౨. దుతియో పరిచ్ఛేదో

లక్ఖణరసుపట్ఠానవిభాగో

౬౭. సభావో లక్ఖణం నామ, కిచ్చసమ్పజ్జనా రసో;

గయ్హాకారో ఉపట్ఠానం, పదట్ఠానం తు పచ్చయో.

౬౮. అత్తుపలద్ధిసఙ్ఖాతా, సమ్పత్తా చ పనత్థతో;

లక్ఖణరసుపట్ఠానా, వోహారాభోగభేదితా.

౬౯. తేపఞ్ఞాససభావేసు, తస్మా భేదం యథారహం;

లక్ఖణాదిప్పకారేహి, పవక్ఖామి ఇతో పరం.

౭౦. చిన్తేతీతి భవే చిత్తం, చిన్తనమత్తమేవ వా;

సమ్పయుత్తాథ వా తేన, చిన్తేన్తీతి చ గోచరం.

౭౧. ఫుసతీతి భవే ఫస్సో, ఫుసనం వాథ కేవలం;

సమ్పయుత్తాథ వా తేన, ఫుసన్తీతి చ గోచరం.

౭౨. ఏవం కత్తరి భావే చ, కరణే చ యథారహం;

తేపఞ్ఞాససభావేసు, సద్దనిబ్బచనం నయే.

౭౩. ఆలమ్బణమనం చిత్తం, తంవిజాననలక్ఖణం;

సహజాధిట్ఠానరసం, చిన్తాకప్పోతి గయ్హతి.

౭౪. ఆలమ్బణసమోధానో,

ఫస్సో ఫుసనలక్ఖణో;

సఙ్ఘట్టనరసో తత్థ,

సన్నిపాతోతి గయ్హతి.

౭౫. వేదనాలమ్బణరసా, సా వేదయితలక్ఖణా;

గోచరానుభవరసా, అనుభుత్తీతి గయ్హతి.

౭౬. ఆకారగహణం సఞ్ఞా, సా సఞ్జాననలక్ఖణా;

నిమిత్తుప్పాదనరసా, ఉపలక్ఖాతి గయ్హతి.

౭౭. చేతనా చిత్తవిప్ఫారా, సాయం బ్యాపారలక్ఖణా;

కమ్మన్తాయూహనరసా, సంవిధానన్తి గయ్హతి.

౭౮. ఏకగ్గతా అవిక్ఖేపో, సావిసాహారలక్ఖణా;

సమ్పిణ్డనరసా చిత్తం, సమోధానన్తి గయ్హతి.

౭౯. యాపనం సహజాతాన-మనుపాలనలక్ఖణం;

జీవితం జీవనరసం, ఆయుబన్ధోతి గయ్హతి.

౮౦. సారణా మనసీకారో, సమన్నాహారలక్ఖణో;

సంయోజనరసో చిత్త-పటిపత్తీతి గయ్హతి.

౮౧. సఙ్కప్పనలక్ఖణో తక్కో, సహజాభినిరోపనో;

ఆలమ్బాహననరసో, సన్నిరుజ్ఝోతి గయ్హతి.

౮౨. విచారో అనుసన్ధానో, అనుమజ్జనలక్ఖణో;

చిత్తానుయోజనరసో, అనుపేక్ఖాతి గయ్హతి.

౮౩. అధిమోక్ఖో అసంసప్పో, సుసన్నిట్ఠానలక్ఖణో;

నిచ్చలాపాదనరసో, దళ్హవుత్తీతి గయ్హతి.

౮౪. వీరియం పన వాయామో, మహుస్సాహనలక్ఖణో;

కిచ్చాసంసీదనరసో, ఉపత్థమ్భోతి గయ్హతి.

౮౫. ఆలమ్బత్థికతా ఛన్దో, కత్తుకామతలక్ఖణో;

ఆలమ్బణేసనరసో, హత్థాదానన్తి గయ్హతి.

