నమో తస్స భగవతో అరహతో సమ్మాసమ్బుద్ధస్స
అభిధమ్మత్థసఙ్గహో
గన్థారమ్భకథా
౧. సమ్మాసమ్బుద్ధమతులం, ససద్ధమ్మగణుత్తమం.
అభివాదియ భాసిస్సం, అభిధమ్మత్థసఙ్గహం.
చతుపరమత్థధమ్మో
౨. తత్థ వుత్తాభిధమ్మత్థా, చతుధా పరమత్థతో.
చిత్తం చేతసికం రూపం, నిబ్బానమితి సబ్బథా.
౧. చిత్తపరిచ్ఛేదో
భూమిభేదచిత్తం
౩. తత్థ చిత్తం తావ చతుబ్బిధం హోతి కామావచరం రూపావచరం అరూపావచరం లోకుత్తరఞ్చేతి.
అకుసలచిత్తం
౪. తత్థ కతమం కామావచరం? సోమనస్ససహగతం దిట్ఠిగతసమ్పయుత్తం అసఙ్ఖారికమేకం, ససఙ్ఖారికమేకం, సోమనస్ససహగతం దిట్ఠిగతవిప్పయుత్తం అసఙ్ఖారికమేకం, ససఙ్ఖారికమేకం, ఉపేక్ఖాసహగతం దిట్ఠిగతసమ్పయుత్తం అసఙ్ఖారికమేకం, ససఙ్ఖారికమేకం, ఉపేక్ఖాసహగతం దిట్ఠిగతవిప్పయుత్తం అసఙ్ఖారికమేకం, ససఙ్ఖారికమేకన్తి ఇమాని అట్ఠపి లోభసహగతచిత్తాని నామ.
౫. దోమనస్ససహగతం పటిఘసమ్పయుత్తం అసఙ్ఖారికమేకం, ససఙ్ఖారికమేకన్తి ఇమాని ద్వేపి పటిఘసమ్పయుత్తచిత్తాని నామ.
౬. ఉపేక్ఖాసహగతం విచికిచ్ఛాసమ్పయుత్తమేకం, ఉపేక్ఖాసహగతం ఉద్ధచ్చసమ్పయుత్తమేకన్తి ఇమాని ద్వేపి మోమూహచిత్తాని నామ.
౭. ఇచ్చేవం సబ్బథాపి ద్వాదసాకుసలచిత్తాని సమత్తాని.
౮. అట్ఠధా లోభమూలాని, దోసమూలాని చ ద్విధా.
మోహమూలాని చ ద్వేతి, ద్వాదసాకుసలా సియుం.
అహేతుకచిత్తం
౯. ఉపేక్ఖాసహగతం చక్ఖువిఞ్ఞాణం, తథా సోతవిఞ్ఞాణం, ఘానవిఞ్ఞాణం, జివ్హావిఞ్ఞాణం, దుక్ఖసహగతం కాయవిఞ్ఞాణం, ఉపేక్ఖాసహగతం సమ్పటిచ్ఛనచిత్తం, ఉపేక్ఖాసహగతం సన్తీరణచిత్తఞ్చేతి ఇమాని సత్తపి అకుసలవిపాకచిత్తాని నామ.
౧౦. ఉపేక్ఖాసహగతం కుసలవిపాకం చక్ఖువిఞ్ఞాణం, తథా సోతవిఞ్ఞాణం, ఘానవిఞ్ఞాణం, జివ్హావిఞ్ఞాణం, సుఖసహగతం కాయవిఞ్ఞాణం, ఉపేక్ఖాసహగతం సమ్పటిచ్ఛనచిత్తం, సోమనస్ససహగతం సన్తీరణచిత్తం, ఉపేక్ఖాసహగతం సన్తీరణచిత్తఞ్చేతి ఇమాని అట్ఠపి కుసలవిపాకాహేతుకచిత్తాని నామ.
౧౧. ఉపేక్ఖాసహగతం పఞ్చద్వారావజ్జనచిత్తం, తథా మనోద్వారావజ్జనచిత్తం, సోమనస్ససహగతం హసితుప్పాదచిత్తఞ్చేతి ఇమాని తీణిపి అహేతుకకిరియచిత్తాని నామ.
౧౨. ఇచ్చేవ సబ్బథాపి అట్ఠారసాహేతుకచిత్తాని సమత్తాని.
