౬. పఠమఅఞ్ఞతరభిక్ఖుసుత్తం

౬. సావత్థినిదానం. అథ ఖో అఞ్ఞతరో భిక్ఖు యేన భగవా తేనుపసఙ్కమి…పే… ఏకమన్తం నిసిన్నో ఖో సో భిక్ఖు భగవన్తం ఏతదవోచ – ‘‘‘బ్రహ్మచరియం, బ్రహ్మచరియ’న్తి, భన్తే, వుచ్చతి. కతమం ను ఖో, భన్తే, బ్రహ్మచరియం, కతమం బ్రహ్మచరియపరియోసాన’’న్తి?

‘‘అయమేవ ఖో, భిక్ఖు, అరియో అట్ఠఙ్గికో మగ్గో బ్రహ్మచరియం, సేయ్యథిదం – సమ్మాదిట్ఠి…పే… సమ్మాసమాధి. యో ఖో, భిక్ఖు, రాగక్ఖయో దోసక్ఖయో మోహక్ఖయో – ఇదం బ్రహ్మచరియపరియోసాన’’న్తి. ఛట్ఠం.