౨౨. పకిణ్ణకకథా

౮౪౪. ఇత్థం రూపానముప్పత్తిం, దీపేత్వా దాని వుచ్చతి;

పవత్తికోసల్లత్థాయ, తత్థేవేతం పకిణ్ణకం.

౮౪౫. దువిధా సన్ధియో తత్థ, మిస్సామిస్సవిభాగతో;

తివిధాపి చేకచతు-పఞ్చవోకారభేదతో.

౮౪౬. రూపమత్తా అసఞ్ఞీనం, నామాభావా అమిస్సితా;

నామమత్తా అరూపీనం, రూపాభావాతి చ ద్విధా.

౮౪౭. కామావచరికా చేవ, రూపావచరికాతి చ;

దువిధా మిస్సితా చేతి, భవన్తి చ చతుబ్బిధా.

౮౪౮. ఏకచ్చతువోకారా చ, అమిస్సా పఞ్చ సన్ధియో;

ఛబ్బీసతివిధా మిస్సా, పఞ్చవోకారసన్ధియో.

౮౪౯. ఇత్థం భూమిప్పభేదేన, ఏకతింసవిధాపి చ;

సన్తతిరాసిభేదేన, సియుం తింసవిధా కథం.

౮౫౦. రూపసన్తతిసీసానం,

రాసయో సత్తవీసతి;

వుత్తా కామే వసా తేసం,

సత్తకా కామసన్ధియో.

౮౫౧. వేదనాసఞ్ఞాసఙ్ఖార-విఞ్ఞాణక్ఖన్ధసఙ్గహా;

సబ్బత్థాపి చతస్సోవ, నామసన్తతియో సియుం.

౮౫౨. ఇచ్చుభిన్నం వసా హోన్తి, తత్థేకాదసకాదయో;

సన్తతిరాసయో పుబ్బే, విభత్తా సత్తకాదయో.

౮౫౩. ఏకాదసకదసక-నవట్ఠసత్తకా సియుం;

ఛక్కేన సద్ధిం విఞ్ఞేయ్యా, తస్మా తత్థ ఛ సఙ్గహా.

౮౫౪. అట్ఠ సన్తతియో హోన్తి, రూపలోకేన మిస్సితా;

అట్ఠకో రాసి తత్థేకో, తస్మా సన్తతి వుచ్చతి.

౮౫౫. జీవితనవకో త్వేకో, అసఞ్ఞీ పటిసన్ధియం;

అరూపీనం చతస్సోపి, నామసన్తతియో సియుం.

౮౫౬. ఇచ్చేకకచతుక్కానం, వసేన ద్వే అమిస్సితా;

అట్ఠవీసఞ్చ మిస్సాతి, తింసేవ హోన్తి సన్ధియో.

౮౫౭. ఏకుప్పాదనిరోధా చ, అమిస్సా తత్థ రాసయో;

మిస్సితానం విభాగోయం, యథాయోగం కథీయతి.

౮౫౮. ఉప్పాదట్ఠితిభఙ్గానం, వసా తీణి ఖణానిపి;

సమానానేవ నామానం, ఏకచిత్తక్ఖణం మతం.

౮౫౯. తుల్యముప్పాదభఙ్గానం, రూపానమ్పి ఖణద్వయం;

ఏకూనపఞ్ఞాసమత్తం, ఠితిక్ఖణముదీరితం.

౮౬౦. నామరూపానముప్పాదో, భఙ్గోపి హి సమో మతో;

దన్ధం హి వత్తికం రూపం, నామం తు లహువత్తికం.

౮౬౧. తథా హి రూపే తిట్ఠన్తే, చిత్తుప్పాదా తు సోళస;

ఉప్పజ్జిత్వా పవత్తిత్వా, భిజ్జన్తి చ లహుం లహుం.

౮౬౨. తస్మా హి ఏకపఞ్ఞాస-ఖణరూపక్ఖణం తథా;

సత్తరసచిత్తక్ఖణం, తిఖణన్తి చ వుచ్చతి.

౮౬౩. చిత్తక్ఖణం హి తిణ్ణన్నం, తత్థ విఞ్ఞత్తికద్వయం;

లక్ఖణత్తయరూపం తు, సలక్ఖణవవత్థితం.

౮౬౪. తస్మా హిత్వా ద్వయఞ్చేతం, బావీసతివిధమ్పి చ;

రూపం నామ చతుక్కఞ్చ, సలక్ఖణనియామితం.

౮౬౫. ఏకుప్పాదనిరోధా చ, తత్థ తుల్యక్ఖణా మతా;

అతుల్యక్ఖణధమ్మానం, సియా భేదం యథారహం.

౮౬౬. పటిసన్ధిక్ఖణే జాతం, తస్మా రూపం తతో పరం;

సత్తరసమచిత్తస్స, భఙ్గేన సహ భిజ్జతి.

౮౬౭. తస్స ఠితిక్ఖణే జాతం, రూపమ్పి చ తతో పరం;

అట్ఠారసమచిత్తస్స, ఉప్పాదే పన భిజ్జతి.

౮౬౮. తస్స భఙ్గక్ఖణే జాతం, రూపమ్పి చ తతో పరం;

అట్ఠారసమచిత్తస్స, ఠితికాలేసు భిజ్జతి.

౮౬౯. తథా దుతియచిత్తస్స, ఉప్పాదమ్హి సముట్ఠితం;

అట్ఠారసమచిత్తస్స, భఙ్గేన సహ భిజ్జతి.

