౧. పఠమో పరిచ్ఛేదో

నామత్తయవిభాగో

౩. తత్థ చిత్తం చేతసికం, నిబ్బానన్తి మతం తిధా;

నామం రూపం తు దువిధం, భూతోపాదాయభేదతో.

౪. కామభూమాదిభేదేన, తత్థ చిత్తం చతుబ్బిధం;

చేతోయుత్తా ద్విపఞ్ఞాస, ధమ్మా చేతసికా మతా.

౫. చక్ఖుసోతఘానజివ్హా-కాయవిఞ్ఞాణధాతుయో;

సమ్పటిచ్ఛనచిత్తఞ్చ, తథా సన్తీరణద్వయం.

౬. సోమనస్ససహగతం, ఉపేక్ఖాసహితన్తి చ;

ఇచ్చాహేతుకచిత్తాని, పుఞ్ఞపాకాని అట్ఠధా.

౭. సోమనస్సయుతం తత్థ, హిత్వా సన్తీరణం తథా;

సత్తాకుసలపాకాని, తానేవాతి వినిద్దిసే.

౮. పఞ్చద్వారమనోద్వారావజ్జనం హసనన్తి చ;

క్రియచిత్తముదీరితం, తివిధమ్పి అహేతుకం.

౯. ఏవం అట్ఠారసవిధం, మానసం హోతిహేతుకం;

మూలభేదేనాకుసలం, చిత్తం తు తివిధం మతం.

౧౦. సోమనస్ససహగతం, ఉపేక్ఖాసహితం తథా;

దిట్ఠిగతసమ్పయుత్తం, విప్పయుత్తన్తి భేదితం.

౧౧. అసఙ్ఖారం ససఙ్ఖారమితి భిన్నం పనట్ఠధా;

లోభమూలం పకాసేన్తి, తత్థాకుసలమానసం.

౧౨. దోమనస్ససహగతం, పటిఘేన సమాయుతం;

దోసమూలమసఙ్ఖారం, ససఙ్ఖారన్తిపి ద్విధా.

౧౩. విచికిచ్ఛాసహగతం, ఉద్ధచ్చసహితన్తి చ;

మోహమూలఞ్చ దువిధం, ఉపేక్ఖాయ సమాయుతం.

౧౪. ద్వాదసాకుసలానేవం, చిత్తానీతి విభావయే;

హిత్వాహేతుకపాపాని, సోభనాని తతో పరం.

౧౫. సోమనస్ససహగతం, ఉపేక్ఖాసహితం తథా;

ద్విధా ఞాణేన సంయుత్తం, విప్పయుత్తన్తి భేదితం.

౧౬. అసఙ్ఖారం ససఙ్ఖారమితి భిన్నం పనట్ఠధా;

సహేతుకామావచర-పుఞ్ఞపాకక్రియా భవే.

౧౭. కామే తేవీస పాకాని, పుఞ్ఞాపుఞ్ఞాని వీసతి;

ఏకాదస క్రియా చేతి, చతుపఞ్ఞాస సబ్బథా.

౧౮. తక్కచారపీతిసుఖేకగ్గతాసహితం పన;

పఠమజ్ఝానకుసలం, విపాకఞ్చ క్రియా తథా.

౧౯. దుతియం తక్కతో హీనం, తతియం తు విచారతో;

చతుత్థం పీతితో హీనం, ఉపేక్ఖేకగ్గతాయుతం.

౨౦. పఞ్చమం పఞ్చదసధా, రూపావచరమీరితం;

పఞ్చమజ్ఝానమేవేకమరూపావచరం పన.

౨౧. ఆకాసానఞ్చాయతనం, పుఞ్ఞపాకక్రియా తథా;

విఞ్ఞాణఞ్చాయతనఞ్చ, ఆకిఞ్చఞ్ఞాయతనకం;

నేవసఞ్ఞానాసఞ్ఞాయతనం ద్వాదసధా భవే.

౨౨. సోతాపత్తిమగ్గచిత్తం, ఫలచిత్తం తథాపరం;

సకదాగామానాగామి, అరహత్తన్తి అట్ఠధా.

౨౩. ఝానఙ్గయోగభేదేన, కత్వేకేకం తు పఞ్చధా;

విత్థారానుత్తరం చిత్తం, చత్తాలీసవిధం భవే.

౨౪. రూపావచరచిత్తాని, గయ్హన్తానుత్తరాని చ;

పఠమాదిజ్ఝానభేదే, ఆరుప్పఞ్చాపి పఞ్చమే.

