౬. భూమిపుగ్గలచిత్తప్పవత్తికథా
౨౩౨. కామసుగతియం హోన్తి, మహాపాకా యథారహం;
మహగ్గతవిపాకా చ, యథాసన్ధివవత్థితా.
౨౩౩. వోట్ఠబ్బకామపుఞ్ఞాని, వియుత్తాని చ దిట్ఠియా;
ఉద్ధచ్చసహితఞ్చేతి, హోన్తి సబ్బత్థ చుద్దస.
౨౩౪. సన్తీరణమనోధాతు-చక్ఖుసోతమనా పన;
దస చిత్తాని జాయన్తి, సబ్బత్థారూపవజ్జితే.
౨౩౫. దిట్ఠిగతసమ్పయుత్తా, విచికిచ్ఛాయుతా తథా;
పఞ్చ సబ్బత్థ జాయన్తి, సుద్ధావాసవివజ్జితే.
౨౩౬. దోసమూలద్వయఞ్చేవ, ఘానాదిత్తయమానసా;
అట్ఠ సబ్బత్థ జాయన్తి, మహగ్గతవివజ్జితే.
౨౩౭. చతుత్థారుప్పజవనం, అనాగామిఫలాదయో;
మహాక్రియా చ జాయన్తి, తేరసాపాయవజ్జితే.
౨౩౮. హేట్ఠారుప్పజవా ద్వే ద్వే, ఛాపాయుపరివజ్జితే;
సితరూపజవా హోన్తి, అరూపాపాయవజ్జితే.
౨౩౯. సోతాపత్తిఫలాదీని, సుద్ధాపాయవివజ్జితే;
పఠమానుత్తరం సుద్ధా-పాయారూపవివజ్జితే.
౨౪౦. అవత్థాభూమిభూతత్తా, న గయ్హన్తి అనుత్తరా;
ఏకవోకారభూమి చ, రూపమత్తా న గయ్హతి.
౨౪౧. సభుమ్మా సబ్బభుమ్మా చ, ఏకద్విత్తయవజ్జితా;
తథారూపసుద్ధావాస-బ్రహ్మాపాయవసాతి చ.
౨౪౨. మానసా పఞ్చ కోట్ఠాసా, సత్తరస చతుద్దస;
ఛత్తింసతేకవీసా చ, ఏకఞ్చేవ యథాక్కమం.
౨౪౩. అట్ఠారసాపి హోన్తేతే, నవధాపి పునేకధా;
చతుధా తివిధా చేవ, ఏకధాతి చ భేదతో.
౨౪౪. తేరసాపి చ కోట్ఠాసా, భవన్తేకతిభూమకా;
ఛసత్తేకాదససత్త-రసభూమకమానసా.
౨౪౫. ఏకద్వయతిచతుక్కపఞ్చకాధికవీసజా;
ఛబ్బీసతింసజా చేతి, యథానుక్కమతో భవే.
౨౪౬. చత్తారి పున చత్తారి, ఏకమట్ఠట్ఠ చేకకం;
చత్తారేకాదస ద్వే ద్వే, సత్త తేవీస చుద్దస.
౨౪౭. క్రియాజవమహాపాకా, లోకుత్తరమహగ్గతా;
ద్వేపఞ్ఞాస న లబ్భన్తి, చతురాపాయభూమియం.
౨౪౮. కామావచరదేవేసు, ఛసు భుమ్మే చ మానవే;
కామసుగతియం నత్థి, నవ పాకా మహగ్గతా.
౨౪౯. దోసమూలమహాపాకా, ఘానాదిత్తయమానసా;
నత్థారూపవిపాకా చ, వీసతీ రూపభూమియం.
౨౫౦. కఙ్ఖాదిట్ఠియుతా పఞ్చారూపపాకా చతుబ్బిధా;
పఞ్చాదోనుత్తరా చేవ, సుద్ధావాసే న లబ్భరే.
౨౫౧. ఆదావజ్జనమగ్గా చ, పటిఘారూపమానసా;
కామపాకా సితారూపే, తేచత్తాలీస నత్థి తే.
