౧౧. ఏకాదసమో పరిచ్ఛేదో

నిబ్బాననిద్దేసవణ్ణనా

౭౬౯. భవాభవం విననతోతి ఖుద్దకం, మహన్తం భవం సిబ్బనతో. సబ్బూపధిపటినిస్సగ్గోతి సబ్బేహి సఙ్ఖారూపధికిలేసూపధిఖన్ధూపధీహి పటినిస్సజ్జనం. అచ్చుతిరసం అచుతిసమ్పత్తికం. నిబ్బానం పుట్ఠేనాతి సుగతేన నిబ్బానం పుట్ఠేన సారిపుత్తత్థేరేన. ఉభిన్నం సుత్తానన్తి ధమ్మసేనాపతివుత్తానం ద్విన్నం సుత్తానన్తి అత్థో. ఖయస్స ఉపనిస్సయత్తాతి ఖయస్స బలవకారణత్తా. పుథూనం ధమ్మానం అప్పమత్తక్ఖణే రాగాదిక్ఖయమత్తం నిబ్బానం భవేయ్య. సబ్బే బాలపుథుజ్జనా సమధిగతనిబ్బానా సచ్ఛికతనిరోధా భవేయ్యుం. కిఞ్చ భియ్యో కిం ఉత్తరి కారణఞ్చ అత్థీతి అత్థో. రాగాదీనం సఙ్ఖతత్తా తేసం సఙ్ఖతానం నిబ్బానం సఙ్ఖతలక్ఖణం భవేయ్య. కిం పనేత్థాతి ఏతేసు ఖణేసు కిం పన ఖణే త్వం వదేసి. ఖీణేస్వేవాతి భవాదీసు ఖీణేసు ఏవ. నిరుత్తరోతి నిప్ఫన్నహారో.

౭౭౧. అస్సద్ధోతి బాహిరసద్ధాయ విరహితో. వన్తాసోతి వన్తా వమితా ఆసా తణ్హా యేనాతి వన్తాసో.

నిస్సరణియాతి నిస్సరణే నియుత్తా. యదిదం నేక్ఖమ్మం యం ఇదం కామానం ఏతం నిస్సరణం నిరోధో, తస్స కిఞ్చిభూతస్స సఙ్ఖతస్స పటిచ్చసముప్పన్నధమ్మజాతస్స నిరోధో నిస్సరణన్తి, ఏవం ఇమినా పకారేన వుత్తస్స తస్స నిస్సరణనామకస్స అభావప్పత్తిదోసతో నిస్సరణనామకానం పఠమజ్ఝానఆకాసానఞ్చాయతనానమ్పి అభావో భవేయ్య. అత్థి నిస్సరణన్తి అత్థి నిబ్బానం. ఉప్పాదాదీనన్తి ఉప్పాదట్ఠితిభఙ్గానం. పపఞ్చాభావతోతి తణ్హామానదిట్ఠీనం అభావతో.

౭౭౨. అపలోకితన్తి అదస్సనధమ్మం.

౭౭౪. అబ్యాపజ్ఝన్తి నిదుక్ఖం. అక్ఖరన్తి అఖరం.

౭౭౭. సద్ధాబుద్ధికరం తథాగతమతే జినవచనే సమ్మోహవిద్ధంసనం పఞ్ఞాసమ్భవం పఞ్ఞాకారణం సమ్పసాదనకరం. అత్థబ్యఞ్జనసాలినన్తి అత్థబ్యఞ్జనసారవన్తం సుమధురం సారఞ్ఞు జినసాసనసారఞ్ఞూ విమ్హాపనం అచ్ఛేరకరం ఇమం ఏవం వుత్తప్పకారం అభిధమ్మావతారం యో జానాతి, సో జనో గమ్భీరే నిపుణే నిపుణఞాణగోచరే అభిధమ్మపిటకే పదం నిట్ఠం ఉత్తమసన్నిట్ఠానం యాతి పాపుణాతి.

ఇతి అభిధమ్మావతారటీకాయ

నిబ్బాననిద్దేసవణ్ణనా నిట్ఠితా.

ఏకాదసమో పరిచ్ఛేదో.