౧౯. పభేదకథా

౭౦౬. అట్ఠవీసవిధమ్పేతం, రూపం దాని యథారహం;

భూతరూపాదిభేదేహి, విభజేయ్య విచక్ఖణో.

౭౦౭. పథవాదికమిదన్తి, భూతరూపం చతుబ్బిధం;

ఉపాదారూపమఞ్ఞం తు, చతువీసతివిధం భవే.

౭౦౮. పఞ్చవిధమ్పి చక్ఖాదిరూపమజ్ఝత్తికం మతం;

తేవీసతివిధం సేసం, బాహిరన్తి పవుచ్చతి.

౭౦౯. రూపసద్దగన్ధరసఫోట్ఠబ్బా సత్త పఞ్చధా;

పఞ్చప్పసాదవిసయా, పఞ్చారమ్మణనామకా.

౭౧౦. ఏకవీసతివిధం సేసం, ధమ్మారమ్మణసఙ్గహం;

మనోవిఞ్ఞాణవిఞ్ఞేయ్యం, మనోద్వారస్స గోచరం.

౭౧౧. పసాదా విసయా చేవ, పఞ్చకా ద్వేపి సమ్భవా;

ద్వాదసాపి సరూపేన, దసాయతనధాతుయో.

౭౧౨. యదేదం పన సబ్బమ్పి, రూపం సప్పటిఘం మతం;

తదేవోళారికం నామ, సన్తికేతి పవుచ్చతి.

౭౧౩. సేసమప్పటిఘం నామ, ధమ్మాయతనధాతు చ;

సుఖుమఞ్చేవ రూపఞ్చ, రూపం సోళసధా ఠితం.

౭౧౪. ఛబ్బిధా వత్థురూపం తు, పసాదహదయమ్పి చ;

అవత్థురూపం సేసం తు, ద్వావీసతివిధం భవే.

౭౧౫. పసాదా చేవ విఞ్ఞత్తి, ద్వారరూపం తు సత్తధా;

సేసం అద్వారరూపం తు, ఏకవీసవిధమ్పి చ.

౭౧౬. పసాదా భావయుగళం, జీవితఞ్చేతి అట్ఠధా;

ఇన్ద్రియరూపమఞ్ఞం తు, వీసధానిన్ద్రియం సియా.

౭౧౭. వణ్ణో గన్ధో రసో ఓజా, భూతరూపన్తి అట్ఠధా;

అవినిబ్భోగమితరం, వినిబ్భోగం తు వీసధా.

౭౧౮. అవినిబ్భోగరూపాని, సద్దవత్థిన్ద్రియాని చ;

నిప్ఫన్నం అట్ఠారసధా, రూపరూపన్తి వేదితం.

౭౧౯. పరిచ్ఛేదో పనాకాసో, విఞ్ఞత్తిలహుతాదయో;

వికారా లక్ఖణా చేవ, రూపస్సుపచయాదయో.

౭౨౦. దసధాపి అనిప్ఫన్నం, నత్థేతం పరమత్థతో;

రూపస్సేతన్తి కత్వాన, రూపమిచ్చేవ వుచ్చతి.

౭౨౧. రూపాయతనమేవేకం, సనిదస్సనమీరితం;

అనిదస్సనమఞ్ఞం తు, సత్తవీసతివిధమ్పి చ.

౭౨౨. కమ్మజం పనుపాదిన్నం, అనుపాదిన్నకాపరం;

తివిధం చిత్తజఞ్చేవ, ఉతుజాహారజన్తి చ.

౭౨౩. చక్ఖుసమ్ఫస్సవత్థూతి, చక్ఖుధాతు పకిత్తితా;

న వత్థు తస్స సేసం తు, సత్తవీసతివిధం భవే.

౭౨౪. సోతసమ్ఫస్సవత్థాది-వసా చ దువిధా తథా;

తివిధా చ విభావేయ్య, యథాసమ్భవతో కథం.

౭౨౫. సనిదస్సనరూపఞ్చ, వణ్ణో సప్పటిఘమ్పి చ;

అనిదస్సనమఞ్ఞం తు, థూలం సప్పటిఘం భవే.

౭౨౬. అనిదస్సనరూపఞ్చ, సేసమప్పటిఘమ్పి చ;

సోళసాతి చ సబ్బమ్పి, రూపం తివిధముద్దిసే.

౭౨౭. అపత్తగాహకం నామ, చక్ఖుసోతద్వయం పన;

సమ్పత్తగాహకం నామ, ఘానాదిత్తయమీరితం.

౭౨౮. అగాహకమతో సేసం, తేవీసతివిధం భవే;

కిఞ్చి సారమ్మణం నామ, న గయ్హతీతి సబ్బథా.

౭౨౯. ఉపాదా అజ్ఝత్తికం రూపం, ఉపాదా బాహిరం తథా;

నోపాదా బాహిరఞ్చేతి, ఏవమ్పి తివిధం భవే.

