౯. నవమో పరిచ్ఛేదో

పుఞ్ఞవిపాకపచ్చయనిద్దేసో

౫౬౦. బాత్తింస పాకచిత్తాని, లోకికానేవ యాని హి;

ఏతేసం పాకచిత్తానం, పటిసన్ధిపవత్తిసు.

౫౬౧. పుఞ్ఞాపుఞ్ఞాదిసఙ్ఖారా, యథా యేసఞ్చ పచ్చయా;

భవాదీసు తథా తేపి, విఞ్ఞాతబ్బా విభావినా.

౫౬౨. తయో భవా చతస్సో చ, యోనియో గతిపఞ్చకం;

విఞ్ఞాణట్ఠితియో సత్త, సత్తావాసా నవేరితా.

౫౬౩. కామే పుఞ్ఞాభిసఙ్ఖార-సఞ్ఞితా అట్ఠ చేతనా;

నవన్నం పాకచిత్తానం, కామే సుగతియం పన.

౫౬౪. నానాక్ఖణికకమ్మూప-నిస్సయపచ్చయేహి చ;

ద్వేధా హి పచ్చయా తేసం, భవన్తి పటిసన్ధియం.

౫౬౫. ఉపేక్ఖాసహితాహేతు-మనోవిఞ్ఞాణధాతుయా;

వినా పరిత్తపాకానం, హోన్తి ద్వేధా పవత్తియం.

౫౬౬. తాయేవ చేతనా రూప-భవే ద్వేధావ పచ్చయా;

పఞ్చన్నం పాకచిత్తానం, భవన్తి హి పవత్తియం.

౫౬౭. అట్ఠన్నం తు పరిత్తానం, కామే దుగ్గతియం తథా;

పవత్తే పచ్చయా హోన్తి, న హోన్తి పటిసన్ధియం.

౫౬౮. హోన్తి వుత్తప్పకారావ, కామే సుగతియం తథా;

సోళసన్నం విపాకానం, పవత్తే పటిసన్ధియం.

౫౬౯. రూపే పుఞ్ఞాభిసఙ్ఖారా, రూపావచరభూమియం;

పఞ్చన్నం పాకచిత్తానం, పచ్చయా పటిసన్ధియం.

౫౭౦. హోన్తిమాపుఞ్ఞసఙ్ఖారా, కామే దుగ్గతియం ద్విధా;

విఞ్ఞాణస్స పనేకస్స, పచ్చయా పటిసన్ధియం.

౫౭౧. ఛన్నం పన పవత్తేవ, హోన్తి నో పటిసన్ధియం;

సత్తన్నమ్పి భవన్తేవ, పవత్తే పటిసన్ధియం.

౫౭౨. కామే సుగతియం తేసం, సత్తన్నమ్పి తథేవ చ;

పవత్తే పచ్చయా హోన్తి, న హోన్తి పటిసన్ధియం.

౫౭౩. విఞ్ఞాణానం చతున్నమ్పి, తేసం రూపభవే తథా;

పవత్తే పచ్చయా హోన్తి, న హోన్తి పటిసన్ధియం.

౫౭౪. సో చ కామభవేనిట్ఠ-రూపాదిఉపలద్ధియం;

అనిట్ఠరూపాదయో పన, బ్రహ్మలోకే న విజ్జరే.

౫౭౫. తథేవానేఞ్జసఙ్ఖారో, అరూపావచరభూమియం;

చతున్నం పాకచిత్తానం, పవత్తే పటిసన్ధియం.

౫౭౬. ఏవం తావ భవేస్వేతే, పటిసన్ధిపవత్తిసు;

యథా చ పచ్చయా హోన్తి, తథా ఞేయ్యా విభావినా.

౫౭౭. ఏసేవ చ నయో ఞేయ్యో, యోనిఆదీసు తత్రిదం;

ఆదితో పన పట్ఠాయ, ముఖమత్తనిదస్సనం.

౫౭౮. అవిసేసేన పుఞ్ఞాభి-సఙ్ఖారో ద్విభవేసుపి;

దత్వాన పటిసన్ధిం తు, సబ్బపాకం జనేతి సో.

౫౭౯. తథా చతూసు విఞ్ఞేయ్యో, అణ్డజాదీసు యోనిసు;

బహుదేవమనుస్సానం, గతీసు ద్వీసు ఏవ చ.