౮౭౦. ఇతి వుత్తనియామేన, సజాతిక్ఖణతో పరం;

ఠత్వా ఏకూనపఞ్ఞాస, ఖణాని పున భిజ్జతి.

౮౭౧. తస్మా ఏకూనపఞ్ఞాస, కలాపా సహ వత్తరే;

ఏకో జాయతి ఏకో చ, భిజ్జతీతి చ సబ్బథా.

౮౭౨. ఏకసన్తతిసమ్బన్ధా, కలాపా సహ కమ్మజా;

యథానుపుబ్బఘటితా, ఏకపఞ్ఞాస లబ్భరే.

౮౭౩. సత్తవీస పనిచ్చేవం, కామే ద్వే రూపభూమియం;

రూపసన్తతిసీసానం, రాసయో సత్తకాదయో.

౮౭౪. ఏకూనతింస సబ్బేపి, కమ్మజాతా యథారహం;

ఏకపఞ్ఞాస ఘటికా, పవత్తన్తి ఖణే ఖణే.

౮౭౫. తత్థ సన్ధిక్ఖణే జాతం, సత్తరసమచేతసో;

ఉప్పాదే భిజ్జతిచ్చేవం, వుత్తో అట్ఠకథానయో.

౮౭౬. తం నయం పటిబాహిత్వా, చిత్తేన సహ భిజ్జతి;

చిత్తేన సహ జాతన్తి, వుత్తమాచరియేన హి.

౮౭౭. ఆనాపానతక్కచారా, ఏకుప్పాదనిరోధకా;

వుత్తా హి యమకే కాయవచీసఙ్ఖారనామకా.

౮౭౮. చిత్తుప్పాదక్ఖణే జాతా, ఉతు తస్స ఠితిక్ఖణే;

రూపం జనేతి తత్థాపి, ఉతు భఙ్గక్ఖణేపి చ.

౮౭౯. అనుపుబ్బక్కమేనేవం, జాతం రూపం తథాపరం;

అట్ఠారసమఉప్పాదట్ఠితిఆదీసు భిజ్జతి.

౮౮౦. ఇత్థం కలాపా ఘటితా, ఉతుజాహారజాపి చ;

ఏకసన్తతిసమ్బన్ధా, ఏకపఞ్ఞాస లబ్భరే.

౮౮౧. కలాపా చిత్తజా యస్మా, ఉప్పాదక్ఖణసమ్భూతా;

ఘటికా సహ లబ్భన్తి, తస్మా సత్తరసేవ తే.

౮౮౨. సబ్బేపి రూపజనకా, చిత్తుప్పాదే యథాసకం;

జనేన్తి ఠితిభఙ్గేసు, న జనేన్తీతి కేచనా.

౮౮౩. కుసలాబ్యాకతాదీనం, ఏకుప్పాదనిరోధతా;

ధమ్మానం యమకే వుత్తా, ఇతి పాళి వదన్తి చ.

౮౮౪. కుసలాదికసమ్బన్ధా, తత్థ తత్థ హి దేసితా;

ఇతి వత్వా పురే వుత్తం, ఇచ్ఛన్తాచరియా నయం.

౮౮౫. ఇచ్చేవం చతుసమ్భూతా, రూపసన్తతిరాసయో;

రూపాని చ కలాపా చ, ఏకాబద్ధా యథారహం.

౮౮౬. సుత్తపవత్తమత్తానం, సమ్బుద్ధానమ్పి పాణినం;

యావ మరణకాలాపి, పవత్తన్తి నిరన్తరం.

౮౮౭. ఆయుక్ఖయా చ మరణం, తథా కమ్మక్ఖయా సియా;

ఉభిన్నం వా ఖయా చాథ, ఉపచ్ఛేదకకమ్మునా.

౮౮౮. చతుధాపి మరన్తస్స, తస్సేవం తు యథారహం;

సత్తరసచిత్తక్ఖణమత్తసేసమ్హి జీవితే.

౮౮౯. ఉపరిచ్చుతిచిత్తస్స, సత్తరసమచేతసో;

ఠితికాలముపాదాయ, న తు జాయతి కమ్మజం.

౮౯౦. తస్సుప్పాదక్ఖణే జాతం,

రూపఞ్చ చుతియా సహ;

భిజ్జతీతి మతో నామ,

తతో హోతి స పుగ్గలో.

౮౯౧. చిత్తజాహారజఞ్చాపి, న జాయతి తతో పరం;

ఉతుసమ్భవరూపం తు, అవసిస్సతి వా న వా.

౮౯౨. తతో వుత్తనయేనేవ, మతసత్తో యథారహం;

మిస్సామిస్సాహి సన్ధీహి, పునదేవోపపజ్జతి.

౮౯౩. తతో వుత్తనయేనేవ, ఏకూనతింస కమ్మజా;

తేసముట్ఠానికా పఞ్చ, చతుత్తింస సమిస్సితా.

౮౯౪. కలాపా రాసయో హోన్తి, సత్తవీసతిభూమిసు;

ఇతి సబ్బపకారేన, రూపధమ్మా పకాసితాతి.

ఇతి రూపవిభాగే పకిణ్ణకకథా నిట్ఠితా.

ద్వావీసతిమో పరిచ్ఛేదో.

నిట్ఠితో చ సబ్బథాపి రూపవిభాగో.