౭. బోధిపక్ఖియవగ్గో

౧. సంయోజనసుత్తం

౫౩౧. సావత్థినిదానం. ‘‘పఞ్చిమాని, భిక్ఖవే, ఇన్ద్రియాని భావితాని బహులీకతాని సంయోజనప్పహానాయ [సంయోజనానం పహానాయ (స్యా. క.)] సంవత్తన్తి. కతమాని పఞ్చ? సద్ధిన్ద్రియం…పే… పఞ్ఞిన్ద్రియం – ఇమాని ఖో, భిక్ఖవే, పఞ్చిన్ద్రియాని భావితాని బహులీకతాని సంయోజనప్పహానాయ సంవత్తన్తీ’’తి. పఠమం.

౨. అనుసయసుత్తం

౫౩౨. ‘‘పఞ్చిమాని, భిక్ఖవే, ఇన్ద్రియాని భావితాని బహులీకతాని అనుసయసముగ్ఘాతాయ సంవత్తన్తి. కతమాని పఞ్చ? సద్ధిన్ద్రియం…పే… పఞ్ఞిన్ద్రియం – ఇమాని ఖో, భిక్ఖవే, పఞ్చిన్ద్రియాని భావితాని బహులీకతాని అనుసయసముగ్ఘాతాయ సంవత్తన్తీ’’తి. దుతియం.

౩. పరిఞ్ఞాసుత్తం

౫౩౩. ‘‘పఞ్చిమాని, భిక్ఖవే, ఇన్ద్రియాని భావితాని బహులీకతాని అద్ధానపరిఞ్ఞాయ సంవత్తన్తి. కతమాని పఞ్చ? సద్ధిన్ద్రియం…పే… పఞ్ఞిన్ద్రియం – ఇమాని ఖో, భిక్ఖవే, పఞ్చిన్ద్రియాని భావితాని బహులీకతాని అద్ధానపరిఞ్ఞాయ సంవత్తన్తీ’’తి. తతియం.

౪. ఆసవక్ఖయసుత్తం

౫౩౪. ‘‘పఞ్చిమాని, భిక్ఖవే, ఇన్ద్రియాని భావితాని బహులీకతాని ఆసవానం ఖయాయ సంవత్తన్తి. కతమాని పఞ్చ? సద్ధిన్ద్రియం…పే… పఞ్ఞిన్ద్రియం – ఇమాని ఖో, భిక్ఖవే, పఞ్చిన్ద్రియాని భావితాని బహులీకతాని ఆసవానం ఖయాయ సంవత్తన్తీ’’తి.

‘‘పఞ్చిమాని, భిక్ఖవే, ఇన్ద్రియాని భావితాని బహులీకతాని సంయోజనప్పహానాయ సంవత్తన్తి, అనుసయసముగ్ఘాతాయ సంవత్తన్తి, అద్ధానపరిఞ్ఞాయ సంవత్తన్తి, ఆసవానం ఖయాయ సంవత్తన్తి. కతమాని పఞ్చ? సద్ధిన్ద్రియం…పే… పఞ్ఞిన్ద్రియం – ఇమాని ఖో, భిక్ఖవే, పఞ్చిన్ద్రియాని భావితాని బహులీకతాని సంయోజనప్పహానాయ సంవత్తన్తి, అనుసయసముగ్ఘాతాయ సంవత్తన్తి, అద్ధానపరిఞ్ఞాయ సంవత్తన్తి, ఆసవానం ఖయాయ సంవత్తన్తీ’’తి. చతుత్థం.

౫. పఠమఫలసుత్తం

౫౩౫. ‘‘పఞ్చిమాని, భిక్ఖవే, ఇన్ద్రియాని. కతమాని పఞ్చ? సద్ధిన్ద్రియం…పే… పఞ్ఞిన్ద్రియం – ఇమాని ఖో, భిక్ఖవే, పఞ్చిన్ద్రియాని. ఇమేసం ఖో, భిక్ఖవే, పఞ్చన్నం ఇన్ద్రియానం భావితత్తా బహులీకతత్తా ద్విన్నం ఫలానం అఞ్ఞతరం ఫలం పాటికఙ్ఖం – దిట్ఠేవ ధమ్మే అఞ్ఞా, సతి వా ఉపాదిసేసే అనాగామితా’’తి. పఞ్చమం.

