౧౨. రాసివినిచ్ఛయకథా

౪౧౬. తత్థ విఞ్ఞాణకాయా ఛ, సత్త విఞ్ఞాణధాతుయో;

ఫస్సా చక్ఖాదిసమ్ఫస్సా, ఛబ్బిధా సత్తధాపి చ.

౪౧౭. చక్ఖుసమ్ఫస్సజాదీహి, భేదేహి పన వేదనా;

సఞ్ఞా చ చేతనా చేవ, భిన్నా ఛధా చ సత్తధా.

౪౧౮. చిత్తుప్పాదేసు ధమ్మా చ, ఖన్ధాయతనధాతుయో;

ఆహారా చ యథాయోగం, ఫస్సపఞ్చకరాసియం.

౪౧౯. సబ్బే సఙ్గహితా హోన్తి, తస్మా నామపరిగ్గహో;

మూలరాసి చ సో సబ్బ-సఙ్గహోతి పవుచ్చతి.

౪౨౦. ఝానరాసిమ్హి పఞ్చేవ, ధమ్మా సత్తప్పభేదతో;

ఇన్ద్రియాని చ బావీస, ధమ్మతో పన సోళస.

౪౨౧. నవ మగ్గఙ్గధమ్మా చ, భిన్నా ద్వాదసధాపి తే;

ఛళేవ హేతుయో తత్థ, దేసితా కఙ్ఖితుద్ధవా.

౪౨౨. దస కమ్మపథా ధమ్మా, ఛళేవ పన దేసితా;

సేసావ దసధమ్మేహి, సమానా చతురాసయో.

౪౨౩. పఞ్ఞా దసవిధా తత్థ, వేదనా నవధా ఠితా;

సమాధి సత్తధా హోతి, వీరియం పన పఞ్చధా.

౪౨౪. సతి భిన్నా చతుధావ, వితక్కో తివిధో మతో;

ద్విధా చిత్తాదయో హోన్తి, దసపఞ్చేవ సమ్భవా.

౪౨౫. సేసా ద్వత్తింస సబ్బేపి, ధమ్మా ఏకేకధాపి చ;

హిత్వా రూపిన్ద్రియానేతే, విభాగా అట్ఠధా కథం.

౪౨౬. ఫస్సో చ చేతనా సఞ్ఞా, విచారో పీతి జీవితం;

నిరవజ్జా ఛ యుగళా, సావజ్జమోహకఙ్ఖితా.

౪౨౭. యేవాపనకధమ్మా చ, విరతుద్ధచ్చవజ్జితా;

ద్వాదసా చేతి సబ్బేపి, ద్వత్తింసకేకధా తథా.

౪౨౮. చిత్తం మనిన్ద్రియం చిత్తం, సద్ధా సద్ధిన్ద్రియం బలం;

బలేసు లోకియా వుత్తా, లోకియే చ దుకద్వయే.

౪౨౯. లోభాలోభాదికా ద్వే ద్వే,

చత్తారో హేతురాసియం;

మిచ్ఛాదిట్ఠి చ మగ్గఙ్గే,

పఞ్చకమ్మపథేపి తే.

౪౩౦. యేవాపనకరాసిమ్హి, దేసితా విరతుద్ధవా;

మగ్గహేతూసు చేవేతి, ద్విధా పఞ్చదస ఠితా.

౪౩౧. వితక్కో ఝానమగ్గేసు, తివిధా నవధా పన;

వేదనా మూలరాసిమ్హి, తథా ఝానిన్ద్రియేసు చ.

౪౩౨. ఇన్ద్రియమగ్గరాసిమ్హి, బలపిట్ఠిదుకత్తికే;

చతుధా సతి తత్థేవ, వీరియమ్పి చ పఞ్చధా.

౪౩౩. సమాధి సత్తధా వుత్తో, ఝానఙ్గేసు చ తత్థ చ;

తత్థేవ దసధా పఞ్ఞా, హేతుకమ్మపథేసు చ.

౪౩౪. దసనవసత్తపఞ్చచతుతిద్వేకధా ఠితా;

ఛళేకకా పఞ్చదస, ద్వత్తింస చ యథాక్కమం.

౪౩౫. అట్ఠ విభాగసఙ్ఖేపా, పదాని దసధా సియుం;

తేపఞ్ఞాసేవ ధమ్మా చ, అట్ఠారస చ రాసయో.

౪౩౬. ఇతి ధమ్మవవత్థానే, ధమ్మసఙ్గణియం పన;

చిత్తుప్పాదపరిచ్ఛేదే, ఉద్దేసనయసఙ్గహో.

౪౩౭. పదాని చతురాసీతి, దేసితాని సరూపతో;

యేవాపనకనామేన, సోళసేవ యథారహం.

౪౩౮. తత్థానియతనామాని, పదానేకాదసేవ తు;

వుత్తానేకూననవుతి, నియతానేవ సమ్భవా.

౪౩౯. అసమ్భిన్నపదానేత్థ, తేపఞ్ఞాసేవ సబ్బథా;

చిత్తచేతసికానం తు, వసేన పరిదీపయే.

౪౪౦. విభాగపదధమ్మానం, వసేనేవం పకాసితో;

చిత్తచేతసికానం తు, కమతో రాసినిచ్ఛయోతి.

ఇతి చేతసికవిభాగే రాసివినిచ్ఛయకథా నిట్ఠితా.

ద్వాదసమో పరిచ్ఛేదో.