౧౪. రాసిసమ్భవకథా

౪౯౦. నవేవ యేవాపనకా, అట్ఠారస చ రాసయో;

నవభింసతిసమ్భిన్నా, దస ద్వే సవిభత్తికా.

౪౯౧. ఏకద్వయతిచతుఛసత్తట్ఠానానవజ్జకే;

సత్తవీసతి సత్తేకో, ద్వయమేకో పునేకకో.

౪౯౨. దసేవ యేవాపనకా, ఏకాదస చ రాసయో;

అట్ఠవీసతిసమ్భిన్నా, దసేవ సవిభత్తికా.

౪౯౩. ఏకద్వయతిచతుక్కఛట్ఠాననియతా పన;

అట్ఠారస చ సత్తేకో, ఏకో చేకోవ పాపకే.

౪౯౪. ద్వే యేవాపనకా హోన్తి, రాసయో చ చతుబ్బిధా;

తేరసేత్థ అసమ్భిన్నా, తయోవ సవిభత్తికా.

౪౯౫. ఏకద్వయతికట్ఠానా, దస ద్వేకో అహేతుకే;

ఇచ్చానవజ్జా సావజ్జా-హేతుకే యోగనిచ్ఛయో.

౪౯౬. సత్తాపి నత్థి సావజ్జే, నిరవజ్జే పకాసకో;

అహేతుకే చ మగ్గాదిరాసయో నత్థి చుద్దస.

౪౯౭. అనవజ్జా తు సావజ్జే, సావజ్జకానవజ్జకే;

చిత్తుప్పాదమ్హి నత్థేవ, నత్థోభయమహేతుకే.

౪౯౮. సావజ్జా పన సావజ్జే, అనవజ్జానవజ్జకే;

గహేతబ్బా తు సబ్బత్థ, సాధారణా పకిణ్ణకా.

౪౯౯. ఝానపఞ్చకచిత్తేసు, సత్తసట్ఠిసు నిద్దిసే;

ఝానఙ్గయోగభేదేన, రాసిభేదం తహిం తహిం.

౫౦౦. చతుఛక్కానవజ్జేసు, ఞాణపీతికతం తథా;

చతువీస పరిత్తేసు, చతుధా భేదముద్దిసే.

౫౦౧. సరాగవీతరాగానం, అప్పమఞ్ఞాపవత్తియం;

కరుణాముదితా హోన్తి, కామపుఞ్ఞమహాక్రియే.

౫౦౨. ఉపచారప్పనాపత్తా, సుఖితా సత్తగోచరా;

తస్మా న పఞ్చమారుప్పే, మహాపాకే అనుత్తరే.

౫౦౩. సోతాపతితుపేక్ఖాసు, పరికమ్మాదిసమ్భవే;

ఝానానం తుల్యపాకత్తా, తప్పాకేసు చ లబ్భరే.

౫౦౪. విరతీ చ సరాగానం, వీతిక్కమనసమ్భవా;

సమ్పత్తే చ సమాదానే, కామపుఞ్ఞేసు లబ్భరే.

౫౦౫. తంతంద్వారికదుస్సిల్య-చేతనుచ్ఛేదకిచ్చతో;

మగ్గే చ తుల్యపాకత్తా, ఫలే చ నియతా సియుం.

౫౦౬. పవత్తాకారవిసయభిన్నా పఞ్చాపి సమ్భవా;

లోకియే లబ్భమానాపి, విసుం చేవ సియుం న వా.

౫౦౭. పాపా లబ్భన్తి పాపేసు, సత్త ఛక్కేకకా కమా;

సరూపయేవోభయకా, నియతట్ఠ ఛళేతరే.

౫౦౮. సాధారణా చ సబ్బత్థ, యథావుత్తా పకిణ్ణకా;

తత్థ చేకగ్గతా నత్థి, ఇన్ద్రియాదీసు కఙ్ఖితే.

౫౦౯. ఛన్దాధిమోక్ఖా యేవాపి, వీసేకాదసవజ్జితే;

ఉద్ధచ్చమేకాదససు, మజ్ఝత్తమనవజ్జకే.

౫౧౦. సబ్బత్థ మనసికారో, తిద్వేకద్వితికాపరే;

అట్ఠట్ఠవీసచతూసు, పఞ్చద్వీసు యథాక్కమం.

౫౧౧. సముదాయవసేనేత్థ, ఉద్ధచ్చవిరతిత్తయం;

సవిభత్తికమఞ్ఞత్థ, అవిభత్తికమేవ తం.

౫౧౨. చిత్తుప్పాదేసు తేనేతం, విభత్తిఅవిభత్తికం;

ఇతి సాధు సల్లక్ఖేయ్య, సమ్భవాసమ్భవం బుధోతి.

ఇతి చేతసికవిభాగే రాసిసమ్భవకథా నిట్ఠితా.

చుద్దసమో పరిచ్ఛేదో.