౨౫. ద్వాదసాకుసలానేవం, కుసలానేకవీసతి;

ఛత్తింసేవ విపాకాని, క్రియచిత్తాని వీసతి.

౨౬. ఏకవీససతం వాథ, ఏకూననవుతీవిధం;

చిత్తం తంసమ్పయోగేన, భిన్నా చేతసికా తథా.

౨౭. ఫస్సో చ వేదనా సఞ్ఞా, చేతనేకగ్గతా తథా;

జీవితం మనసీకారో, సబ్బసాధారణా మతా.

౨౮. తక్కచారాధిమోక్ఖా చ, వీరియం ఛన్దపీతియో;

పకిణ్ణకా ఛ అక్ఖాతా, తేరసఞ్ఞసమానతా.

౨౯. పకిణ్ణకా న విఞ్ఞాణే, వితక్కో దుతియాదిసు;

విచారో తతియాదిమ్హి, అధిమోక్ఖో తు కఙ్ఖితే.

౩౦. సన్తీరణమనోధాతుత్తికేసు వీరియం తథా;

చతుత్థసుఖితే పీతి, ఛన్దోహేతుమ్హి మోముహే.

౩౧. ఛసట్ఠి పఞ్చపఞ్ఞాస, ఏకాదస చ సోళస;

సత్తతి వీసతి చేవ, తాని చిత్తాని దీపయే.

౩౨. మోహాహిరికానోత్తప్ప-ముద్ధచ్చం సబ్బపాపజం;

ఇస్సామచ్ఛేరకుక్కుచ్చదోసా తు పటిఘే తథా.

౩౩. లోభో లోభే తు దిట్ఠి చ, దిట్ఠియుత్తే వియుత్తకే;

మానో చ థినమిద్ధం తు, ససఙ్ఖారేసు పఞ్చసు.

౩౪. కఙ్ఖితే విచికిచ్ఛాతి, చుద్దసాకుసలానిమే;

ద్వాదసాకుసలేస్వేవ, నియమేన వవత్థితా.

౩౫. సద్ధా సతి హిరోత్తప్పం, అలోభాదోసమజ్ఝతా;

కాయచిత్తానం పస్సద్ధి, లహుతా ముదుతా తథా.

౩౬. కమ్మఞ్ఞతా చ పాగుఞ్ఞఉజుతాతి యుగా ఛ చ;

ఏకూనవీసతి ధమ్మా, అఞ్ఞమఞ్ఞావియోగినో;

ఏకూనసట్ఠిచిత్తేసు, సోభనేసు పవత్తితా.

౩౭. సమ్మావాచా చ కమ్మన్తాజీవాతి విరతీ ఇమా;

లోకుత్తరే సదా సబ్బా, సహ కామసుభే విసుం.

౩౮. కరుణాముదితా నానా, రూపే పఞ్చమవజ్జితే;

కదాచి కామే కుసలే, క్రియచిత్తే సహేతుకే.

౩౯. తిహేతుకేసు చిత్తేసు, పఞ్ఞా సబ్బత్థ లబ్భతి;

ఏతే సద్ధాదయో ధమ్మా, పఞ్చవీసతి సోభనా.

౪౦. ఇస్సామచ్ఛేరకుక్కుచ్చవిరతీకరుణాదయో;

నానా కదాచి మానో చ, థినమిద్ధం తథా సహ.

౪౧. సత్త సబ్బత్థ జాయన్తి, ఛ తు ధమ్మా యథారహం;

చుద్దసాకుసలేస్వేవ, సోభనేస్వేవ సోభనా.

౪౨. ద్వేపఞ్ఞాస పనిచ్చేవం, ధమ్మే సఙ్గయ్హ మానసే;

లబ్భమానే విభావేయ్య, పచ్చేకమ్పి విచక్ఖణో.

౪౩. సోభనఞ్ఞసమానా చ, పఠమే విరతీ వినా;

దుతియాదీసు తక్కఞ్చ, విచారం తతియాదిసు.

౪౪. చతుత్థాదీసు పీతిఞ్చ, కరుణాదిఞ్చ పఞ్చమే;

హిత్వా నేవ వియోజేయ్య, సఙ్ఖిపిత్వాన పఞ్చధా.

౪౫. పఞ్చతింస చతుత్తింస, తేత్తింస చ యథాక్కమం;

ద్వత్తింస తింస ఏవాథ, జాయన్తీతి మహగ్గతే.