౮౬. సహజాతానుఫరణా, సమ్పియాయనలక్ఖణా;

సమ్పీననరసా పీతి, పామోజ్జమితి గయ్హతి.

౮౭. చేతోసద్దహనం సద్ధా, భూతోకప్పనలక్ఖణా;

హితపక్ఖన్దనరసా, అధిముత్తీతి గయ్హతి.

౮౮. అసమ్మోసా సభావేసు, సతి ధారణలక్ఖణా;

ధమ్మాపిలాపనరసా, అప్పమాదోతి గయ్హతి.

౮౯. హిరీ జేగుచ్ఛా పాపేసు, సా హరాయనలక్ఖణా;

హీళసంకోచనరసా, పాపలజ్జాతి గయ్హతి.

౯౦. పాపసారజ్జమోత్తప్పం, ఉబ్బేగుత్తాసలక్ఖణం;

భయసఙ్కోచనరసం, అవిస్సాసోతి గయ్హతి.

౯౧. అలోభో అనభిసఙ్గో, అపరిగ్గహలక్ఖణో;

ముత్తప్పవత్తనరసో, అసంసగ్గోతి గయ్హతి.

౯౨. అదోసో చిత్తసాఖల్యం, అబ్యాపజ్జనలక్ఖణో;

సణ్హప్పవత్తనరసో, సోమ్మభావోతి గయ్హతి.

౯౩. అమోహో ఖలితాభావో, పటివిజ్ఝనలక్ఖణో;

విసయోభాసనరసో, పటిబోధోతి గయ్హతి.

౯౪. తత్రమజ్ఝత్తతోపేక్ఖా, సమీకరణలక్ఖణా;

అపక్ఖపాతనరసా, సమవాహోతి గయ్హతి.

౯౫. పస్సద్ధి కాయచిత్తానం, దరథాభావలక్ఖణా;

అపరిప్ఫన్దనరసా, సీతిభావోతి గయ్హతి.

౯౬. లహుతా కాయచిత్తానం, అదన్ధాకారలక్ఖణా;

అవిత్థారరసా సల్లహుకవుత్తీతి గయ్హతి.

౯౭. ముదుతా కాయచిత్తానం, కక్ఖళాభావలక్ఖణా;

కిచ్చావిరోధనరసా, అనుకుల్యన్తి గయ్హతి.

౯౮. కమ్మఞ్ఞతా ఉభిన్నమ్పి, అలంకిచ్చస్స లక్ఖణా;

పవత్తిసమ్పత్తిరసా, యోగభావోతి గయ్హతి.

౯౯. తథా పాగుఞ్ఞతా ద్విన్నం, విసదాకారలక్ఖణా;

సుఖప్పవత్తనరసా, సేరిభావోతి గయ్హతి.

౧౦౦. ఉజుతా కాయచిత్తానం, కుటిలాభావలక్ఖణా;

జిమ్హనిమ్మదనరసా, ఉజువుత్తీతి గయ్హతి.

౧౦౧. సమ్మావాచా వచీసుద్ధి, వాచాసంయమలక్ఖణా;

మిచ్ఛావాచోరమరసా, వచీవేలాతి గయ్హతి.

౧౦౨. సమ్మాకమ్మం క్రియాసుద్ధం, సమ్మాకరణలక్ఖణం;

మిచ్ఛాకమ్మోరమరసం, క్రియావేలాతి గయ్హతి.

౧౦౩. సమ్మాజీవో విసుద్ధేట్ఠి, అల్లిట్ఠాజీవలక్ఖణో;

మిచ్ఛాజీవోరమరసో, సమ్మావుత్తీతి గయ్హతి.

౧౦౪. కరుణా దీనసత్తేసు, దుక్ఖాపనయలక్ఖణా;

సోత్థితాపత్థనరసా, అనుకమ్పాతి గయ్హతి.

౧౦౫. సుఖట్ఠితేసు ముదితా, అనుమోదనలక్ఖణా;

చేతోవికాసనరసా, అవిరోధోతి గయ్హతి.

