౨. దుతియవగ్గో

౧. అసఙ్ఖతసుత్తం

౩౭౭. ‘‘అసఙ్ఖతఞ్చ వో, భిక్ఖవే, దేసేస్సామి అసఙ్ఖతగామిఞ్చ మగ్గం. తం సుణాథ. కతమఞ్చ, భిక్ఖవే, అసఙ్ఖతం? యో, భిక్ఖవే, రాగక్ఖయో దోసక్ఖయో మోహక్ఖయో – ఇదం వుచ్చతి, భిక్ఖవే, అసఙ్ఖతం. కతమో చ, భిక్ఖవే, అసఙ్ఖతగామిమగ్గో? సమథో. అయం వుచ్చతి, భిక్ఖవే, అసఙ్ఖతగామిమగ్గో. ఇతి ఖో, భిక్ఖవే, దేసితం వో మయా అసఙ్ఖతం, దేసితో అసఙ్ఖతగామిమగ్గో. యం, భిక్ఖవే, సత్థారా కరణీయం సావకానం హితేసినా అనుకమ్పకేన అనుకమ్పం ఉపాదాయ, కతం వో తం మయా. ఏతాని, భిక్ఖవే, రుక్ఖమూలాని, ఏతాని సుఞ్ఞాగారాని. ఝాయథ, భిక్ఖవే, మా పమాదత్థ; మా పచ్ఛా విప్పటిసారినో అహువత్థ. అయం వో అమ్హాకం అనుసాసనీతి.

‘‘అసఙ్ఖతఞ్చ వో, భిక్ఖవే, దేసేస్సామి అసఙ్ఖతగామిఞ్చ మగ్గం. తం సుణాథ. కతమఞ్చ, భిక్ఖవే, అసఙ్ఖతం? యో, భిక్ఖవే, రాగక్ఖయో దోసక్ఖయో మోహక్ఖయో – ఇదం వుచ్చతి, భిక్ఖవే, అసఙ్ఖతం. కతమో చ, భిక్ఖవే, అసఙ్ఖతగామిమగ్గో? విపస్సనా. అయం వుచ్చతి, భిక్ఖవే, అసఙ్ఖతగామిమగ్గో. ఇతి ఖో, భిక్ఖవే, దేసితం వో మయా అసఙ్ఖతం…పే… అయం వో అమ్హాకం అనుసాసనీతి.

‘‘కతమో చ, భిక్ఖవే, అసఙ్ఖతగామిమగ్గో? సవితక్కో సవిచారో సమాధి. అయం వుచ్చతి, భిక్ఖవే, అసఙ్ఖతగామిమగ్గో…పే… కతమో చ, భిక్ఖవే, అసఙ్ఖతగామిమగ్గో? అవితక్కో విచారమత్తో సమాధి. అయం వుచ్చతి, భిక్ఖవే, అసఙ్ఖతగామిమగ్గో…పే… కతమో చ, భిక్ఖవే, అసఙ్ఖతగామిమగ్గో? అవితక్కో అవిచారో సమాధి. అయం వుచ్చతి, భిక్ఖవే, అసఙ్ఖతగామిమగ్గో…పే….

‘‘కతమో చ, భిక్ఖవే, అసఙ్ఖతగామిమగ్గో? సుఞ్ఞతో సమాధి. అయం వుచ్చతి, భిక్ఖవే, అసఙ్ఖతగామిమగ్గో…పే… కతమో చ, భిక్ఖవే, అసఙ్ఖతగామిమగ్గో? అనిమిత్తో సమాధి. అయం వుచ్చతి, భిక్ఖవే, అసఙ్ఖతగామిమగ్గో…పే… కతమో చ, భిక్ఖవే, అసఙ్ఖతగామిమగ్గో? అప్పణిహితో సమాధి. అయం వుచ్చతి, భిక్ఖవే, అసఙ్ఖతగామిమగ్గో…పే….

