారమ్మణచిత్తాని, పఞ్చఛారమ్మణాని చ.

౧౬౧. సఙ్ఖేపా మానసా పఞ్చ-చత్తాలీస తయో తథా;

తేచత్తాలీస చేవేతి, సత్తధాపి సియుం కథం.

౧౬౨. కామపాకమనోధాతు-హసితుప్పాదమానసా;

పఞ్చవీస యథాయోగం, పరిత్తారమ్మణా మతా.

౧౬౩. కసిణుగ్ఘాటిమాకాసం, పఠమారుప్పమానసం;

తస్సేవ నత్థిభావం తు, తతియారుప్పకం తథా.

౧౬౪. ఆలమ్బిత్వా పవత్తన్తి, ఆరుప్పా కమతో తతో;

దుతియఞ్చ చతుత్థఞ్చ, ఛ మహగ్గతగోచరా.

౧౬౫. అప్పమాణసమఞ్ఞా తే, నిబ్బానే పన గోచరే;

అట్ఠ లోకుత్తరా ధమ్మా, నియమేన వవత్థితా.

౧౬౬. కసిణాసుభకోట్ఠాసే,

ఆనాపానే చ యోగినో;

పటిభాగనిమిత్తమ్హి,

అప్పమఞ్ఞానుయుఞ్జతో.

౧౬౭. సత్తపణ్ణత్తియఞ్చేవ, రూపజ్ఝానం పవత్తతి;

యథావుత్తనిమిత్తమ్హి, సేసమారుప్పకన్తి చ.

౧౬౮. అభిఞ్ఞావజ్జితా ఏకవీస మహగ్గతా సబ్బా;

సబ్బే పణ్ణత్తిసఙ్ఖాతే, నవత్తబ్బే పవత్తరే.

౧౬౯. జాయన్తాకుసలా ఞాణవిప్పయుత్తజవా తథా;

అప్పమాణం వినా వీస, పరిత్తాదీసు తీసుపి.

౧౭౦. తిహేతుకామపుఞ్ఞాని, పుఞ్ఞాభిఞ్ఞా చ పఞ్చిమే;

చతూసుపి పవత్తన్తి, అరహత్తద్వయం వినా.

౧౭౧. క్రియాభిఞ్ఞా చ వోట్ఠబ్బం, క్రియాకామే తిహేతుకా;

ఛ సబ్బత్థాపి హోన్తీతి, సత్తధా మానసా ఠితా.

౧౭౨. ఏకతిచ్చతుకోట్ఠాసగోచరా తివిధా పన;

సమసట్ఠి తథా వీస, కమేనేకాదసేతి చ.

౧౭౩. పఞ్చద్వారేసు పఞ్చాపి, పచ్చుప్పన్నావ గోచరా;

తేకాలికా నవత్తబ్బా, మనోద్వారే యథారహం.

౧౭౪. అజ్ఝత్తా చ బహిద్ధా చ, పఞ్చద్వారేసు గోచరా;

మనోద్వారే నవత్తబ్బో, నత్థిభావోపి లబ్భతి.

౧౭౫. పఞ్చద్వారేసు పఞ్చన్న-మేకమేకో చ గోచరో;

ఛాపి ఆరమ్మణా హోన్తి, మనోద్వారమ్హి సబ్బథా.

౧౭౬. పఞ్చద్వారేసు గహితం, తదఞ్ఞమ్పి చ గోచరం;

మనోద్వారే వవత్థానం, గచ్ఛతీతి హి దేసితం.

౧౭౭. అతీతా వత్తమానా చ, సమ్భవా కామసన్ధియా;

ఛద్వారగహితా హోన్తి, తివిధా తేపి గోచరా.

౧౭౮. కమ్మనిమిత్తమేవేకం, మనోద్వారే ఉపట్ఠితం;

నవత్తబ్బమతీతఞ్చ, ధమ్మారమ్మణసఙ్గహం.

౧౭౯. ఆలమ్బిత్వా యథాయోగం, పటిసన్ధిమహగ్గతా;

అన్తే చుతి భవే మజ్ఝే, భవఙ్గమ్పి పవత్తతీతి.

ఇతి చిత్తవిభాగే వీథిపరికమ్మకథా నిట్ఠితా.

చతుత్థో పరిచ్ఛేదో.