౬. దుతియఫలసుత్తం

౫౩౬. ‘‘పఞ్చిమాని, భిక్ఖవే, ఇన్ద్రియాని. కతమాని పఞ్చ? సద్ధిన్ద్రియం…పే… పఞ్ఞిన్ద్రియం – ఇమాని ఖో, భిక్ఖవే, పఞ్చిన్ద్రియాని. ఇమేసం ఖో, భిక్ఖవే, పఞ్చన్నం ఇన్ద్రియానం భావితత్తా బహులీకతత్తా సత్త ఫలా సత్తానిసంసా పాటికఙ్ఖా. కతమే సత్త ఫలా సత్తానిసంసా? దిట్ఠేవ ధమ్మే పటికచ్చ అఞ్ఞం ఆరాధేతి, నో చే దిట్ఠేవ ధమ్మే పటికచ్చ అఞ్ఞం ఆరాధేతి, అథ మరణకాలే అఞ్ఞం ఆరాధేతి. నో చే దిట్ఠేవ ధమ్మే అఞ్ఞం ఆరాధేతి, నో చే మరణకాలే అఞ్ఞం ఆరాధేతి, అథ పఞ్చన్నం ఓరమ్భాగియానం సంయోజనానం పరిక్ఖయా అన్తరాపరినిబ్బాయీ హోతి, ఉపహచ్చపరినిబ్బాయీ హోతి, అసఙ్ఖారపరినిబ్బాయీ హోతి, ససఙ్ఖారపరినిబ్బాయీ హోతి, ఉద్ధంసోతో హోతి అకనిట్ఠగామీ. ఇమేసం ఖో, భిక్ఖవే, పఞ్చన్నం ఇన్ద్రియానం భావితత్తా బహులీకతత్తా ఇమే సత్త ఫలా సత్తానిసంసా పాటికఙ్ఖా’’తి. ఛట్ఠం.

౭. పఠమరుక్ఖసుత్తం

౫౩౭. ‘‘సేయ్యథాపి భిక్ఖవే, యే కేచి జమ్బుదీపకా రుక్ఖా, జమ్బూ తేసం అగ్గమక్ఖాయతి; ఏవమేవ ఖో భిక్ఖవే, యే కేచి బోధిపక్ఖియా ధమ్మా, పఞ్ఞిన్ద్రియం తేసం అగ్గమక్ఖాయతి, యదిదం – బోధాయ. కతమే చ, భిక్ఖవే, బోధిపక్ఖియా ధమ్మా? సద్ధిన్ద్రియం, భిక్ఖవే, బోధిపక్ఖియో ధమ్మో, తం బోధాయ సంవత్తతి. వీరియిన్ద్రియం…పే… సతిన్ద్రియం…పే… సమాధిన్ద్రియం…పే… పఞ్ఞిన్ద్రియం బోధిపక్ఖియో ధమ్మో, తం బోధాయ సంవత్తతి. సేయ్యథాపి, భిక్ఖవే, యే కేచి జమ్బుదీపకా రుక్ఖా, జమ్బూ తేసం అగ్గమక్ఖాయతి; ఏవమేవ ఖో, భిక్ఖవే, యే కేచి బోధిపక్ఖియా ధమ్మా, పఞ్ఞిన్ద్రియం తేసం అగ్గమక్ఖాయతి, యదిదం – బోధాయా’’తి. సత్తమం.

