౧౦. నిరోధసుత్తం

౨౫౭. ‘‘నిరోధసఞ్ఞా, భిక్ఖవే, భావితా బహులీకతా మహప్ఫలా హోతి మహానిసంసా. కథం భావితా చ, భిక్ఖవే, నిరోధసఞ్ఞా కథం బహులీకతా మహప్ఫలా హోతి మహానిసంసా? ఇధ, భిక్ఖవే, భిక్ఖు నిరోధసఞ్ఞాసహగతం సతిసమ్బోజ్ఝఙ్గం భావేతి…పే… నిరోధసఞ్ఞాసహగతం ఉపేక్ఖాసమ్బోజ్ఝఙ్గం భావేతి వివేకనిస్సితం విరాగనిస్సితం నిరోధనిస్సితం వోస్సగ్గపరిణామిం. ఏవం భావితా ఖో, భిక్ఖవే, నిరోధసఞ్ఞా ఏవం బహులీకతా మహప్ఫలా హోతి మహానిసంసాతి.

‘‘నిరోధసఞ్ఞాయ, భిక్ఖవే, భావితాయ బహులీకతాయ ద్విన్నం ఫలానం అఞ్ఞతరం ఫలం పాటికఙ్ఖం – దిట్ఠేవ ధమ్మే అఞ్ఞా, సతి వా ఉపాదిసేసే అనాగామితా. కథం భావితాయ, భిక్ఖవే, నిరోధసఞ్ఞాయ కథం బహులీకతాయ ద్విన్నం ఫలానం అఞ్ఞతరం ఫలం పాటికఙ్ఖం – దిట్ఠేవ ధమ్మే అఞ్ఞా, సతి వా ఉపాదిసేసే అనాగామితా? ఇధ, భిక్ఖవే, భిక్ఖు నిరోధసఞ్ఞాసహగతం సతిసమ్బోజ్ఝఙ్గం భావేతి…పే… నిరోధసఞ్ఞాసహగతం ఉపేక్ఖాసమ్బోజ్ఝఙ్గం భావేతి వివేకనిస్సితం విరాగనిస్సితం నిరోధనిస్సితం వోస్సగ్గపరిణామిం. ఏవం భావితాయ ఖో, భిక్ఖవే, నిరోధసఞ్ఞాయ ఏవం బహులీకతాయ ద్విన్నం ఫలానం అఞ్ఞతరం ఫలం పాటికఙ్ఖం – దిట్ఠేవ ధమ్మే అఞ్ఞా, సతి వా ఉపాదిసేసే అనాగామితా’’తి.

‘‘నిరోధసఞ్ఞా, భిక్ఖవే, భావితా బహులీకతా మహతో అత్థాయ సంవత్తతి, మహతో యోగక్ఖేమాయ సంవత్తతి, మహతో సంవేగాయ సంవత్తతి, మహతో ఫాసువిహారాయ సంవత్తతి. కథం భావితా చ, భిక్ఖవే, నిరోధసఞ్ఞా కథం బహులీకతా మహతో అత్థాయ సంవత్తతి, మహతో యోగక్ఖేమాయ సంవత్తతి, మహతో సంవేగాయ సంవత్తతి, మహతో ఫాసువిహారాయ సంవత్తతి? ఇధ, భిక్ఖవే, భిక్ఖు నిరోధసఞ్ఞాసహగతం సతిసమ్బోజ్ఝఙ్గం భావేతి…పే… నిరోధసఞ్ఞాసహగతం ఉపేక్ఖాసమ్బోజ్ఝఙ్గం భావేతి వివేకనిస్సితం విరాగనిస్సితం నిరోధనిస్సితం వోస్సగ్గపరిణామిం. ఏవం భావితా ఖో, భిక్ఖవే, నిరోధసఞ్ఞా ఏవం బహులీకతా మహతో అత్థాయ సంవత్తతి, మహతో యోగక్ఖేమాయ సంవత్తతి, మహతో సంవేగాయ సంవత్తతి, మహతో ఫాసువిహారాయ సంవత్తతీ’’తి. దసమం.

నిరోధవగ్గో అట్ఠమో.

తస్సుద్దానం –

అసుభమరణఆహారే, పటికూలఅనభిరతేన [పటికూలేన చ సబ్బలోకే (స్యా.)];

అనిచ్చదుక్ఖఅనత్తపహానం, విరాగనిరోధేన తే దసాతి.