౭. భూమిపుగ్గలసమ్భవకథా

౨౭౦. ద్విహేతుకాహేతుకానం, న సమ్పజ్జతి అప్పనా;

అరహత్తఞ్చ నత్థీతి, నత్థేవ జవనక్రియా.

౨౭౧. ఞాణపాకా న వత్తన్తి, జళత్తా మూలసన్ధియా;

ద్విహేతుకతదాలమ్బం, సియా సుగతియం న వా.

౨౭౨. తిహేతుకానం సత్తానం, సమథఞ్చ విపస్సనం;

భావేన్తానం పవత్తన్తి, ఛబ్బీసతిపి అప్పనా.

౨౭౩. అరహన్తాన సత్తానం, భవన్తి జవనక్రియా;

యథాభూమినియామేన, ఞాణపాకా చ లబ్భరే.

౨౭౪. వజ్ఝా పఠమమగ్గేన, కఙ్ఖాదిట్ఠియుతా పన;

పటిఘం తతియేనేవ, కమ్మమన్తేన సాసవం.

౨౭౫. తస్మా తేసం న వత్తన్తి, తాని చిత్తాని సబ్బథా;

మగ్గట్ఠానం తు మగ్గోవ, నాఞ్ఞం సమ్భోతి కిఞ్చిపి.

౨౭౬. అహేతుకవిపాకాని, లబ్భమానాయ వీథియా;

సబ్బథాపి చ సబ్బేసం, సమ్భవన్తి యథారహం.

౨౭౭. పఞ్చద్వారే మనోద్వారే, ధువమావజ్జనద్వయం;

పరిత్తపుఞ్ఞాపుఞ్ఞాని, లబ్భన్తి లహువుత్తితో.

౨౭౮. క్రియాజవనమప్పనా, నత్థాపాయేసు కారణం;

నత్థి సహేతుకా పాకా, దుగ్గతత్తా హి సన్ధియా.

౨౭౯. బ్రహ్మానం పటిఘం నత్థి, ఝానవిక్ఖమ్భితం తథా;

హేట్ఠాఝానం విరత్తత్తా, న భావేన్తి అరూపినో.

౨౮౦. పుబ్బేవ దిట్ఠసచ్చావ, అరియారూపభూమకా;

తస్మాదిమగ్గో నత్థేత్థ, కాయాభావా సితం తథా.

౨౮౧. సుద్ధావాసాపి పత్తావ, హేట్ఠానుత్తరపఞ్చకం;

సత్తపాపపహీనా చ, తస్మా నత్థేత్థ తాని చ.

౨౮౨. పఞ్చద్వారికచిత్తాని, ద్వారాభావే న విజ్జరే;

సహేతుకవిపాకా చ, యథాభూమివవత్థితా.

౨౮౩. సమ్భవాసమ్భవఞ్చేవం, ఞత్వా పుగ్గలభూమిసు;

లబ్భమానవసా తత్థ, చిత్తసఙ్గహముద్దిసే.

౨౮౪. కుసలాదిప్పభేదా చ, తథా భూమాదిభేదతో;

వత్థుద్వారారమ్మణతో, భూమిపుగ్గలతోపి చ.

౨౮౫. విభాగో యో సముద్దిట్ఠో,

చిత్తానఞ్చ తు సమ్భవా;

ఞేయ్యో చేతసికానఞ్చ,

సమ్పయోగానుసారతోతి.

ఇతి చిత్తవిభాగే భూమిపుగ్గలసమ్భవకథా నిట్ఠితా.

సత్తమో పరిచ్ఛేదో.

నిట్ఠితో చ చిత్తవిభాగో.