౮. దుతియరుక్ఖసుత్తం

౫౩౮. ‘‘సేయ్యథాపి, భిక్ఖవే, యే కేచి దేవానం తావతింసానం రుక్ఖా, పారిఛత్తకో తేసం అగ్గమక్ఖాయతి; ఏవమేవ ఖో, భిక్ఖవే, యే కేచి బోధిపక్ఖియా ధమ్మా, పఞ్ఞిన్ద్రియం తేసం అగ్గమక్ఖాయతి, యదిదం – బోధాయ. కతమే చ, భిక్ఖవే, బోధిపక్ఖియా ధమ్మా? సద్ధిన్ద్రియం, భిక్ఖవే, బోధిపక్ఖియో ధమ్మో, తం బోధాయ సంవత్తతి. వీరియిన్ద్రియం…పే… సతిన్ద్రియం…పే… సమాధిన్ద్రియం…పే… పఞ్ఞిన్ద్రియం బోధిపక్ఖియో ధమ్మో, తం బోధాయ సంవత్తతి. సేయ్యథాపి, భిక్ఖవే, యే కేచి దేవానం తావతింసానం రుక్ఖా, పారిఛత్తకో తేసం అగ్గమక్ఖాయతి; ఏవమేవ ఖో, భిక్ఖవే, యే కేచి బోధిపక్ఖియా ధమ్మా, పఞ్ఞిన్ద్రియం తేసం అగ్గమక్ఖాయతి, యదిదం – బోధాయా’’తి. అట్ఠమం.

౯. తతియరుక్ఖసుత్తం

౫౩౯. ‘‘సేయ్యథాపి, భిక్ఖవే, యే కేచి అసురానం రుక్ఖా, చిత్తపాటలి తేసం అగ్గమక్ఖాయతి; ఏవమేవ ఖో, భిక్ఖవే, యే కేచి బోధిపక్ఖియా ధమ్మా, పఞ్ఞిన్ద్రియం తేసం అగ్గమక్ఖాయతి, యదిదం – బోధాయ. కతమే చ, భిక్ఖవే, బోధిపక్ఖియా ధమ్మా? సద్ధిన్ద్రియం, భిక్ఖవే, బోధిపక్ఖియో ధమ్మో, తం బోధాయ సంవత్తతి…పే… పఞ్ఞిన్ద్రియం బోధిపక్ఖియో ధమ్మో, తం బోధాయ సంవత్తతి. సేయ్యథాపి భిక్ఖవే, యే కేచి అసురానం రుక్ఖా, చిత్తపాటలి తేసం అగ్గమక్ఖాయతి; ఏవమేవ ఖో, భిక్ఖవే, యే కేచి బోధిపక్ఖియా ధమ్మా, పఞ్ఞిన్ద్రియం తేసం అగ్గమక్ఖాయతి, యదిదం – బోధాయా’’తి. నవమం.

౧౦. చతుత్థరుక్ఖసుత్తం

౫౪౦. ‘‘సేయ్యథాపి, భిక్ఖవే, యే కేచి సుపణ్ణానం రుక్ఖా, కూటసిమ్బలీ [కోటసిమ్బలి (స్యా. కం.)] తేసం అగ్గమక్ఖాయతి; ఏవమేవ ఖో, భిక్ఖవే, యే కేచి బోధిపక్ఖియా ధమ్మా, పఞ్ఞిన్ద్రియం తేసం అగ్గమక్ఖాయతి, యదిదం – బోధాయ. కతమే చ, భిక్ఖవే, బోధిపక్ఖియా ధమ్మా? సద్ధిన్ద్రియం, భిక్ఖవే, బోధిపక్ఖియో ధమ్మో, తం బోధాయ సంవత్తతి…పే… పఞ్ఞిన్ద్రియం బోధిపక్ఖియో ధమ్మో, తం బోధాయ సంవత్తతి. సేయ్యథాపి, భిక్ఖవే, యే కేచి సుపణ్ణానం రుక్ఖా, కూటసిమ్బలీ తేసం అగ్గమక్ఖాయతి; ఏవమేవ ఖో, భిక్ఖవే, యే కేచి బోధిపక్ఖియా ధమ్మా, పఞ్ఞిన్ద్రియం తేసం అగ్గమక్ఖాయతి, యదిదం – బోధాయా’’తి. దసమం.

బోధిపక్ఖియవగ్గో సత్తమో.

తస్సుద్దానం –

సంయోజనా అనుసయా, పరిఞ్ఞా ఆసవక్ఖయా;

ద్వే ఫలా చతురో రుక్ఖా, వగ్గో తేన పవుచ్చతీతి.