౧౦. పభేదకథా

౩౫౨. ఏకుప్పాదా నిరోధా చ, ఏకాలమ్బణవత్థుకా;

సహగతా సహజాతా, సంసట్ఠా సహవుత్తినో.

౩౫౩. తేపఞ్ఞాస పనిచ్చేతే, సమ్పయుత్తా యథారహం;

చిత్తచేతసికా ధమ్మా, అట్ఠారసవిధాపి చ.

౩౫౪. ఏకధా ఛబ్బిధా చేవ, చతుధా సత్తధా ఠితా;

చిత్తుప్పాదపభేదేన, భిన్దితబ్బా విభావినా.

౩౫౫. అట్ఠ ధమ్మావినిబ్భోగా, భిన్నాసీతి నవుత్తరా;

సత్తసతం దస ద్వే చ, సబ్బే హోన్తి సమిస్సితా.

౩౫౬. సన్తీరణమనోధాతు, సితవోట్ఠబ్బనా తథా;

అపుఞ్ఞా కామపుఞ్ఞా చ, మహాపాకా మహాక్రియా.

౩౫౭. పఠమజ్ఝానధమ్మా చ, లోకుత్తరమహగ్గతా;

పఞ్చపఞ్ఞాస సబ్బేపి, వితక్కా హోన్తి భేదితా.

౩౫౮. విచారాపి చ తేయేవ, దుతియజ్ఝాననామకా;

ఏకాదసాపరే చేతి, ఛసట్ఠి పరిదీపితా.

౩౫౯. అపుఞ్ఞా కామపుఞ్ఞా చ, మహాపాకా మహాక్రియా;

చతుక్కా చేవ చత్తారో, సితఞ్చ సుఖతీరణం.

౩౬౦. పఠమాదితికజ్ఝానా, లోకుత్తరమహగ్గతా;

ఇచ్చేవమేకపఞ్ఞాస, పీతియో హోన్తి సబ్బథా.

౩౬౧. సితవోట్ఠబ్బనా ద్వే చ, సావజ్జా చానవజ్జకా;

భిన్నమేవం తు వీరియం, తేసత్తతివిధం భవే.

౩౬౨. సావజ్జా చానవజ్జా చ, మోమూహద్వయవజ్జితా;

ఛన్దా భవన్తి సబ్బేపి, సట్ఠిభేదా నవుత్తరా.

౩౬౩. సన్తీరణమనోధాతు, సితవోట్ఠబ్బనా తథా;

సావజ్జా చానవజ్జా చ, విచికిచ్ఛావివజ్జితా.

౩౬౪. అధిమోక్ఖా పనిచ్చేవం, అట్ఠసత్తతి భేదితా;

తిసతం నవుతి ద్వే చ, భిన్నా హోన్తి పకిణ్ణకా.

౩౬౫. ఏకూనసట్ఠి వా హోన్తి, సద్ధాదేకూనవీసతి;

సహస్సఞ్చ సతఞ్చేకం, ఏకవీసఞ్చ సబ్బథా.

౩౬౬. ఞాణేన సమ్పయుత్తా చ, కామే ద్వాదసధాపరే;

పఞ్చతింసాతి పఞ్ఞాపి, సత్తతాలీసధా కథా.

౩౬౭. రూపజ్ఝానచతుక్కా చ, కామపుఞ్ఞా మహాక్రియా;

అట్ఠవీసప్పమఞ్ఞేవం, ఛప్పఞ్ఞాస భవన్తి చ.

౩౬౮. అనుత్తరా కామపుఞ్ఞా, తిస్సో విరతియో పన;

హోన్తి సోళసధా భిన్నా, అట్ఠతాలీస పిణ్డితా.

౩౬౯. పఞ్చవీసానవజ్జేవం, సమ్పయుత్తా చతుబ్బిధా;

సహస్సద్విసతఞ్చేవ, ద్వి చ సత్తతి భేదతో.

౩౭౦. చత్తారో పాపసామఞ్ఞా, భిన్నా ద్వాదసధా పన;

అట్ఠతాలీసధా హోన్తి, తే సబ్బే పరిపిణ్డితా.

౩౭౧. లోభో పనట్ఠధా భిన్నో, థినమిద్ధఞ్చ పఞ్చధా;

చతుధా దిట్ఠిమానో చ, చతుధా దిట్ఠియో విసుం.

౩౭౨. ద్విధా దోసాదిచత్తారో, విచికిచ్ఛేకధాతి చ;

సావజ్జా సత్తధా వుత్తా, భిన్నాసీతి తికుత్తరా.

౩౭౩. ఇచ్చట్ఠారసధా వుత్తా, తేపఞ్ఞాసాపి భేదతో;

ద్విసహస్సఞ్చ తు సతం, భవన్తేకూనసట్ఠి చ.

౩౭౪. వితక్కవిచారపీతిసుఖోపేక్ఖాసు పఞ్చసు;

భిన్దిత్వా ఝానభేదేన, గహేతబ్బా అనుత్తరా.

౩౭౫. అఞ్ఞత్ర పన సబ్బత్థ, నత్థి భేదప్పయోజనం;

అట్ఠేవ కస్మా గయ్హన్తి, అభేదేనాతి లక్ఖయే.

౩౭౬. పఠమాదిచతుజ్ఝానా, లోకుత్తరమహగ్గతా;

ఇచ్చేకమేకదసధా, చతుతాలీస పిణ్డితా.

౩౭౭. తేవీస పఞ్చమా చేతి, సత్తసట్ఠి సమిస్సితా;

అప్పనా తత్థ సబ్బాపి, అట్ఠపఞ్ఞాస దీపితా.

౩౭౮. పఞ్చతింసేవ సఙ్ఖేపా, లోకుత్తరమహగ్గతా;

అప్పనా తత్థ సబ్బాపి, ఛబ్బీసతి పకాసితా.

౩౭౯. ఇద్ధివిధం దిబ్బసోతం, చేతోపరియనామకా;

పుబ్బేనివాసానుస్సతి, దిబ్బచక్ఖూతి పఞ్చధా.

౩౮౦. అభిఞ్ఞాఞాణమీరేన్తి, రూపావచరపఞ్చమా;

కుసలఞ్చ క్రియా చేతి, భేదితం దువిధమ్పి చ.

౩౮౧. తం ద్వయమ్పి సమ్మిస్సేత్వా, పఞ్చాభిఞ్ఞా చ లోకియా;

ఆసవక్ఖయఞాణఞ్చ, ఛళభిఞ్ఞా పవుచ్చరే.

౩౮౨. లోకియా చ దసాభిఞ్ఞా, భిన్దిత్వా కుసలక్రియా;

సత్తసత్తతి ఝానాని, అట్ఠసట్ఠి పనప్పనా.

౩౮౩. సత్తసత్తతి చిత్తాని, చతుపఞ్ఞాస సబ్బథా;

పచితాని చ చిత్తాని, ఏకతింససతం సియున్తి.

ఇతి చేతసికవిభాగే పభేదకథా నిట్ఠితా.

దసమో పరిచ్ఛేదో.