౫౮౦. తథా నానత్తకాయాది-విఞ్ఞాణానం ఠితీసుపి;

తథా వుత్తప్పకారస్మిం, సత్తావాసే చతుబ్బిధే.

౫౮౧. ఏవం పుఞ్ఞాభిసఙ్ఖారో, భవాదీసు యథారహం;

ఏకవీసతిపాకానం, పచ్చయో హోతి చ ద్విధా.

౫౮౨. కామే అపుఞ్ఞసఙ్ఖారో, భవే చతూసు యోనిసు;

తీసు గతీసు ఏకిస్సా, విఞ్ఞాణట్ఠితియాపి చ.

౫౮౩. సత్తావాసే పనేకస్మిం,

ఉహోతి సో పచ్చయో ద్విధా;

సత్తన్నం పాకచిత్తానం,

పవత్తే పటిసన్ధియం.

౫౮౪. తథేవానేఞ్జసఙ్ఖారో, ఏకారూపభవే పున;

ఏకిస్సా యోనియా చేవ, ఏకిస్సా గతియాపి చ.

౫౮౫. తీసు చిత్తట్ఠితీస్వేవ, సత్తావాసే చతుబ్బిధే;

చతున్నం పాకచిత్తానం, ద్వేధా సో హోతి పచ్చయో.

౫౮౬. పటిసన్ధిపవత్తీనం, వసేనేవ భవాదిసు;

విజానితబ్బా సఙ్ఖారా, యథా యేసఞ్చ పచ్చయా.

౫౮౭. న రూపారూపధమ్మానం, సఙ్కన్తి పన విజ్జతి;

సఙ్కన్తిభావే అసతి, పటిసన్ధి కథం సియా.

౫౮౮. నత్థి చిత్తస్స సఙ్కన్తి, అతీతభవతో ఇధ;

తతో హేతుం వినా తస్స, పాతుభావో న విజ్జతి.

౫౮౯. సులద్ధపచ్చయం రూపా-రూపమత్తం తు జాయతి;

ఉప్పజ్జమానమేవం తు, లభిత్వా పచ్చయం పన.

౫౯౦. భవన్తరముపేతీతి, సమఞ్ఞాయ పవుచ్చతి;

న చ సత్తో న చ జీవో, న అత్తా వాపి విజ్జతి.

౫౯౧. తయిదం పాకటం కత్వా, పటిసన్ధిక్కమం పన;

దస్సయిస్సామహం సాధు, నిబోధథ సుదుబ్బుధం.

౫౯౨. అతీతస్మిం భవే తస్స, ఆసన్నమరణస్స హి;

హరితం తాలపణ్ణంవ, పక్ఖిత్తం ఆతపే పన.

౫౯౩. సుస్సమానే సరీరస్మిం, నట్ఠే చక్ఖున్ద్రియాదికే;

హదయవత్థుమత్తస్మిం, ఠితే కాయప్పసాదికే.

౫౯౪. వత్థుసన్నిస్సితం చిత్తం, హోతి తస్మిం ఖణేపి చ;

పుబ్బానుసేవితం కమ్మం, పుఞ్ఞం వాపుఞ్ఞమేవ వా.

౫౯౫. కమ్మం కమ్మనిమిత్తం వా, ఆలమ్బిత్వా పవత్తతి;

ఏవం పవత్తమానం తం, విఞ్ఞాణం లద్ధపచ్చయం.

౫౯౬. అవిజ్జాయ పటిచ్ఛన్నా-దీనవే విసయే పన;

తణ్హా నమేతి సఙ్ఖారా, ఖిపన్తి సహజా పన.

౫౯౭. న మీయమానం తణ్హాయ, తం సన్తతివసా పన;

ఓరిమా పన తీరమ్హా, ఆలమ్బిత్వాన రజ్జుకం.

౫౯౮. మాతికాతిక్కమోవేతం, పురిమం జహతి నిస్సయం;

అపరం కమ్మసమ్భూతం, లమ్బిత్వా వాపి నిస్సయం.

౫౯౯. తం పనారమ్మణాదీహి, పచ్చయేహి పవత్తతి;

పురిమం చవనం ఏత్థ, పచ్ఛిమం పటిసన్ధి తు.

౬౦౦. తదేతం నాపి పురిమా, భవతోపి ఇధాగతం;

కమ్మాదిఞ్చ వినా హేతుం, పాతుభూతం న చేవ తం.

౬౦౧. ఏత్థ చేతస్స చిత్తస్స, పురిమా భవతో పన;

ఇధానాగమనేతీత-భవహేతూహి సమ్భవే.