‘‘కతమో చ, భిక్ఖవే, అసఙ్ఖతగామిమగ్గో? ఇధ, భిక్ఖవే, భిక్ఖు కాయే కాయానుపస్సీ విహరతి ఆతాపీ సమ్పజానో సతిమా వినేయ్య లోకే అభిజ్ఝాదోమనస్సం. అయం వుచ్చతి, భిక్ఖవే, అసఙ్ఖతగామిమగ్గో…పే… కతమో చ, భిక్ఖవే, అసఙ్ఖతగామిమగ్గో? ఇధ, భిక్ఖవే, భిక్ఖు వేదనాసు వేదనానుపస్సీ విహరతి…పే… అయం వుచ్చతి, భిక్ఖవే, అసఙ్ఖతగామిమగ్గో…పే… కతమో చ, భిక్ఖవే, అసఙ్ఖతగామిమగ్గో? ఇధ, భిక్ఖవే, భిక్ఖు చిత్తే చిత్తానుపస్సీ…పే… అయం వుచ్చతి, భిక్ఖవే, అసఙ్ఖతగామిమగ్గో…పే… కతమో చ, భిక్ఖవే, అసఙ్ఖతగామిమగ్గో? ఇధ, భిక్ఖవే, భిక్ఖు ధమ్మేసు ధమ్మానుపస్సీ విహరతి…పే… అయం వుచ్చతి, భిక్ఖవే, అసఙ్ఖతగామిమగ్గో…పే….

‘‘కతమో చ, భిక్ఖవే, అసఙ్ఖతగామిమగ్గో? ఇధ, భిక్ఖవే, భిక్ఖు అనుప్పన్నానం పాపకానం అకుసలానం ధమ్మానం అనుప్పాదా ఛన్దం జనేతి వాయమతి వీరియం ఆరభతి చిత్తం పగ్గణ్హాతి పదహతి. అయం వుచ్చతి, భిక్ఖవే, అసఙ్ఖతగామిమగ్గో…పే… కతమో చ, భిక్ఖవే, అసఙ్ఖతగామిమగ్గో? ఇధ, భిక్ఖవే, భిక్ఖు ఉప్పన్నానం పాపకానం అకుసలానం ధమ్మానం పహానా ఛన్దం జనేతి వాయమతి వీరియం ఆరభతి చిత్తం పగ్గణ్హాతి పదహతి. అయం వుచ్చతి, భిక్ఖవే, అసఙ్ఖతగామిమగ్గో…పే… కతమో చ, భిక్ఖవే, అసఙ్ఖతగామిమగ్గో? ఇధ, భిక్ఖవే, భిక్ఖు అనుప్పన్నానం కుసలానం ధమ్మానం ఉప్పాదా ఛన్దం జనేతి వాయమతి వీరియం ఆరభతి చిత్తం పగ్గణ్హాతి పదహతి. అయం వుచ్చతి, భిక్ఖవే, అసఙ్ఖతగామిమగ్గో…పే… కతమో చ, భిక్ఖవే, అసఙ్ఖతగామిమగ్గో? ఇధ, భిక్ఖవే, భిక్ఖు ఉప్పన్నానం కుసలానం ధమ్మానం ఠితియా అసమ్మోసాయ భియ్యోభావాయ వేపుల్లాయ భావనాయ పారిపూరియా ఛన్దం జనేతి వాయమతి వీరియం ఆరభతి చిత్తం పగ్గణ్హాతి పదహతి. అయం వుచ్చతి, భిక్ఖవే, అసఙ్ఖతగామిమగ్గో…పే….

‘‘కతమో చ, భిక్ఖవే, అసఙ్ఖతగామిమగ్గో? ఇధ, భిక్ఖవే, భిక్ఖు ఛన్దసమాధిపధానసఙ్ఖారసమన్నాగతం ఇద్ధిపాదం భావేతి. అయం వుచ్చతి, భిక్ఖవే, అసఙ్ఖతగామిమగ్గో …పే… కతమో చ, భిక్ఖవే, అసఙ్ఖతగామిమగ్గో? ఇధ, భిక్ఖవే, భిక్ఖు వీరియసమాధిపధానసఙ్ఖారసమన్నాగతం ఇద్ధిపాదం భావేతి. అయం వుచ్చతి, భిక్ఖవే, అసఙ్ఖతగామిమగ్గో…పే… కతమో చ, భిక్ఖవే, అసఙ్ఖతగామిమగ్గో? ఇధ, భిక్ఖవే, భిక్ఖు చిత్తసమాధిపధానసఙ్ఖారసమన్నాగతం ఇద్ధిపాదం భావేతి. అయం వుచ్చతి, భిక్ఖవే, అసఙ్ఖతగామిమగ్గో…పే… కతమో చ, భిక్ఖవే, అసఙ్ఖతగామిమగ్గో? ఇధ, భిక్ఖవే, భిక్ఖు వీమంససమాధిపధానసఙ్ఖారసమన్నాగతం ఇద్ధిపాదం భావేతి. అయం వుచ్చతి, భిక్ఖవే, అసఙ్ఖతగామిమగ్గో…పే….

