నవమో పరిచ్ఛేదో

౯. చేతసికసఙ్గహకథా

౩౧౫. సత్త సాధారణా చేవ, ఛ ధమ్మా చ పకిణ్ణకా;

సద్ధాది పఞ్చవీసేతి, అట్ఠతింస సమిస్సితా.

౩౧౬. కామావచరపుఞ్ఞేసు, లబ్భన్తి పఠమద్వయే;

సత్తతింసేవ దుతియే, పఞ్ఞామత్తవివజ్జితా.

౩౧౭. తతియే చ యథావుత్తా, పీతిమత్తవివజ్జితా;

ఛత్తింసేవ చతుత్థమ్హి, పఞ్ఞాపీతిద్వయం వినా.

౩౧౮. మహాక్రియాసు యుజ్జన్తి, హిత్వా విరతియో తథా;

పఞ్చతింస చతుత్తింసద్వయం తేత్తింసకం కమా.

౩౧౯. ఠపేత్వా అప్పమఞ్ఞా చ, మహాపాకేసు యోజితా;

తేత్తింసా చేవ ద్వత్తింసద్వయేకత్తింసకం కమా.

౩౨౦. అప్పమఞ్ఞా గహేత్వాన, హిత్వా విరతియో తథా;

పఞ్చతింసేవ పఠమే, రూపావచరమానసే.

౩౨౧. వితక్కం దుతియే హిత్వా, విచారఞ్చ తతో పరం;

చతుత్థే పన పీతిఞ్చ, అప్పమఞ్ఞఞ్చ పఞ్చమే.

౩౨౨. యథావుత్తపకారావ, చతుత్తింస యథాక్కమం;

తేత్తింస చేవ ద్వత్తింస, సమతింసఞ్చ లబ్భరే.

౩౨౩. పఞ్చమేన సమానా చ, ఠపేత్వారుప్పమానసా;

భూమారమ్మణభేదఞ్చ, అఙ్గానఞ్చ పణీతతం.

౩౨౪. అప్పమఞ్ఞా ఠపేత్వాన, గహేత్వా విరతిత్తయం;

ఛత్తింసానుత్తరే హోన్తి, పఠమజ్ఝానమానసే.

౩౨౫. వితక్కం దుతియే హిత్వా, విచారఞ్చ తతో పరం;

పీతిం హిత్వా చతుత్థే చ, పఞ్చమేపి చ సబ్బథా.

౩౨౬. యథావుత్తప్పకారావ, పఞ్చతింస యథాక్కమం;

చతుత్తింసఞ్చ తేత్తింస, తథా తేత్తింస చాపరే.

౩౨౭. ఏవం బావీసధా భేదో, అనవజ్జేసు సఙ్గహో;

ఏకూనసట్ఠిచిత్తేసు, అట్ఠతింసానమీరితో.

౩౨౮. విరతీ అప్పమఞ్ఞా చ, గహేత్వా పన సబ్బసో;

ఏకమేకం గహేత్వా చ, పచ్చక్ఖాయ చ సబ్బథా.

౩౨౯. కామేసు సత్తధా పుఞ్ఞే, చతుధా చ క్రియే తథా;

రూపజ్ఝానచతుక్కే చ, కత్తబ్బోయమ్పి సఙ్గహో.

౩౩౦. ఇమినా పనుపాయేన, సమసత్తతి భేదతో;

అనవజ్జేసు విఞ్ఞేయ్యో, చిత్తుప్పాదేసు సఙ్గహో.

౩౩౧. ఇతి సబ్బప్పకారేన, అనవజ్జవినిచ్ఛయం;

ఞత్వా యోజేయ్య మేధావీ, సావజ్జేసు చ సఙ్గహం.

౩౩౨. సత్త సాధారణా చేవ, ఛ ధమ్మా చ పకిణ్ణకా;

చత్తారో పాపసామఞ్ఞా, ధమ్మా సత్తరసేవిమే.

౩౩౩. ఏకూనవీసాసఙ్ఖారే, పఠమే లోభదిట్ఠియా;

దుతియే లోభమానేన, యథావుత్తా చ తత్తకా.