౨౫౨. సత్తతింస పరిత్తా చ, లబ్భన్తాపాయభూమియం;
మానసాసీతి లబ్భన్తి, కామసుగతియం పన.
౨౫౩. ఏకూనసత్తతి రూపే, సుద్ధే పఞ్ఞాస పఞ్చ చ;
ఛచత్తాలీస ఆరుప్పే, నత్థాసఞ్ఞీసు కిఞ్చిపి.
౨౫౪. ఇత్థమేకద్వితిచతుపఞ్చభుమ్మాని సోళస;
దస పఞ్చదసేవాథ, చతుత్తింస చతుద్దస.
౨౫౫. అపాయాహేతుకానం తు, మహాపాకక్రియాజవే;
హిత్వా సేసపరిత్తాని, చిత్తాని పన లబ్భరే.
౨౫౬. ద్విహేతుకాహేతుకానం, సేసానం కామమానసా;
లబ్భన్తి పన హిత్వాన, ఞాణపాకక్రియాజవే.
౨౫౭. తిహేతుకానం సత్తానం, తత్థ తత్థూపపత్తియం;
తత్థ తత్థూపపన్నానం, లబ్భమానాని లబ్భరే.
౨౫౮. తిహేతుకానం సబ్బేపి, మానసాపాయపాణినం;
సత్తతింసావసేసానం, ఏకతాలీస నిద్దిసే.
౨౫౯. పుథుజ్జనాన సేక్ఖానం, న సన్తి జవనక్రియా;
న సన్తి వీతరాగానం, పుఞ్ఞాపుఞ్ఞాని సబ్బథా.
౨౬౦. కఙ్ఖాదిట్ఠియుతా పఞ్చ, సేక్ఖానం నత్థి మానసా;
దోసమూలద్వయఞ్చాపి, నత్థానాగామినో పన.
౨౬౧. వవత్థితారియేస్వేవ, యథాసకమనుత్తరా;
మగ్గట్ఠానం సకో మగ్గో, నత్థఞ్ఞం కిఞ్చి సబ్బథా.
౨౬౨. పుథుజ్జనానం ద్విన్నమ్పి, ఫలట్ఠానం యథాక్కమం;
తతియస్స ఫలట్ఠస్స, చతుత్థస్స చ సమ్భవా.
౨౬౩. తేసట్ఠి చేవ చిత్తాని, లబ్భన్తేకూనసట్ఠి చ;
సత్తపఞ్ఞాస చిత్తాని, తేపఞ్ఞాస చ సబ్బథా.
౨౬౪. చతుపఞ్ఞాస పఞ్ఞాస, పఞ్ఞాసద్వయహీనకా;
కామేసు తేసం సమ్భోన్తి, చతుతాలీస చక్కమా.
౨౬౫. తేచత్తాలీస చేకూనచత్తాలీస యథాక్కమం;
భవన్తేకూనతాలీస, పఞ్చత్తింస చ రూపిసు.
౨౬౬. సత్తవీస చ తేవీస, తేవీస చ యథాక్కమం;
ఆరుప్పేసుపి లబ్భన్తి, తేసమట్ఠారసేవ చ.
౨౬౭. పుథుజ్జనా చ చత్తారో, అపాయాహేతుకాదయో;
అరియా చేవ అట్ఠాతి, ద్వాదసన్నం వసా సియుం.
౨౬౮. ఛబ్బిధా చిత్తకోట్ఠాసా, ఏకపుగ్గలికా తథా;
చతుపఞ్చఛసత్తట్ఠ-పుగ్గలట్ఠాతి చక్కమా.
౨౬౯. ఛబ్బీస చుద్దసేవాథ, తేరస ద్వే చ మానసా;
దస సత్తాధికా చేవ, పున సత్తాధికా దసాతి.
ఇతి చిత్తవిభాగే భూమిపుగ్గలచిత్తప్పవత్తికథా నిట్ఠితా.
ఛట్ఠో పరిచ్ఛేదో.