‘‘కతమో చ, భిక్ఖవే, అసఙ్ఖతగామిమగ్గో? ఇధ, భిక్ఖవే, భిక్ఖు సద్ధిన్ద్రియం భావేతి వివేకనిస్సితం విరాగనిస్సితం నిరోధనిస్సితం వోస్సగ్గపరిణామిం. అయం వుచ్చతి, భిక్ఖవే, అసఙ్ఖతగామిమగ్గో…పే… కతమో చ, భిక్ఖవే, అసఙ్ఖతగామిమగ్గో? ఇధ, భిక్ఖవే, భిక్ఖు వీరియిన్ద్రియం భావేతి వివేకనిస్సితం…పే… అయం వుచ్చతి, భిక్ఖవే, అసఙ్ఖతగామిమగ్గో…పే… కతమో చ, భిక్ఖవే, అసఙ్ఖతగామిమగ్గో? ఇధ, భిక్ఖవే, భిక్ఖు సతిన్ద్రియం భావేతి…పే… అయం వుచ్చతి, భిక్ఖవే, అసఙ్ఖతగామిమగ్గో…పే… కతమో చ, భిక్ఖవే, అసఙ్ఖతగామిమగ్గో? ఇధ, భిక్ఖవే, భిక్ఖు సమాధిన్ద్రియం భావేతి…పే… అయం వుచ్చతి, భిక్ఖవే, అసఙ్ఖతగామిమగ్గో…పే… కతమో చ, భిక్ఖవే, అసఙ్ఖతగామిమగ్గో? ఇధ, భిక్ఖవే, భిక్ఖు పఞ్ఞిన్ద్రియం భావేతి వివేకనిస్సితం విరాగనిస్సితం నిరోధనిస్సితం వోస్సగ్గపరిణామిం. అయం వుచ్చతి, భిక్ఖవే, అసఙ్ఖతగామిమగ్గో…పే….

‘‘కతమో చ, భిక్ఖవే, అసఙ్ఖతగామిమగ్గో? ఇధ, భిక్ఖవే, భిక్ఖు సద్ధాబలం భావేతి వివేకనిస్సితం…పే… అయం వుచ్చతి, భిక్ఖవే, అసఙ్ఖతగామిమగ్గో…పే… కతమో చ, భిక్ఖవే, అసఙ్ఖతగామిమగ్గో? ఇధ, భిక్ఖవే, భిక్ఖు వీరియబలం భావేతి…పే… అయం వుచ్చతి, భిక్ఖవే, అసఙ్ఖతగామిమగ్గో…పే… కతమో చ, భిక్ఖవే, అసఙ్ఖతగామిమగ్గో? ఇధ, భిక్ఖవే, భిక్ఖు సతిబలం భావేతి…పే… అయం వుచ్చతి, భిక్ఖవే, అసఙ్ఖతగామిమగ్గో…పే… కతమో చ, భిక్ఖవే, అసఙ్ఖతగామిమగ్గో? ఇధ, భిక్ఖవే, భిక్ఖు సమాధిబలం భావేతి…పే… అయం వుచ్చతి, భిక్ఖవే, అసఙ్ఖతగామిమగ్గో…పే… కతమో చ, భిక్ఖవే, అసఙ్ఖతగామిమగ్గో? ఇధ, భిక్ఖవే, భిక్ఖు పఞ్ఞాబలం భావేతి వివేకనిస్సితం విరాగనిస్సితం నిరోధనిస్సితం వోస్సగ్గపరిణామిం. అయం వుచ్చతి, భిక్ఖవే, అసఙ్ఖతగామిమగ్గో…పే….

‘‘కతమో చ, భిక్ఖవే, అసఙ్ఖతగామిమగ్గో? ఇధ, భిక్ఖవే, భిక్ఖు సతిసమ్బోజ్ఝఙ్గం భావేతి…పే… అయం వుచ్చతి, భిక్ఖవే, అసఙ్ఖతగామిమగ్గో…పే… కతమో చ, భిక్ఖవే, అసఙ్ఖతగామిమగ్గో? ఇధ, భిక్ఖవే, భిక్ఖు ధమ్మవిచయసమ్బోజ్ఝఙ్గం భావేతి…పే… వీరియసమ్బోజ్ఝఙ్గం భావేతి…పే… పీతిసమ్బోజ్ఝఙ్గం భావేతి…పే… పస్సద్ధిసమ్బోజ్ఝఙ్గం భావేతి…పే… సమాధిసమ్బోజ్ఝఙ్గం భావేతి…పే… ఉపేక్ఖాసమ్బోజ్ఝఙ్గం భావేతి వివేకనిస్సితం విరాగనిస్సితం నిరోధనిస్సితం వోస్సగ్గపరిణామిం. అయం వుచ్చతి, భిక్ఖవే, అసఙ్ఖతగామిమగ్గో…పే….

