౧౭. ఓఘవగ్గో

౧-౧౦. ఓఘాదిసుత్తదసకం

౬౪౧-౬౫౦. ‘‘పఞ్చిమాని, భిక్ఖవే, ఉద్ధమ్భాగియాని సంయోజనాని. కతమాని పఞ్చ? రూపరాగో, అరూపరాగో, మానో, ఉద్ధచ్చం, అవిజ్జా – ఇమాని ఖో, భిక్ఖవే, పఞ్చుద్ధమ్భాగియాని సంయోజనాని. ఇమేసం ఖో, భిక్ఖవే, పఞ్చన్నం ఉద్ధమ్భాగియానం సంయోజనానం అభిఞ్ఞాయ పరిఞ్ఞాయ పరిక్ఖయాయ పహానాయ పఞ్చిన్ద్రియాని భావేతబ్బాని. కతమాని పఞ్చ? ఇధ, భిక్ఖవే, భిక్ఖు సద్ధిన్ద్రియం భావేతి రాగవినయపరియోసానం దోసవినయపరియోసానం మోహవినయపరియోసానం. వీరియిన్ద్రియం …పే… సతిన్ద్రియం… సమాధిన్ద్రియం … పఞ్ఞిన్ద్రియం భావేతి రాగవినయపరియోసానం దోసవినయపరియోసానం మోహవినయపరియోసానం. ఇమేసం ఖో, భిక్ఖవే, పఞ్చన్నం ఉద్ధమ్భాగియానం సంయోజనానం అభిఞ్ఞాయ పరిఞ్ఞాయ పరిక్ఖయాయ పహానాయ ఇమాని పఞ్చిన్ద్రియాని భావేతబ్బానీ’’తి.

ఓఘవగ్గో సత్తరసమో.

తస్సుద్దానం –

ఓఘో యోగో ఉపాదానం, గన్థా అనుసయేన చ;

కామగుణా నీవరణా, ఖన్ధా ఓరుద్ధమ్భాగియాతి.

ఇన్ద్రియసంయుత్తం చతుత్థం.