౪. పఠమకణ్డకీసుత్తం

౯౦౨. ఏకం సమయం ఆయస్మా చ అనురుద్ధో ఆయస్మా చ సారిపుత్తో ఆయస్మా చ మహామోగ్గల్లానో సాకేతే విహరన్తి కణ్డకీవనే. అథ ఖో ఆయస్మా చ సారిపుత్తో ఆయస్మా చ మహామోగ్గల్లానో సాయన్హసమయం పటిసల్లానా వుట్ఠితా యేనాయస్మా అనురుద్ధో తేనుపసఙ్కమింసు; ఉపసఙ్కమిత్వా ఆయస్మతా అనురుద్ధేన సద్ధిం సమ్మోదింసు. సమ్మోదనీయం కథం సారణీయం వీతిసారేత్వా ఏకమన్తం నిసీదింసు. ఏకమన్తం నిసిన్నో ఖో ఆయస్మా సారిపుత్తో ఆయస్మన్తం అనురుద్ధం ఏతదవోచ – ‘‘సేఖేనావుసో అనురుద్ధ, భిక్ఖునా కతమే ధమ్మా ఉపసమ్పజ్జ విహాతబ్బా’’తి?

‘‘సేఖేనావుసో సారిపుత్త, భిక్ఖునా చత్తారో సతిపట్ఠానా ఉపసమ్పజ్జ విహాతబ్బా. కతమే చత్తారో? ఇధావుసో, భిక్ఖు కాయే కాయానుపస్సీ విహరతి ఆతాపీ సమ్పజానో సతిమా, వినేయ్య లోకే అభిజ్ఝాదోమనస్సం; వేదనాసు …పే… చిత్తే…పే… ధమ్మేసు ధమ్మానుపస్సీ విహరతి ఆతాపీ సమ్పజానో సతిమా, వినేయ్య లోకే అభిజ్ఝాదోమనస్సం – సేఖేనావుసో సారిపుత్త, భిక్ఖునా ఇమే చత్తారో సతిపట్ఠానా ఉపసమ్పజ్జ విహాతబ్బా’’తి. చతుత్థం.