‘‘కతమో చ, భిక్ఖవే, అసఙ్ఖతగామిమగ్గో? ఇధ, భిక్ఖవే, భిక్ఖు సమ్మాదిట్ఠిం భావేతి వివేకనిస్సితం విరాగనిస్సితం నిరోధనిస్సితం వోస్సగ్గపరిణామిం. అయం వుచ్చతి, భిక్ఖవే, అసఙ్ఖతగామిమగ్గో…పే… కతమో చ, భిక్ఖవే, అసఙ్ఖతగామిమగ్గో? ఇధ, భిక్ఖవే, భిక్ఖు సమ్మాసఙ్కప్పం భావేతి …పే… సమ్మావాచం భావేతి…పే… సమ్మాకమ్మన్తం భావేతి…పే… సమ్మాఆజీవం భావేతి…పే… సమ్మావాయామం భావేతి…పే… సమ్మాసతిం భావేతి…పే… అసఙ్ఖతఞ్చ వో భిక్ఖవే, దేసేస్సామి అసఙ్ఖతగామిఞ్చ మగ్గం. తం సుణాథ. కతమఞ్చ, భిక్ఖవే, అసఙ్ఖతం…పే…? కతమో చ, భిక్ఖవే, అసఙ్ఖతగామిమగ్గో? ఇధ, భిక్ఖవే, భిక్ఖు సమ్మాసమాధిం భావేతి వివేకనిస్సితం విరాగనిస్సితం నిరోధనిస్సితం వోస్సగ్గపరిణామిం. అయం వుచ్చతి, భిక్ఖవే, అసఙ్ఖతగామిమగ్గో. ఇతి ఖో, భిక్ఖవే, దేసితం వో మయా అసఙ్ఖతం, దేసితో అసఙ్ఖతగామిమగ్గో. యం, భిక్ఖవే, సత్థారా కరణీయం సావకానం హితేసినా అనుకమ్పకేన అనుకమ్పం ఉపాదాయ, కతం వో తం మయా. ఏతాని, భిక్ఖవే, రుక్ఖమూలాని, ఏతాని సుఞ్ఞాగారాని. ఝాయథ, భిక్ఖవే, మా పమాదత్థ; మా పచ్ఛా విప్పటిసారినో అహువత్థ. అయం వో అమ్హాకం అనుసాసనీ’’తి. పఠమం.

౨. అనతసుత్తం

౩౭౮. ‘‘అనతఞ్చ వో, భిక్ఖవే, దేసేస్సామి, అనతగామిఞ్చ మగ్గం. తం సుణాథ. కతమఞ్చ, భిక్ఖవే, అనతం…పే…’’. (యథా అసఙ్ఖతం తథా విత్థారేతబ్బం). దుతియం.