౭౩౦. అజ్ఝత్తికముపాదిన్నం, బాహిరఞ్చ తథాపరం;

అనుపాదిన్నకఞ్చేతి, ఏవమాదివసాపి చ.

౭౩౧. దిట్ఠం రూపం సుతం సద్దో, గన్ధాది తివిధం ముతం;

విఞ్ఞాతమఞ్ఞవిఞ్ఞేయ్యం, మనసాతి చతుబ్బిధం.

౭౩౨. రూపరూపం పరిచ్ఛేదో, వికారో లక్ఖణం కమా;

అట్ఠారసేకకం పఞ్చ, చతుక్కన్తి చ తం తథా.

౭౩౩. ద్వారఞ్చ హోతి వత్థు చ, న వత్థు ద్వారమేవ తు;

న ద్వారం వత్థుమేవాథ, నోభయన్తి చ నిద్దిసే.

౭౩౪. ఉపాదా అనుపాదిన్నం, అనుపాదిన్నకం తథా;

నోపాదా దువిధఞ్చేతి, చతుద్ధేవమ్పి దేసితం.

౭౩౫. సప్పటిగ్ఘముపాదా చ, రూపమప్పటిఘం తథా;

నోపాదా దువిధఞ్చేతి, చతుద్ధా ఏవమాదితో.

౭౩౬. ఏకాదసేకజరూపం, హదయిన్ద్రియనవకం;

కమ్మజం చిత్తజఞ్చేవ, తథా విఞ్ఞత్తికం ద్వయం.

౭౩౭. సద్దో చిత్తోతుజో తస్మా, రూపమేకం ద్విజం మతం;

చిత్తోతాహారసమ్భూతం, లహుతాదిత్తయం తిజం.

౭౩౮. నవాకాసావినిబ్భోగా, కమ్మాదిచతుసమ్భవా;

అథ లక్ఖణరూపన్తి, రూపమేవం తు పఞ్చధా.

౭౩౯. నవాకాసావినిబ్భోగా, నవ వత్థిన్ద్రియాని చ;

అట్ఠారసవిధం రూపం, కమ్మజం హోతి పిణ్డితం.

౭౪౦. సద్దాకాసావినిబ్భోగా, విఞ్ఞత్తిలహుతాదయో;

పఞ్చదసవిధం రూపం, చిత్తసమ్భవముద్దిసే.

౭౪౧. సద్దాకాసావినిబ్భోగా, లహుతాదిత్తయన్తి చ;

ఉతుసమ్భవమీరేన్తి, రూపం తేరసధా ఠితం.

౭౪౨. పరిచ్ఛేదావినిబ్భోగా, లహుతాదిత్తయమ్పి చ;

ఏవమాహారజం నామ, రూపం ద్వాదసధా ఠితం.

౭౪౩. జాతి జరా చ మరణం, న కుతోచిపి జాయతి;

ఏవమ్పి పఞ్చధా హోతి, రూపజాతివిభాగతో.

౭౪౪. పఞ్చవీసతివిధం కమ్మం, కామరూపవవత్థితం;

జనేతి కమ్మజం రూపం, కామరూపభవద్వయే.

౭౪౫. పఞ్చవిఞ్ఞాణమారుప్ప-విపాకా సబ్బసన్ధియో;

చుతి ఖీణాసవస్సేతి, సోళసేతే వివజ్జయే.

౭౪౬. పఞ్చసత్తతి సేసాని, చిత్తానిమాని సమ్భవా;

జనేన్తి చిత్తజం రూపం, పఞ్చవోకారభూమియం.

౭౪౭. జనేభి ఉతుజం రూపం, తేజోధాతు భవద్వయే;

కామభూమియమోజా తు, జనేతాహారజం తథా.

౭౪౮. కమ్మం జనేతి రూపాని, అత్తజాని ఖణే ఖణే;

చిత్తముప్పాదకాలమ్హి, ఉప్పాదానన్తరం పరం.

౭౪౯. ఉతుసమ్భవమీరేన్తి, రూపం తేరసధా ఠితం;

పరిచ్ఛేదావినిబ్భోగా, లహుతాదిత్తయమ్పి చ.

౭౫౦. సన్ధియమ్పి కమ్మజం తు, పవత్తేపి చ సమ్భవా;

జనేతి రూపం సేసాని, పవత్తే, న తు సన్ధియం.

౭౫౧. ఇన్ద్రియబద్ధసన్తానే, కమ్మాది తివిధమ్పి చ;

జనేతి రూపం మతకే, బాహిరే తు యథారహం.

౭౫౨. ఇతి కమ్మాదయో రూపం, జనేన్తి చ యథాసకం;

సేసానమ్పి చ రూపానం, పచ్చయా హోన్తి సమ్భవా.

౭౫౩. ఇతి రూపవిభాగఞ్చ, జాతిభేదఞ్చ సమ్భవా;

జనకాదిప్పభేదఞ్చ, రూపానం తత్థ దీపయేతి.

ఇతి రూపవిభాగే పభేదకథా నిట్ఠితా.

ఏకూనవీసతిమో పరిచ్ఛేదో.