౧౩. సత్తాకుసలపాకాని, పుఞ్ఞపాకాని అట్ఠధా.
క్రియచిత్తాని తీణీతి, అట్ఠారస అహేతుకా.
సోభనచిత్తం
౧౪. పాపాహేతుకముత్తాని, సోభనానీతి వుచ్చరే.
ఏకూనసట్ఠి చిత్తాని, అథేకనవుతీపి వా.
కామావచరసోభనచిత్తం
౧౫. సోమనస్ససహగతం ఞాణసమ్పయుత్తం అసఙ్ఖారికమేకం, ససఙ్ఖారికమేకం, సోమనస్ససహగతం ఞాణవిప్పయుత్తం అసఙ్ఖారికమేకం, ససఙ్ఖారికమేకం, ఉపేక్ఖాసహగతం ఞాణసమ్పయుత్తం అసఙ్ఖారికమేకం, ససఙ్ఖారికమేకం. ఉపేక్ఖాసహగతం ఞాణవిప్పయుత్తం అసఙ్ఖారికమేకం, ససఙ్ఖారికమేకన్తి ఇమాని అట్ఠపి కామావచరకుసలచిత్తాని నామ.
౧౬. సోమనస్ససహగతం ఞాణసమ్పయుత్తం అసఙ్ఖారికమేకం, ససఙ్ఖారికమేకం, సోమనస్ససహగతం ఞాణవిప్పయుత్తం అసఙ్ఖారికమేకం, ససఙ్ఖారికమేకం, ఉపేక్ఖాసహగతం ఞాణసమ్పయుత్తం అసఙ్ఖారికమేకం, ససఙ్ఖారికమేకం, ఉపేక్ఖాసహగతం ఞాణవిప్పయుత్తం అసఙ్ఖారికమేకం, ససఙ్ఖారికమేకన్తి ఇమాని అట్ఠపి సహేతుకకామావచరవిపాకచిత్తాని నామ.
౧౭. సోమస్ససహగతం ఞాణసమ్పయుత్తం అసఙ్ఖారికమేకం, ససఙ్ఖారికమేకం, సోమనస్ససహగతం ఞాణవిప్పయుత్తం అసఙ్ఖారికమేకం, ససఙ్ఖారికమేకం, ఉపేక్ఖాసహగతం ఞాణసమ్పయుత్తం అసఙ్ఖారికమేకం, ససఙ్ఖారికమేకం, ఉపేక్ఖాసహగతం ఞాణవిప్పయుత్తం అసఙ్ఖారికమేకం, ససఙ్ఖారికమేకన్తి ఇమాని అట్ఠపి సహేతుకకామావచరకిరియచిత్తాని నామ.
౧౮. ఇచ్చేవం సబ్బథాపి చతువీసతి సహేతుకకామావచరకుసలవిపాకకిరియచిత్తాని సమత్తాని.
౧౯. వేదనాఞాణసఙ్ఖారభేదేన చతువీసతి.
సహేతుకామావచరపుఞ్ఞపాకక్రియా మతా.
౨౦. కామే తేవీస పాకాని, పుఞ్ఞాపుఞ్ఞాని వీసతి.
ఏకాదస క్రియా చేతి, చతుపఞ్ఞాస సబ్బథా.
రూపావచరచిత్తం
౨౧. వితక్కవిచారపీతిసుఖేకగ్గతాసహితం పఠమజ్ఝానకుసలచిత్తం, విచారపీతిసుఖేకగ్గతాసహితం దుతియజ్ఝానకుసలచిత్తం, పీతిసుఖేకగ్గతాసహితం తతియజ్ఝానకుసలచిత్తం, సుఖేకగ్గతాసహితం చతుత్థజ్ఝానకుసలచిత్తం, ఉపేక్ఖేకగ్గతాసహితం పఞ్చమజ్ఝానకుసలచిత్తఞ్చేతి ఇమాని పఞ్చపి రూపావచరకుసలచిత్తాని నామ.
౨౨. వితక్కవిచారపీతిసుఖేకగ్గతాసహితం పఠమజ్ఝానవిపాకచిత్తం, విచారపీతిసుఖేకగ్గతాసహితం దుతియజ్ఝానవిపాకచిత్తం, పీతిసుఖేకగ్గతాసహితం తతియజ్ఝానవిపాకచిత్తం, సుఖేకగ్గతాసహితం చతుత్థజ్ఝానవిపాకచిత్తం, ఉపేక్ఖేకగ్గతాసహితం పఞ్చమజ్ఝానవిపాకచిత్తఞ్చేతి ఇమాని పఞ్చపి రూపావచరవిపాకచిత్తాని నామ.