౧౦౬. చేతోసారజ్జనా లోభో, అపరిచ్చాగలక్ఖణో;

ఆలమ్బగిజ్ఝనరసో, అభిలగ్గోతి గయ్హతి.

౧౦౭. చేతోబ్యాపజ్జనం దోసో, సమ్పదుస్సనలక్ఖణో;

ఆలమ్బణఘాతరసో, చణ్డిక్కమితి గయ్హతి.

౧౦౮. చేతోసమ్ముయ్హనం మోహో,

సో సమ్ముయ్హనలక్ఖణో;

సభావచ్ఛాదనరసో,

అన్ధభావోతి గయ్హతి.

౧౦౯. పాపాజిగుచ్ఛాహిరికం, నిల్లజ్జాకారలక్ఖణం;

పాపోపలాపనరసం, మలగ్గాహోతి గయ్హతి.

౧౧౦. అసారజ్జనమనోత్తప్పమనుత్తాసనలక్ఖణం;

పాపపక్ఖన్దనరసం, పాగబ్భమితి గయ్హతి.

౧౧౧. దిట్ఠి దళ్హవిపల్లాసో, సా పరామాసలక్ఖణా;

తుచ్ఛాభినివేసనరసా, మిచ్ఛాగాహోతి గయ్హతి.

౧౧౨. ‘‘అహస్మీ’’తి మఞ్ఞమానో, సో సమున్నతిలక్ఖణో;

కేతుసమ్పగ్గహరసో, అహంకారోతి గయ్హతి.

౧౧౩. పరసమ్పత్తీసు ఇస్సా, అక్ఖమాకారలక్ఖణా;

చేతోవికుచనరసా, విముఖత్తన్తి గయ్హతి.

౧౧౪. పరిగ్గహేసు మచ్ఛేరం, సన్నిగూహనలక్ఖణం;

సామఞ్ఞాసహనరసం, వేవిచ్ఛమితి గయ్హతి.

౧౧౫. చేతోపహననం థీనం, తం సంసీదనలక్ఖణం;

ఉస్సాహభఞ్జనరసం, సంఖిత్తత్తన్తి గయ్హతి.

౧౧౬. విఘాతో సహజాతానం, మిద్ధం మోహనలక్ఖణం;

సత్తిసంభఞ్జనరసం, ఆతురత్తన్తి గయ్హతి.

౧౧౭. ఉద్ధచ్చం చిత్తవిక్ఖేపో, అవూపసమలక్ఖణం;

చేతోనవట్ఠానరసం, భన్తత్తమితి గయ్హతి.

౧౧౮. విప్పటిసారో కుక్కుచ్చమనుసోచనలక్ఖణం;

అత్తానుసోచనరసం, పచ్ఛాతాపోతి గయ్హతి.

౧౧౯. కఙ్ఖాయనా విచికిచ్ఛా, అసన్నిట్ఠానలక్ఖణా;

అనేకగాహనరసా, అప్పతిట్ఠాతి గయ్హతి.

౧౨౦. ఇచ్చేవం లక్ఖణాదీహి, విభావేయ్య విచక్ఖణో;

తేపఞ్ఞాససభావేసు, సభావాకారలక్ఖణం.

౧౨౧. లక్ఖణత్థకుసలా సలక్ఖణే,

లక్ఖణత్థపరమేపి కేవలం;

లక్ఖణుగ్గహసుఖాయ వణ్ణయుం,

లక్ఖణాదిముఖతో సలక్ఖణం.

౧౨౨. అత్థం తమేవమనుగమ్మ మయేత్థ వుత్త-

మత్థానమత్థనయనత్థమనేకధాపి;

పత్థేయ్య మేత్థ వచనత్థనయేహి ఞాణ-

మత్థేసు బుద్ధవచనత్థనయత్థికేహి.

ఇతి నామరూపపరిచ్ఛేదే లక్ఖణరసుపట్ఠానవిభాగో నామ

దుతియో పరిచ్ఛేదో.