౩౩౪. అట్ఠారస వినా పీతిం, తతియే లోభదిట్ఠియా;

చతుత్థేపి వినా పీతిం, లోభమానేన తత్తకా.

౩౩౫. పటిఘే చ వినా పీతిం, అసఙ్ఖారే తథేవ తే;

లబ్భన్తి దోసకుక్కుచ్చ-మచ్ఛరియాహి వీసతి.

౩౩౬. అసఙ్ఖారేసు వుత్తా చ, ససఙ్ఖారేసు పఞ్చధా;

థినమిద్ధేనేకవీస, వీస ద్వేవీసతిక్కమా.

౩౩౭. ఛన్దం పీతిఞ్చ ఉద్ధచ్చే, హిత్వా పఞ్చదసేవ తే;

హిత్వా విమోక్ఖం కఙ్ఖఞ్చ, గహేత్వా కఙ్ఖితే తథా.

౩౩౮. సత్తవీసతిధమ్మానం, ఇతి ద్వాదస సఙ్గహా;

ద్వాదసాపుఞ్ఞచిత్తేసు, విఞ్ఞాతబ్బా విభావినా.

౩౩౯. హిత్వా ఛానియతే ధమ్మే, గహేత్వా చ యథారహం;

చతుత్తింసాపి విఞ్ఞేయ్యా, సఙ్గహా తత్థ విఞ్ఞునా.

౩౪౦. ద్వాదసాకుసలేస్వేవ, ఞత్వా సఙ్గహముత్తరం;

ఞేయ్యాహేతుకచిత్తేసు, సఙ్గహం కమతో కథం?

౩౪౧. సత్త సాధారణా ఛన్దవజ్జితా చ పకిణ్ణకా;

హసితుప్పాదచిత్తమ్హి, ద్వాదసేవ పకాసితా.

౩౪౨. వోట్ఠబ్బే చ వినా పీతిం, వీరియం సుఖతీరణే;

ఏకాదస యథావుత్తా, ధమ్మా ద్వీసుపి దేసితా.

౩౪౩. మనోధాతుత్తికే చేవ, ఉపేక్ఖాతీరణద్వయే;

దస హోన్తి యథావుత్తా, హిత్వా వీరియపీతియో.

౩౪౪. సత్త సాధారణా ఏవ, పఞ్చవిఞ్ఞాణసమ్భవా;

ఇచ్చాహేతుకచిత్తేసు, పఞ్చధా సఙ్గహో ఠితో.

౩౪౫. ఇతి చేతసికే ధమ్మే, చిత్తేసు గణితే పున;

చిత్తేన సహ సఙ్గయ్హ, గణేయ్యాపి చ పణ్డితో.

౩౪౬. అట్ఠతింసాతి యే వుత్తా, చిత్తేన సహ తే పున;

ఏకూనచత్తాలీసేతి, సబ్బత్థేకాధికం నయే.

౩౪౭. బావీసేవం దస ద్వే చ, పఞ్చ చేతి యథారహం;

సఙ్గహా సమ్పయుత్తానం, తాలీసేకూనకా కథా.

౩౪౮. వితక్కో చ విచారో చ, పీతి పఞ్ఞా తథా పన;

అప్పమఞ్ఞా విరతీతి, నవ ధమ్మా యథారహం.

౩౪౯. గహేతబ్బాపనేతబ్బా, భవన్తి అనవజ్జకే;

పరివత్తేతి సబ్బత్థ, వేదనా తు యథారహం.

౩౫౦. ఛన్దాధిమోక్ఖవీరియా, సద్ధాదేకూనవీసతి;

ఫస్సాదయో ఛళేవాతి, న చలన్తట్ఠవీసతి.

౩౫౧. తేరసేవ తు సావజ్జే, ఛళేవాహేతుమానసే;

న చలన్తి దస అఞ్ఞే, చుద్దసా ఛ చ సమ్భవాతి.

ఇతి చేతసికవిభాగే చేతసికసఙ్గహకథా నిట్ఠితా.

నవమో పరిచ్ఛేదో.