౨౩. వితక్కవిచారపీతిసుఖేకగ్గతాసహితం పఠమజ్ఝానకిరియచిత్తం, విచారపీతిసుఖేకగ్గతాసహితం దుతియజ్ఝానకిరియచిత్తం, పీతిసుఖేకగ్గతాసహితం తతియజ్ఝానకిరియచిత్తం, సుఖేకగ్గతాసహితం చతుత్థజ్ఝానకిరియచిత్తం, ఉపేక్ఖేకగ్గతాసహితం పఞ్చమజ్ఝానకిరియచిత్తఞ్చేతి ఇమాని పఞ్చపి రూపావచరకిరియచిత్తాని నామ.
౨౪. ఇచ్చేవం సబ్బథాపి పన్నరస రూపావచరకుసలవిపాకకిరియచిత్తాని సమత్తాని.
౨౫. పఞ్చధా ఝానభేదేన, రూపావచరమానసం.
పుఞ్ఞపాకక్రియాభేదా, తం పఞ్చదసధా భవే.
అరూపావచరచిత్తం
౨౬. ఆకాసానఞ్చాయతనకుసలచిత్తం, విఞ్ఞాణఞ్చాయతనకుసలచిత్తం, ఆకిఞ్చఞ్ఞాయతనకుసలచిత్తం, నేవసఞ్ఞానాసఞ్ఞాయతనకుసలచిత్తఞ్చేతి ఇమాని చత్తారిపి అరూపావచరకుసలచిత్తాని నామ.
౨౭. ఆకాసానఞ్చాయతనవిపాకచిత్తం, విఞ్ఞాణఞ్చాయతనవిపాకచిత్తం, ఆకిఞ్చఞ్ఞాయతనవిపాకచిత్తం, నేవసఞ్ఞానాసఞ్ఞాయతనవిపాకచిత్తఞ్చేతి ఇమాని చత్తారిపి అరూపావచరవిపాకచిత్తాని నామ.
౨౮. ఆకాసానఞ్చాయతనకిరియచిత్తం, విఞ్ఞాణఞ్చాయతనకిరియచిత్తం, ఆకిఞ్చఞ్ఞాయతనకిరియచిత్తం, నేవసఞ్ఞానాసఞ్ఞాయతనకిరియచిత్తఞ్చేతి ఇమాని చత్తారిపి అరూపావచరకిరియచిత్తాని నామ.
౨౯. ఇచ్చేవం సబ్బథాపి ద్వాదస అరూపావచరకుసలవిపాకకిరియచిత్తాని సమత్తాని.
౩౦. ఆలమ్బణప్పభేదేన, చతుధారుప్పమానసం.
పుఞ్ఞపాకక్రియాభేదా, పున ద్వాదసధా ఠితం.
లోకుత్తరచిత్తం
౩౧. సోతాపత్తిమగ్గచిత్తం, సకదాగామిమగ్గచిత్తం, అనాగామిమగ్గచిత్తం, అరహత్తమగ్గచిత్తఞ్చేతి ఇమాని చత్తారిపి లోకుత్తరకుసలచిత్తాని నామ.
౩౨. సోతాపత్తిఫలచిత్తం, సకదాగామిఫలచిత్తం, అనాగామిఫలచిత్తం, అరహత్తఫలచిత్తఞ్చేతి ఇమాని చత్తారిపి లోకుత్తరవిపాకచిత్తాని నామ.
౩౩. ఇచ్చేవం సబ్బథాపి అట్ఠ లోకుత్తరకుసలవిపాకచిత్తాని సమత్తాని.
౩౪. చతుమగ్గప్పభేదేన, చతుధా కుసలం తథా.
పాకం తస్స ఫలత్తాతి, అట్ఠధానుత్తరం మతం.
చిత్తగణనసఙ్గహో
౩౫. ద్వాదసాకుసలానేవం, కుసలానేకవీసతి.
ఛత్తింసేవ విపాకాని, క్రియచిత్తాని వీసతి.