౬౦౨. పటిఘోసదీపముద్దాదీ, భవన్తేత్థ నిదస్సనా;

యథా ఆగన్త్వా అఞ్ఞత్ర, హోన్తి సద్దాదిహేతుకా.

౬౦౩. ఏవమేవ చ విఞ్ఞాణం, వేదితబ్బం విభావినా;

సన్తానబన్ధతో నత్థి, ఏకతా వాపి నానతా.

౬౦౪. సతి సన్తానబన్ధే తు, ఏకన్తేనేకతా సియా;

ఖీరతో దధిసమ్భూతం, న భవేయ్య కదాచిపి.

౬౦౫. అథాపి పన ఏకన్త-నానతా సా భవేయ్య చే;

ఖీరసామీ నరో నేవ, దధిసామీ భవేయ్య సో.

౬౦౬. తస్మా ఏత్థ పనేకన్త-ఏకతానానతాపి వా;

న చేవ ఉపగన్తబ్బా, విఞ్ఞునా సమయఞ్ఞునా.

౬౦౭. నను ఏవమసఙ్కన్తి-పాతుభావే తస్స సతి;

యే ఇమస్మిం మనుస్సత్త-భావే ఖన్ధాభిసమ్భవా.

౬౦౮. తేసం ఇధ నిరుద్ధత్తా, కమ్మస్స ఫలహేతునో;

పరత్థాగమతో చేవ, ఇధ తస్స కతస్స హి.

౬౦౯. అఞ్ఞస్స అఞ్ఞతో చేవ, కమ్మతో తం ఫలం సియా;

తస్మా న సున్దరం ఏతం, విధానం సబ్బమేవ చ.

ఏత్థాహ –

౬౧౦. సన్తానే యం ఫలం ఏతం, నాఞ్ఞస్స న చ అఞ్ఞతో;

బీజానం అభిసఙ్ఖారో, ఏతస్సత్థస్స సాధకో.

౬౧౧. ఏకస్మిం పన సన్తానే, వత్తమానం ఫలం పన;

అఞ్ఞస్సాతిపి వా నేవ, అఞ్ఞతో వా న హోతి తం.

౬౧౨. బీజానం అభిసఙ్ఖారా, ఏతస్సత్థస్స సాధకో;

బీజానం అభిసఙ్ఖారే, కతే తు మధుఆదినా.

౬౧౩. తస్స బీజస్స సన్తానే, పఠమం లద్ధపచ్చయో;

మధురో ఫలసో తస్స, హోతి కాలన్తరే పన.

౬౧౪. న హి తాని హి బీజాని, అభిసఙ్ఖరణమ్పి వా;

పాపుణన్తి ఫలట్ఠానం, ఏవం ఞేయ్యమిదమ్పి చ.

౬౧౫. బాలకాలే పయుత్తేన, విజ్జాసిప్పోసధాదినా;

దీపేతబ్బో అయం వుద్ధ-కాలస్మిం ఫలదాయినా.

౬౧౬. ఏవం సన్తేపి తం కమ్మం, విజ్జమానమ్పి వా పన;

ఫలస్స పచ్చయో హోతి, అథ వావిజ్జమానకం.

౬౧౭. విజ్జమానం సచే హోతి, తప్పవత్తిక్ఖణే పన;

భవితబ్బం విపాకేన, సద్ధిమేవ చ హేతునా.

౬౧౮. అథ వావిజ్జమానం తం, నిరుద్ధం పచ్చయో భవే;

పవత్తిక్ఖణతో పుబ్బే, పచ్ఛా నిచ్చఫలం సియా.

వుచ్చతే –

౬౧౯. కటత్తా పచ్చయో కమ్మం, తస్మా నిచ్చఫలం న చ;

పాటిభోగాదికం కమ్మం, వేదితబ్బం నిదస్సనం.

౬౨౦. కటత్తాయేవ తం కమ్మం, ఫలస్స పన పచ్చయో;

న చస్స విజ్జమానత్తం, తస్స వావిజ్జమానతా.

౬౨౧. అభిధమ్మావతారోయం, పరమత్థపకాసనో;

సోతబ్బో పన సోతూనం, పీతిబుద్ధివివడ్ఢనో.

ఇతి అభిధమ్మావతారే పుఞ్ఞవిపాకపచ్చయనిద్దేసో నామ

నవమో పరిచ్ఛేదో.