౩-౩౨. అనాసవాదిసుత్తం

౩౭౯-౪౦౮. ‘‘అనాసవఞ్చ వో, భిక్ఖవే, దేసేస్సామి అనాసవగామిఞ్చ మగ్గం. తం సుణాథ. కతమఞ్చ, భిక్ఖవే, అనాసవం…పే… సచ్చఞ్చ వో, భిక్ఖవే, దేసేస్సామి సచ్చగామిఞ్చ మగ్గం. తం సుణాథ. కతమఞ్చ, భిక్ఖవే, సచ్చం…పే… పారఞ్చ వో, భిక్ఖవే, దేసేస్సామి పారగామిఞ్చ మగ్గం. తం సుణాథ. కతమఞ్చ, భిక్ఖవే, పారం…పే… నిపుణఞ్చ వో, భిక్ఖవే, దేసేస్సామి నిపుణగామిఞ్చ మగ్గం. తం సుణాథ. కతమఞ్చ, భిక్ఖవే, నిపుణం…పే… సుదుద్దసఞ్చ వో, భిక్ఖవే, దేసేస్సామి సుదుద్దసగామిఞ్చ మగ్గం. తం సుణాథ. కతమఞ్చ, భిక్ఖవే, సుదుద్దసం…పే… అజజ్జరఞ్చ వో, భిక్ఖవే, దేసేస్సామి అజజ్జరగామిఞ్చ మగ్గం. తం సుణాథ. కతమఞ్చ, భిక్ఖవే, అజజ్జరం…పే… ధువఞ్చ వో, భిక్ఖవే, దేసేస్సామి ధువగామిఞ్చ మగ్గం. తం సుణాథ. కతమఞ్చ, భిక్ఖవే, ధువం…పే… అపలోకితఞ్చ వో, భిక్ఖవే, దేసేస్సామి అపలోకితగామిఞ్చ మగ్గం. తం సుణాథ. కతమఞ్చ, భిక్ఖవే, అపలోకితం…పే… అనిదస్సనఞ్చ వో, భిక్ఖవే, దేసేస్సామి అనిదస్సనగామిఞ్చ మగ్గం. తం సుణాథ. కతమఞ్చ, భిక్ఖవే, అనిదస్సనం…పే… నిప్పపఞ్చఞ్చ వో, భిక్ఖవే, దేసేస్సామి నిప్పపఞ్చగామిఞ్చ మగ్గం. తం సుణాథ. కతమఞ్చ, భిక్ఖవే, నిప్పపఞ్చం…పే…?

‘‘సన్తఞ్చ వో, భిక్ఖవే, దేసేస్సామి సన్తగామిఞ్చ మగ్గం. తం సుణాథ. కతమఞ్చ, భిక్ఖవే, సన్తం…పే… అమతఞ్చ వో, భిక్ఖవే, దేసేస్సామి అమతగామిఞ్చ మగ్గం. తం సుణాథ. కతమఞ్చ, భిక్ఖవే, అమతం…పే… పణీతఞ్చ వో, భిక్ఖవే, దేసేస్సామి పణీతగామిఞ్చ మగ్గం. తం సుణాథ. కతమఞ్చ, భిక్ఖవే, పణీతం…పే… సివఞ్చ వో, భిక్ఖవే, దేసేస్సామి సివగామిఞ్చ మగ్గం. తం సుణాథ. కతమఞ్చ, భిక్ఖవే, సివం…పే… ఖేమఞ్చ వో, భిక్ఖవే, దేసేస్సామి ఖేమగామిఞ్చ మగ్గం. తం సుణాథ. కతమఞ్చ, భిక్ఖవే, ఖేమం…పే… తణ్హాక్ఖయఞ్చ వో, భిక్ఖవే, దేసేస్సామి తణ్హాక్ఖయగామిఞ్చ మగ్గం. తం సుణాథ. కతమఞ్చ, భిక్ఖవే, తణ్హాక్ఖయం…పే…?

‘‘అచ్ఛరియఞ్చ వో, భిక్ఖవే, దేసేస్సామి అచ్ఛరియగామిఞ్చ మగ్గం. తం సుణాథ. కతమఞ్చ, భిక్ఖవే, అచ్ఛరియం…పే… అబ్భుతఞ్చ వో, భిక్ఖవే, దేసేస్సామి అబ్భుతగామిఞ్చ మగ్గం. తం సుణాథ. కతమఞ్చ, భిక్ఖవే, అబ్భుతం…పే… అనీతికఞ్చ వో, భిక్ఖవే, దేసేస్సామి అనీతికగామిఞ్చ మగ్గం. తం సుణాథ. కతమఞ్చ, భిక్ఖవే, అనీతికం…పే… అనీతికధమ్మఞ్చ వో, భిక్ఖవే, దేసేస్సామి అనీతికధమ్మగామిఞ్చ మగ్గం. తం సుణాథ. కతమఞ్చ, భిక్ఖవే, అనీతికధమ్మం…పే… నిబ్బానఞ్చ వో, భిక్ఖవే, దేసేస్సామి నిబ్బానగామిఞ్చ మగ్గం. తం సుణాథ. కతమఞ్చ, భిక్ఖవే, నిబ్బానం…పే… అబ్యాపజ్ఝఞ్చ [అబ్యాపజ్ఝఞ్చ (సీ. స్యా. కం. పీ.)] వో, భిక్ఖవే, దేసేస్సామి అబ్యాపజ్ఝగామిఞ్చ మగ్గం. తం సుణాథ. కతమఞ్చ, భిక్ఖవే, అబ్యాపజ్ఝం…పే… విరాగఞ్చ వో, భిక్ఖవే, దేసేస్సామి విరాగగామిఞ్చ మగ్గం. తం సుణాథ. కతమో చ, భిక్ఖవే, విరాగో…పే…?

