౪. ఉక్కచేలసుత్తం

౩౮౦. ఏకం సమయం భగవా వజ్జీసు విహరతి ఉక్కచేలాయం గఙ్గాయ నదియా తీరే మహతా భిక్ఖుసఙ్ఘేన సద్ధిం అచిరపరినిబ్బుతేసు సారిపుత్తమోగ్గల్లానేసు. తేన ఖో పన సమయేన భగవా భిక్ఖుసఙ్ఘపరివుతో అజ్ఝోకాసే నిసిన్నో హోతి.

అథ ఖో భగవా తుణ్హీభూతం భిక్ఖుసఙ్ఘం అనువిలోకేత్వా భిక్ఖూ ఆమన్తేసి – ‘‘అపి మ్యాయం, భిక్ఖవే, పరిసా సుఞ్ఞా వియ ఖాయతి పరినిబ్బుతేసు సారిపుత్తమోగ్గల్లానేసు. అసుఞ్ఞా మే, భిక్ఖవే, పరిసా హోతి, అనపేక్ఖా తస్సం దిసాయం హోతి, యస్సం దిసాయం సారిపుత్తమోగ్గల్లానా విహరన్తి. యే హి తే, భిక్ఖవే, అహేసుం అతీతమద్ధానం అరహన్తో సమ్మాసమ్బుద్ధా, తేసమ్పి భగవన్తానం ఏతప్పరమంయేవ సావకయుగం [ఏతపరమంయేవ (సీ. స్యా. కం. పీ.)] అహోసి – సేయ్యథాపి మయ్హం సారిపుత్తమోగ్గల్లానా. యేపి తే, భిక్ఖవే, భవిస్సన్తి అనాగతమద్ధానం అరహన్తో సమ్మాసమ్బుద్ధా, తేసమ్పి భగవన్తానం ఏతప్పరమంయేవ సావకయుగం భవిస్సతి – సేయ్యథాపి మయ్హం సారిపుత్తమోగ్గల్లానా. అచ్ఛరియం, భిక్ఖవే, సావకానం! అబ్భుతం, భిక్ఖవే, సావకానం! సత్థు చ నామ సాసనకరా భవిస్సన్తి ఓవాదప్పటికరా, చతున్నఞ్చ పరిసానం పియా భవిస్సన్తి మనాపా గరుభావనీయా చ! అచ్ఛరియం, భిక్ఖవే, తథాగతస్స, అబ్భుతం, భిక్ఖవే, తథాగతస్స! ఏవరూపేపి నామ సావకయుగే పరినిబ్బుతే నత్థి తథాగతస్స సోకో వా పరిదేవో వా! తం కుతేత్థ, భిక్ఖవే, లబ్భా! యం తం జాతం భూతం సఙ్ఖతం పలోకధమ్మం, తం వత మా పలుజ్జీతి – నేతం ఠానం విజ్జతి. సేయ్యథాపి, భిక్ఖవే, మహతో రుక్ఖస్స తిట్ఠతో సారవతో యే మహన్తతరా ఖన్ధా తే పలుజ్జేయ్యుం; ఏవమేవ ఖో, భిక్ఖవే, మహతో భిక్ఖుసఙ్ఘస్స తిట్ఠతో సారవతో సారిపుత్తమోగ్గల్లానా పరినిబ్బుతా. తం కుతేత్థ, భిక్ఖవే, లబ్భా! యం తం జాతం భూతం సఙ్ఖతం పలోకధమ్మం, తం వత మా పలుజ్జీతి – నేతం ఠానం విజ్జతి. తస్మాతిహ, భిక్ఖవే, అత్తదీపా విహరథ అత్తసరణా అనఞ్ఞసరణా, ధమ్మదీపా ధమ్మసరణా అనఞ్ఞసరణా.

‘‘కథఞ్చ, భిక్ఖవే, భిక్ఖు అత్తదీపో విహరతి అత్తసరణో అనఞ్ఞసరణో, ధమ్మదీపో ధమ్మసరణో అనఞ్ఞసరణో? ఇధ, భిక్ఖవే, భిక్ఖు కాయే కాయానుపస్సీ విహరతి ఆతాపీ సమ్పజానో సతిమా, వినేయ్య లోకే అభిజ్ఝాదోమనస్సం; వేదనాసు…పే… చిత్తే…పే… ధమ్మేసు ధమ్మానుపస్సీ విహరతి ఆతాపీ సమ్పజానో సతిమా, వినేయ్య లోకే అభిజ్ఝాదోమనస్సం. ఏవం ఖో, భిక్ఖవే, భిక్ఖు అత్తదీపో విహరతి అత్తసరణో అనఞ్ఞసరణో, ధమ్మదీపో ధమ్మసరణో అనఞ్ఞసరణో. యే హి కేచి, భిక్ఖవే, ఏతరహి వా మమచ్చయే వా అత్తదీపా విహరిస్సన్తి అత్తసరణా అనఞ్ఞసరణా, ధమ్మదీపా ధమ్మసరణా అనఞ్ఞసరణా; తమతగ్గే మేతే, భిక్ఖవే, భిక్ఖూ భవిస్సన్తి యే కేచి సిక్ఖాకామా’’తి. చతుత్థం.