౭. పఠమఆమకధఞ్ఞపేయ్యాలవగ్గో

౧. అఞ్ఞత్రసుత్తం

౧౧౩౧. అథ ఖో భగవా పరిత్తం నఖసిఖాయం పంసుం ఆరోపేత్వా భిక్ఖూ ఆమన్తేసి – ‘‘తం కిం మఞ్ఞథ, భిక్ఖవే, కతమం ను ఖో బహుతరం – యో వాయం మయా పరిత్తో నఖసిఖాయం పంసు ఆరోపితో, అయం వా మహాపథవీ’’తి? ‘‘ఏతదేవ, భన్తే, బహుతరం, యదిదం – మహాపథవీ; అప్పమత్తకాయం భగవతా పరిత్తో నఖసిఖాయం పంసు ఆరోపితో. సఙ్ఖమ్పి న ఉపేతి, ఉపనిధమ్పి న ఉపేతి, కలభాగమ్పి న ఉపేతి మహాపథవిం ఉపనిధాయ భగవతా పరిత్తో నఖసిఖాయం పంసు ఆరోపితో’’తి.

‘‘ఏవమేవ ఖో, భిక్ఖవే, అప్పమత్తకా తే సత్తా యే మనుస్సేసు పచ్చాజాయన్తి; అథ ఖో ఏతేవ బహుతరా సత్తా యే అఞ్ఞత్ర మనుస్సేహి [మనుస్సేసు (పీ. క.)] పచ్చాజాయన్తి. తం కిస్స హేతు? అదిట్ఠత్తా, భిక్ఖవే, చతున్నం అరియసచ్చానం. కతమేసం చతున్నం? దుక్ఖస్స అరియసచ్చస్స…పే… దుక్ఖనిరోధగామినియా పటిపదాయ అరియసచ్చస్స’’.

‘‘తస్మాతిహ, భిక్ఖవే, ‘ఇదం దుక్ఖ’న్తి యోగో కరణీయో…పే… ‘అయం దుక్ఖనిరోధగామినీ పటిపదా’తి యోగో కరణీయో’’తి. పఠమం.

౨. పచ్చన్తసుత్తం

౧౧౩౨. అథ ఖో భగవా పరిత్తం నఖసిఖాయం పంసుం ఆరోపేత్వా భిక్ఖూ ఆమన్తేసి – ‘‘తం కిం మఞ్ఞథ, భిక్ఖవే, కతమం ను ఖో బహుతరం – యో వాయం మయా పరిత్తో నఖసిఖాయం పంసు ఆరోపితో, అయం వా మహాపథవీ’’తి? ‘‘ఏతదేవ, భన్తే, బహుతరం, యదిదం – మహాపథవీ; అప్పమత్తకాయం భగవతా పరిత్తో నఖసిఖాయం పంసు ఆరోపితో. సఙ్ఖమ్పి న ఉపేతి, ఉపనిధమ్పి న ఉపేతి, కలభాగమ్పి న ఉపేతి మహాపథవిం ఉపనిధాయ భగవతా పరిత్తో నఖసిఖాయం పంసు ఆరోపితో’’తి.

‘‘ఏవమేవ ఖో, భిక్ఖవే, అప్పమత్తకా తే సత్తా యే మజ్ఝిమేసు జనపదేసు పచ్చాజాయన్తి; అథ ఖో ఏతేవ బహుతరా సత్తా యే పచ్చన్తిమేసు జనపదేసు పచ్చాజాయన్తి అవిఞ్ఞాతారేసు మిలక్ఖేసు [మిలక్ఖూసు (స్యా. కం. క.)] …పే…. దుతియం.

౩. పఞ్ఞాసుత్తం

౧౧౩౩. … ‘‘ఏవమేవ ఖో, భిక్ఖవే, అప్పకా తే సత్తా యే పన అరియేన పఞ్ఞాచక్ఖునా సమన్నాగతా; అథ ఖో ఏతేవ బహుతరా సత్తా యే అవిజ్జాగతా సమ్ముళ్హా…పే…. తతియం.

౪. సురామేరయసుత్తం

౧౧౩౪. … ‘‘ఏవమేవ ఖో, భిక్ఖవే, అప్పకా తే సత్తా యే సురామేరయమజ్జప్పమాదట్ఠానా పటివిరతా; అథ ఖో ఏతేవ బహుతరా సత్తా యే సురామేరయమజ్జప్పమాదట్ఠానా అపటివిరతా…పే…. చతుత్థం.

౫. ఓదకసుత్తం

౧౧౩౫. … ‘‘ఏవమేవ ఖో, భిక్ఖవే, అప్పకా తే సత్తా యే థలజా; అథ ఖో ఏతేవ బహుతరా సత్తా యే ఉదకజా. తం కిస్స హేతు…పే…. పఞ్చమం.

౬. మత్తేయ్యసుత్తం

౧౧౩౬. … ‘‘ఏవమేవ ఖో, భిక్ఖవే, అప్పకా తే సత్తా యే మత్తేయ్యా; అథ ఖో ఏతేవ బహుతరా సత్తా యే అమత్తేయ్యా…పే…. ఛట్ఠం.

౭. పేత్తేయ్యసుత్తం

౧౧౩౭. … ‘‘ఏవమేవ ఖో, భిక్ఖవే, అప్పకా తే సత్తా యే పేత్తేయ్యా; అథ ఖో ఏతేవ బహుతరా సత్తా యే అపేత్తేయ్యా…పే…. సత్తమం.

౮. సామఞ్ఞసుత్తం

౧౧౩౮. … ‘‘ఏవమేవ ఖో, భిక్ఖవే, అప్పకా తే సత్తా యే సామఞ్ఞా; అథ ఖో ఏతేవ బహుతరా సత్తా యే అసామఞ్ఞా…పే…. అట్ఠమం.

౯. బ్రహ్మఞ్ఞసుత్తం

౧౧౩౯. … ‘‘ఏవమేవ ఖో, భిక్ఖవే, అప్పకా తే సత్తా యే బ్రహ్మఞ్ఞా; అథ ఖో ఏతేవ బహుతరా సత్తా యే అబ్రహ్మఞ్ఞా…పే…. నవమం.

౧౦. పచాయికసుత్తం

౧౧౪౦. … ‘‘ఏవమేవ ఖో, భిక్ఖవే, అప్పకా తే సత్తా యే కులే జేట్ఠాపచాయినో; అథ ఖో ఏతేవ బహుతరా సత్తా యే కులే అజేట్ఠాపచాయినోతి [అకులే జేట్ఠాపచాయినోతి (స్యా. కం.)] …పే…. దసమం.

పఠమఆమకధఞ్ఞపేయ్యాలవగ్గో సత్తమో.

తస్సుద్దానం –

అఞ్ఞత్ర పచ్చన్తం పఞ్ఞా, సురామేరయఓదకా;

మత్తేయ్య పేత్తేయ్యా చాపి, సామఞ్ఞం బ్రహ్మపచాయికన్తి.