౩౬. చతుపఞ్ఞాసధా కామే, రూపే పన్నరసీరయే.
చిత్తాని ద్వాదసారుప్పే, అట్ఠధానుత్తరే తథా.
౩౭. ఇత్థమేకూననవుతిపభేదం పన మానసం.
ఏకవీససతం వాథ, విభజన్తి విచక్ఖణా.
విత్థారగణనా
౩౮. కథమేకూననవుతివిధం చిత్తం ఏకవీససతం హోతి? వితక్కవిచారపీతిసుఖేకగ్గతాసహితం పఠమజ్ఝానసోతాపత్తిమగ్గచిత్తం, విచారపీతిసుఖేకగ్గతాసహితం దుతియజ్ఝానసోతాపత్తిమగ్గచిత్తం, పీతిసుఖేకగ్గతాసహితం తతియజ్ఝానసోతాపత్తిమగ్గచిత్తం, సుఖేకగ్గతాసహితం చతుత్థజ్ఝానసోతాపత్తిమగ్గచిత్తం, ఉపేక్ఖేకగ్గతాసహితం పఞ్చమజ్ఝానసోతాపత్తిమగ్గచిత్తఞ్చేతి ఇమాని పఞ్చపి సోతాపత్తిమగ్గచిత్తాని నామ.
౩౯. తథా సకదాగామిమగ్గఅనాగామిమగ్గఅరహత్తమగ్గచిత్తఞ్చేతి సమవీసతి మగ్గచిత్తాని.
౪౦. తథా ఫలచిత్తాని చేతి సమచత్తాలీస లోకుత్తరచిత్తాని భవన్తీతి.
౪౧. ఝానఙ్గయోగభేదేన, కత్వేకేకన్తు పఞ్చధా.
వుచ్చతానుత్తరం చిత్తం, చత్తాలీసవిధన్తి చ.
౪౨. యథా చ రూపావచరం, గయ్హతానుత్తరం తథా.
పఠమాదిఝానభేదే, ఆరుప్పఞ్చాపి పఞ్చమే.
ఏకాదసవిధం తస్మా, పఠమాదికమీరితం;
ఝానమేకేకమన్తే తు, తేవీసతివిధం భవే.
౪౩. సత్తతింసవిధం పుఞ్ఞం, ద్విపఞ్ఞాసవిధం తథా.
పాకమిచ్చాహు చిత్తాని, ఏకవీససతం బుధా.
ఇతి అభిధమ్మత్థసఙ్గహే చిత్తసఙ్గహవిభాగో నామ
పఠమో పరిచ్ఛేదో.
౨. చేతసికపరిచ్ఛేదో
సమ్పయోగలక్ఖణం
౧. ఏకుప్పాదనిరోధా చ, ఏకాలమ్బణవత్థుకా.
చేతోయుత్తా ద్విపఞ్ఞాస, ధమ్మా చేతసికా మతా.
అఞ్ఞసమానచేతసికం
౨. కథం? ఫస్సో వేదనా సఞ్ఞా చేతనా ఏకగ్గతా జీవితిన్ద్రియం మనసికారో చేతి సత్తిమే చేతసికా సబ్బచిత్తసాధారణా నామ.
౩. వితక్కో విచారో అధిమోక్ఖో వీరియం పీతి ఛన్దో చాతి ఛ ఇమే చేతసికా పకిణ్ణకా నామ.
౪. ఏవమేతే తేరస చేతసికా అఞ్ఞసమానాతి వేదితబ్బా.
అకుసలచేతసికం
౫. మోహో అహిరికం అనోత్తప్పం ఉద్ధచ్చం లోభో దిట్ఠి మానో దోసో ఇస్సా మచ్ఛరియం కుక్కుచ్చం థినం మిద్ధం విచికిచ్ఛా చేతి చుద్దసిమే చేతసికా అకుసలా నామ.
సోభనచేతసికం
౬. సద్ధా సతి హిరీ ఓత్తప్పం అలోభో అదోసో తత్రమజ్ఝత్తతా కాయపస్సద్ధి చిత్తపస్సద్ధి కాయలహుతా చిత్తలహుతా కాయముదుతా చిత్తముదుతా కాయకమ్మఞ్ఞతా చిత్తకమ్మఞ్ఞతా కాయపాగుఞ్ఞతా చిత్తపాగుఞ్ఞతా కాయుజుకతా చిత్తుజుకతా చేతి ఏకూనవీసతిమే చేతసికా సోభనసాధారణా నామ.
