౧౧. రాసిసరూపకథా

౩౮౪. సబ్బం సభావసామఞ్ఞ-విసేసేన యథారహం;

గతరాసివసేనాథ, అట్ఠారసవిధం కథం.

౩౮౫. ఫస్సపఞ్చకరాసీ చ, ఝానిన్ద్రియమథాపరే;

మగ్గబలహేతుకమ్మ-పథలోకియరాసయో.

౩౮౬. నిరవజ్జా ఛ పస్సద్ధి-ఆదికా చ సతీమతా;

యుగనన్ధా చ సమథా, తథా యేవాపనాతి చ.

౩౮౭. ఫస్సో చ వేదనా సఞ్ఞా, చేతనా చిత్తమేవ చ;

ఫస్సపఞ్చకరాసీతి, పఞ్చ ధమ్మా పకాసితా.

౩౮౮. వితక్కో చ విచారో చ, పీతి చేకగ్గతా తథా;

సుఖం దుక్ఖముపేక్ఖాతి, సత్త ఝానఙ్గనామకా.

౩౮౯. సద్ధిన్ద్రియఞ్చ వీరియం, సతి చేవ సమాధి చ;

పఞ్ఞా చతుబ్బిధా వుత్తా, మనో పఞ్చాపి వేదనా.

౩౯౦. జీవితిన్ద్రియమేకన్తి, చక్ఖాదీని చ సత్తధా;

బావీసతిన్ద్రియా నామ, ధమ్మా సోళస దేసితా.

౩౯౧. ఆదిమగ్గే అనఞ్ఞాత-ఞ్ఞస్సామీతిన్ద్రియం భవే;

మజ్ఝే అఞ్ఞిన్ద్రియం అన్తే, అఞ్ఞాతావిన్ద్రియన్తి చ.

౩౯౨. పఞ్ఞానుత్తరచిత్తేసు, హోన్తి తీణిన్ద్రియానిపి;

తిహేతుకేసు సేసేసు, ఏకం పఞ్ఞిన్ద్రియం మతం.

౩౯౩. సుఖం దుక్ఖిన్ద్రియఞ్చేవ, సోమనస్సిన్ద్రియం తథా;

దోమనస్సముపేక్ఖాతి, పఞ్చధా వేదనా కథా.

౩౯౪. రూపారూపవసా ద్వేధా, జీవితిన్ద్రియమేకకం;

చక్ఖుసోతఘానజివ్హాకాయిత్థిపురిసిన్ద్రియా.

౩౯౫. తత్థ జీవితరూపఞ్చ, అట్ఠేత్థ న తు గయ్హరే;

తస్మా నామిన్ద్రియానేవ, దసపఞ్చ వినిద్దిసే.

౩౯౬. సమ్మాదిట్ఠి చ సఙ్కప్పో, వాయామో విరతిత్తయం;

సమ్మాసతి సమాధి చ, మిచ్ఛాదిట్ఠి చ ధమ్మతో.

౩౯౭. మగ్గఙ్గాని నవేతాని, ద్వాదసాపి యతో ద్విధా;

సమ్మామిచ్ఛాతి సఙ్కప్పో, వాయామో చ సమాధి చ.

౩౯౮. లోకపాలదుకఞ్చేవ, హిరోత్తప్పమథాపరం;

అహిరీకమనోత్తప్పం, దుకం లోకవినాసకం.

౩౯౯. పఞ్చ సద్ధాదయో చేతి, బలధమ్మా నవేరితా;

కణ్హసుక్కవసేనాపి, పటిపక్ఖే అకమ్పియా.

౪౦౦. ఛ హేతూ హేతురాసిమ్హి,

లోభాలోభాదికా తికా;

మోమూహే కఙ్ఖితుద్ధచ్చా,

తత్థ వుత్తాతి అట్ఠధా.

౪౦౧. మిచ్ఛాదిట్ఠి అభిజ్ఝా చ, బ్యాపాదో విరతిత్తయం;

సమ్మాదిట్ఠినభిజ్ఝా చ, అబ్యాపాదో చ చేతనా.

౪౦౨. దస కమ్మపథానేత్థ, వుత్తా విరతిచేతనా;

లోకపాలవినాసాతి, వుత్తా లోకదుకా ద్విధా.

౪౦౩. పస్సద్ధిఆదియుగళా, నిరవజ్జా ఛ రాసయో;

సతి చ సమ్పజఞ్ఞఞ్చ, ఉపకారదుకం భవే.

౪౦౪. యుగనన్ధదుకం నామ, సమథో చ విపస్సనా;

పగ్గహో చ అవిక్ఖేపో, సమథద్దుకమీరితం.

౪౦౫. యే సరూపేన నిద్దిట్ఠా, చిత్తుప్పాదేసు తాదినా;

తే ఠపేత్వావసేసా తు, యేవాపనకనామకా.

౪౦౬. ఛన్దో చ అధిమోక్ఖో చ, తత్రమజ్ఝత్తతా తథా;

ఉద్ధచ్చం మనసికారో, పఞ్చాపణ్ణకనామకా.

౪౦౭. మానో చ థినమిద్ధఞ్చ, ఇస్సా మచ్ఛరియం తథా;

కుక్కుచ్చమప్పమఞ్ఞా చ, తిస్సో విరతియోపి చ.

౪౦౮. ఏతే అనియతా నామ, ఏకాదస యథారహం;

తతో చ సేసా సబ్బేపి, నియతాతి పకిత్తితా.

౪౦౯. కేచి రాసిం న భజన్తి, కేచి చానియతా యతో;

తస్మా యేవాపనాతేవ, ధమ్మా సోళస దేసితా.

౪౧౦. సత్తతింసావసేసా తు, తత్థ తత్థ యథారహం;

సరూపేనేవ నిద్దిట్ఠా, చిత్తుప్పాదేసు సబ్బథా.

౪౧౧. దేసితానుత్తరుద్ధచ్చే, నామతో విరతుద్ధవా;

తథానుత్తరచిత్తేసు, నియతం విరతిత్తయం.

౪౧౨. చిత్తం వితక్కో సద్ధా చ,

హిరోత్తప్పబలద్వయం;

అలోభో చ అదోసో చ,

లోభో దోసో చ దిట్ఠి చ.

౪౧౩. అహిరీకమనోత్తప్పం,

ఉద్ధచ్చం విరతిత్తయం;

సోళసేతే యథాయోగం,

ద్వీసు ఠానేసు దేసితా.

౪౧౪. వేదనా తీసు వీరియం, సతి చ చతురాసికా;

సమాధి ఛసు పఞ్ఞా చ, సత్తట్ఠానేసు దీపితా.

౪౧౫. ఏకవీస పనిచ్చేతే, సవిభత్తికనామకా;

సేసా ద్వత్తింసతి ధమ్మా, సబ్బేపి అవిభత్తికాతి.

ఇతి చేతసికవిభాగే రాసిసరూపకథా నిట్ఠితా.

ఏకాదసమో పరిచ్ఛేదో.