౪౬. గహేత్వా విరతీ సబ్బా, హిత్వాన కరుణాదయో;

పఠమే దుతియాదిమ్హి, వితక్కాదిం వినా తథా.

౪౭. పఞ్చధావ గణేయ్యేవం, ఛత్తింసా చ యథాక్కమం;

పఞ్చతింస చతుత్తింస, తేత్తింసద్వయముత్తరే.

౪౮. సోభనఞ్ఞసమానా చ, కామేసు కుసలే క్రియే;

హిత్వా విరతియో పాకే, విరతీకరుణాదయో.

౪౯. ఞాణయుత్తే సోమనస్సే, వియుత్తే ఞాణవజ్జితా;

ఉపేక్ఖకే పీతిహీనా, విప్పయుత్తే ద్వయం వినా.

౫౦. చతుధా తివిధేస్వేవం, విగణేయ్య ద్వయం ద్వయం;

న సన్తుపేక్ఖాసహితే, కరుణాదీతి కేచన.

౫౧. అట్ఠతింస సత్తతింసద్వయం ఛత్తింసకం సుభే;

పఞ్చతింస చతుత్తింసద్వయం తేత్తింసకం క్రియే.

౫౨. తేత్తింస పాకే ద్వత్తింసద్వయేకతింసకం భవే;

సహేతుకామావచరపుఞ్ఞపాకక్రియామనే.

౫౩. మోహాదయో సమానా చ, పఠమే లోభదిట్ఠియా;

తతియే లోభమానేన, జాయన్తేకూనవీసతి.

౫౪. అట్ఠారస పీతిహీనా, పఞ్చమే సత్తమే తథా;

నవమే దోసకుక్కుచ్చమచ్ఛరిస్సాహి వీసతి.

౫౫. పఠమాదీసు వుత్తావ, దుతియాదీసు జాయరే;

థినమిద్ధేనేకవీస, వీస ద్వేవీసతిక్కమా.

౫౬. ఛన్దపీతిం వినుద్ధచ్చే, కఙ్ఖితే నిచ్ఛయం వినా;

పఞ్చదసేవ కఙ్ఖాయ, అసుభేసు విభావయే.

౫౭. సితే సమానా నిచ్ఛన్దా, ద్వాదసేకాదసేవ తు;

పీతిం హిత్వాన వోట్ఠబ్బే, వీరియం సుఖతీరణే.

౫౮. ద్వయం హిత్వా మనోధాతు, ఉపేక్ఖాతీరణే దస;

సత్త సాధారణా ఏవ, పఞ్చవిఞ్ఞాణసమ్భవా.

౫౯. ఇతి చేతసి సమ్భూతా,

ద్వేపఞ్ఞాస యథారహం;

ఞేయ్యా చేతసికా ధమ్మా,

చేతోభేదప్పభేదినో.

౬౦. సుఞ్ఞతఞ్చానిమిత్తఞ్చ, తథాపణిహితన్తి చ;

తివిధాకారమీరేన్తి, నిబ్బానమమతం బుధా.

౬౧. యం ఆరబ్భ పవత్తన్తం, తత్థానుత్తరమానసం;

సుఞ్ఞతాదివిమోక్ఖోతి, నామమాలమ్బతో లభే.

౬౨. సోపాదిసేసనిబ్బానధాతు చేవ తథాపరా;

అనుపాదిసేసా చాతి, దువిధా పరియాయతో.

౬౩. తదేతం వాననిక్ఖన్తమచ్చన్తం సన్తిలక్ఖణం;

అస్సాసకరణరసం, ఖేమభావేన గయ్హతి.

౬౪. తం నామేతీతి నిబ్బానం, నమన్తీతి తతోపరే;

తేపఞ్ఞాసాతి నామాని, చతుపఞ్ఞాస సబ్బథా.

౬౫. చిత్తచేతసికయోజనానయం,

చిత్తముత్తమమిదం పకాసితం;

సాధు చేతసి నిధాయ పణ్డితా,

సాధు సాసనధరా భవన్తి తే.

౬౬. బుద్ధప్పవత్తమవగాహితబోధిఞాణ-

మిచ్చాభిధమ్మమవగాహితసబ్బధమ్మం;

ఓగయ్హ నామగతరాసిమసేసయిత్వా,

సఙ్గయ్హ సబ్బమిధ యోజితమాదరేన.

ఇతి నామరూపపరిచ్ఛేదే నామత్తయవిభాగో నామ

పఠమో పరిచ్ఛేదో.