‘‘సుద్ధిఞ్చ వో, భిక్ఖవే, దేసేస్సామి సుద్ధిగామిఞ్చ మగ్గం. తం సుణాథ. కతమా చ, భిక్ఖవే, సుద్ధి…పే… ముత్తిఞ్చ వో, భిక్ఖవే, దేసేస్సామి ముత్తిగామిఞ్చ మగ్గం. తం సుణాథ. కతమా చ, భిక్ఖవే, ముత్తి…పే… అనాలయఞ్చ వో, భిక్ఖవే, దేసేస్సామి అనాలయగామిఞ్చ మగ్గం. తం సుణాథ. కతమో చ, భిక్ఖవే, అనాలయో…పే… దీపఞ్చ వో, భిక్ఖవే, దేసేస్సామి దీపగామిఞ్చ మగ్గం. తం సుణాథ. కతమఞ్చ, భిక్ఖవే, దీపం…పే… లేణఞ్చ వో, భిక్ఖవే, దేసేస్సామి లేణగామిఞ్చ మగ్గం. తం సుణాథ. కతమఞ్చ, భిక్ఖవే, లేణం…పే… తాణఞ్చ వో, భిక్ఖవే, దేసేస్సామి తాణగామిఞ్చ మగ్గం. తం సుణాథ. కతమఞ్చ, భిక్ఖవే, తాణం…పే… సరణఞ్చ వో, భిక్ఖవే, దేసేస్సామి సరణగామిఞ్చ మగ్గం. తం సుణాథ. కతమఞ్చ, భిక్ఖవే, సరణం…పే…అనుసాసనీ’’తి? బాత్తింసతిమం.

౩౩. పరాయనసుత్తం

౪౦౯. ‘‘పరాయనఞ్చ [పరాయణఞ్చ (పీ. సీ. అట్ఠ.)] వో, భిక్ఖవే, దేసేస్సామి పరాయనగామిఞ్చ మగ్గం. తం సుణాథ. కతమఞ్చ, భిక్ఖవే, పరాయనం? యో, భిక్ఖవే, రాగక్ఖయో దోసక్ఖయో మోహక్ఖయో – ఇదం వుచ్చతి, భిక్ఖవే, పరాయనం. కతమో చ, భిక్ఖవే, పరాయనగామీ మగ్గో? కాయగతాసతి. అయం వుచ్చతి, భిక్ఖవే, పరాయనగామిమగ్గో. ఇతి ఖో, భిక్ఖవే, దేసితం వో మయా పరాయనం, దేసితో పరాయనగామిమగ్గో. యం, భిక్ఖవే, సత్థారా కరణీయం సావకానం హితేసినా అనుకమ్పకేన అనుకమ్పం ఉపాదాయ, కతం వో తం మయా. ఏతాని, భిక్ఖవే, రుక్ఖమూలాని, ఏతాని సుఞ్ఞాగారాని. ఝాయథ, భిక్ఖవే, మా పమాదత్థ; మా పచ్ఛా విప్పటిసారినో అహువత్థ. అయం వో అమ్హాకం అనుసాసనీ’’తి. (యథా అసఙ్ఖతం తథా విత్థారేతబ్బం). తేత్తింసతిమం.

దుతియో వగ్గో.

తస్సుద్దానం –

అసఙ్ఖతం అనతం అనాసవం, సచ్చఞ్చ పారం నిపుణం సుదుద్దసం;

అజజ్జరం ధువం అపలోకితం, అనిదస్సనం నిప్పపఞ్చ సన్తం.

అమతం పణీతఞ్చ సివఞ్చ ఖేమం, తణ్హాక్ఖయో అచ్ఛరియఞ్చ అబ్భుతం;

అనీతికం అనీతికధమ్మం, నిబ్బానమేతం సుగతేన దేసితం.

అబ్యాపజ్ఝో విరాగో చ, సుద్ధి ముత్తి అనాలయో;

దీపో లేణఞ్చ తాణఞ్చ, సరణఞ్చ పరాయనన్తి.

అసఙ్ఖతసంయుత్తం సమత్తం.