౭. సమ్మావాచా సమ్మాకమ్మన్తో సమ్మాఆజీవో చేతి తిస్సో విరతియో నామ.
౮. కరుణా ముదితా అప్పమఞ్ఞాయో నామాతి సబ్బథాపి పఞ్ఞిన్ద్రియేన సద్ధిం పఞ్చవీసతిమే చేతసికా సోభనాతి వేదితబ్బా.
౯. ఏత్తావతా చ –
తేరసఞ్ఞసమానా చ, చుద్దసాకుసలా తథా;
సోభనా పఞ్చవీసాతి, ద్విపఞ్ఞాస పవుచ్చరే.
సమ్పయోగనయో
౧౦. తేసం చిత్తావియుత్తానం, యథాయోగమితో పరం.
చిత్తుప్పాదేసు పచ్చేకం, సమ్పయోగో పవుచ్చతి.
౧౧. సత్త సబ్బత్థ యుజ్జన్తి, యథాయోగం పకిణ్ణకా.
చుద్దసాకుసలేస్వేవ, సోభనేస్వేవ సోభనా.
అఞ్ఞసమానచేతసికసమ్పయోగనయో
౧౨. కథం? సబ్బచిత్తసాధారణా తావ సత్తిమే చేతసికా సబ్బేసుపి ఏకూననవుతిచిత్తుప్పాదేసు లబ్భన్తి.
౧౩. పకిణ్ణకేసు పన వితక్కో తావ ద్విపఞ్చవిఞ్ఞాణవజ్జితకామావచరచిత్తేసు చేవ ఏకాదససు పఠమజ్ఝానచిత్తేసు చేతి పఞ్చపఞ్ఞాసచిత్తేసు ఉప్పజ్జతి.
౧౪. విచారో పన తేసు చేవ ఏకాదససు దుతియజ్ఝానచిత్తేసు చాతి ఛసట్ఠిచిత్తేసు.
౧౫. అధిమోక్ఖో ద్విపఞ్చవిఞ్ఞాణవిచికిచ్ఛాసహగతవజ్జితచిత్తేసు.
౧౬. వీరియం పఞ్చద్వారావజ్జనద్విపఞ్చవిఞ్ఞాణసమ్పటిచ్ఛనసన్తీరణవజ్జితచిత్తేసు.
౧౭. పీతి దోమనస్సుపేక్ఖాసహగతకాయవిఞ్ఞాణచతుత్థజ్ఝానవజ్జితచిత్తేసు.
౧౮. ఛన్దో అహేతుకమోమూహవజ్జితచిత్తేసూతి.
౧౯. తే పన చిత్తుప్పాదా యథాక్కమం –
ఛసట్ఠి పఞ్చపఞ్ఞాస, ఏకాదస చ సోళస;
సత్తతి వీసతి చేవ, పకిణ్ణకవివజ్జితా.
పఞ్చపఞ్ఞాస ఛసట్ఠిట్ఠసత్తతి తిసత్తతి;
ఏకపఞ్ఞాస చేకూనసత్తతి సపకిణ్ణకా.
అకుసలచేతసికసమ్పయోగనయో
౨౦. అకుసలేసు పన మోహో అహిరికం అనోత్తప్పం ఉద్ధచ్చఞ్చాతి చత్తారోమే చేతసికా సబ్బాకుసలసాధారణా నామ, సబ్బేసుపి ద్వాదసా కుసలేసు లబ్భన్తి.
౨౧. లోభో అట్ఠసు లోభసహగతచిత్తేస్వేవ లబ్భతి.
౨౨. దిట్ఠి చతూసు దిట్ఠిగతసమ్పయుత్తేసు.
౨౩. మానో చతూసు దిట్ఠిగతవిప్పయుత్తేసు.
౨౪. దోసో ఇస్సా మచ్ఛరియం కుక్కుచ్చఞ్చాతి ద్వీసు పటిఘసమ్పయుత్తచిత్తేసు.
౨౫. థినమిద్ధం పఞ్చసు ససఙ్ఖారికచిత్తేసు.
౨౬. విచికిచ్ఛా విచికిచ్ఛాసహగతచిత్తేయేవాతి.
౨౭. సబ్బాపుఞ్ఞేసు చత్తారో,
లోభమూలే తయో గతా;
దోసమూలేసు చత్తారో,
ససఙ్ఖారే ద్వయం తథా.
విచికిచ్ఛా విచికిచ్ఛా-చిత్తే చాతి చతుద్దస;
ద్వాదసాకులేస్వేవ, సమ్పయుజ్జన్తి పఞ్చధా.
సోభనచేతసికసమ్పయోగనయో
౨౮. సోభనేసు పన సోభనసాధారణా తావ ఏకూనవీసతిమే చేతసికా సబ్బేసుపి ఏకూనసట్ఠిసోభనచిత్తేసు సంవిజ్జన్తి.
౨౯. విరతియో పన తిస్సోపి లోకుత్తరచిత్తేసు సబ్బథాపి నియతా ఏకతోవ లబ్భన్తి, లోకియేసు పన కామావచరకుసలేస్వేవ కదాచి సన్దిస్సన్తి విసుం విసుం.
౩౦. అప్పమఞ్ఞాయో పన ద్వాదససు పఞ్చమజ్ఝానవజ్జితమహగ్గతచిత్తేసు చేవ కామావచరకుసలేసు చ సహేతుకకామావచరకిరియచిత్తేసు చాతి అట్ఠవీసతిచిత్తేస్వేవ కదాచి నానా హుత్వా జాయన్తి, ఉపేక్ఖాసహగతేసు పనేత్థ కరుణాముదితా న సన్తీతి కేచి వదన్తి.
౩౧. పఞ్ఞా పన ద్వాదససు ఞాణసమ్పయుత్తకామావచరచిత్తేసు చేవ సబ్బేసుపి పఞ్చతింసమహగ్గతలోకుత్తరచిత్తేసు చాతి సత్తచత్తాలీసచిత్తేసు సమ్పయోగం గచ్ఛతీతి.
౩౨. ఏకూనవీసతి ధమ్మా, జాయన్తేకూనసట్ఠిసు.
తయో సోళసచిత్తేసు, అట్ఠవీసతియం ద్వయం.
పఞ్ఞా పకాసితా, సత్తచత్తాలీసవిధేసుపి;
సమ్పయుత్తా చతుధేవం, సోభనేస్వేవ సోభనా.
౩౩. ఇస్సామచ్ఛేరకుక్కుచ్చ-విరతికరుణాదయో.
నానా కదాచి మానో చ, థిన మిద్ధం తథా సహ.
౩౪. యథావుత్తానుసారేన, సేసా నియతయోగినో.
సఙ్గహఞ్చ పవక్ఖామి, తేసం దాని యథారహం.
సఙ్గహనయో
౩౫. ఛత్తింసానుత్తరే ధమ్మా, పఞ్చతింస మహగ్గతే.
అట్ఠతింసాపి లబ్భన్తి, కామావచరసోభనే.
సత్తవీసతిపుఞ్ఞమ్హి, ద్వాదసాహేతుకేతి చ;
యథాసమ్భవయోగేన, పఞ్చధా తత్థ సఙ్గహో.
లోకుత్తరచిత్తసఙ్గహనయో
౩౬. కథం? లోకుత్తరేసు తావ అట్ఠసు పఠమజ్ఝానికచిత్తేసు అఞ్ఞసమానా తేరస చేతసికా, అప్పమఞ్ఞావజ్జితా తేవీసతి సోభనచేతసికా చేతి ఛత్తింస ధమ్మా సఙ్గహం గచ్ఛన్తి, తథా దుతియజ్ఝానికచిత్తేసు వితక్కవజ్జా, తతియజ్ఝానికచిత్తేసు వితక్కవిచారవజ్జా, చతుత్థజ్ఝానికచిత్తేసు వితక్కవిచారపీతివజ్జా, పఞ్చమజ్ఝానికచిత్తేసుపి ఉపేక్ఖాసహగతా తే ఏవ సఙ్గయ్హన్తీతి సబ్బథాపి అట్ఠసు లోకుత్తరచిత్తేసు పఞ్చకజ్ఝానవసేన పఞ్చధావ సఙ్గహో హోతీతి.
౩౭. ఛత్తింస పఞ్చతింస చ, చతుత్తింస యథాక్కమం.
తేత్తింసద్వయమిచ్చేవం, పఞ్చధానుత్తరే ఠితా.