౧. పఠమవగ్గో

౧. కాయగతాసతిసుత్తం

౩౬౬. సావత్థినిదానం. ‘‘అసఙ్ఖతఞ్చ వో, భిక్ఖవే, దేసేస్సామి అసఙ్ఖతగామిఞ్చ మగ్గం. తం సుణాథ. కతమఞ్చ, భిక్ఖవే, అసఙ్ఖతం? యో, భిక్ఖవే, రాగక్ఖయో దోసక్ఖయో మోహక్ఖయో – ఇదం వుచ్చతి, భిక్ఖవే, అసఙ్ఖతం. కతమో చ, భిక్ఖవే, అసఙ్ఖతగామిమగ్గో? కాయగతాసతి. అయం వుచ్చతి, భిక్ఖవే, అసఙ్ఖతగామిమగ్గో’’.

‘‘ఇతి ఖో, భిక్ఖవే, దేసితం వో మయా అసఙ్ఖతం, దేసితో అసఙ్ఖతగామిమగ్గో. యం, భిక్ఖవే, సత్థారా కరణీయం సావకానం హితేసినా అనుకమ్పకేన అనుకమ్పం ఉపాదాయ, కతం వో తం మయా. ఏతాని, భిక్ఖవే, రుక్ఖమూలాని, ఏతాని సుఞ్ఞాగారాని. ఝాయథ [నిజ్ఝాయథ (క.)], భిక్ఖవే, మా పమాదత్థ; మా పచ్ఛా విప్పటిసారినో అహువత్థ. అయం వో అమ్హాకం అనుసాసనీ’’తి. పఠమం.

౨. సమథవిపస్సనాసుత్తం

౩౬౭. ‘‘అసఙ్ఖతఞ్చ వో, భిక్ఖవే, దేసేస్సామి అసఙ్ఖతగామిఞ్చ మగ్గం. తం సుణాథ. కతమఞ్చ, భిక్ఖవే, అసఙ్ఖతం? యో, భిక్ఖవే, రాగక్ఖయో దోసక్ఖయో మోహక్ఖయో – ఇదం వుచ్చతి, భిక్ఖవే, అసఙ్ఖతం. కతమో చ, భిక్ఖవే, అసఙ్ఖతగామిమగ్గో? సమథో చ విపస్సనా చ. అయం వుచ్చతి, భిక్ఖవే, అసఙ్ఖతగామిమగ్గో…పే…. దుతియం.

౩. సవితక్కసవిచారసుత్తం

౩౬౮. ‘‘కతమో చ, భిక్ఖవే, అసఙ్ఖతగామిమగ్గో? సవితక్కసవిచారో సమాధి, అవితక్కవిచారమత్తో సమాధి, అవితక్కఅవిచారో సమాధి – అయం వుచ్చతి, భిక్ఖవే, అసఙ్ఖతగామిమగ్గో…పే…. తతియం.

౪. సుఞ్ఞతసమాధిసుత్తం

౩౬౯. ‘‘కతమో చ, భిక్ఖవే, అసఙ్ఖతగామిమగ్గో? సుఞ్ఞతో సమాధి, అనిమిత్తో సమాధి, అప్పణిహితో సమాధి – అయం వుచ్చతి, భిక్ఖవే, అసఙ్ఖతగామిమగ్గో…పే…. చతుత్థం.

౫. సతిపట్ఠానసుత్తం

౩౭౦. ‘‘కతమో చ, భిక్ఖవే, అసఙ్ఖతగామిమగ్గో? చత్తారో సతిపట్ఠానా. అయం వుచ్చతి, భిక్ఖవే, అసఙ్ఖతగామిమగ్గో…పే…. పఞ్చమం.

౬. సమ్మప్పధానసుత్తం

౩౭౧. ‘‘కతమో చ, భిక్ఖవే, అసఙ్ఖతగామిమగ్గో? చత్తారో సమ్మప్పధానా. అయం వుచ్చతి, భిక్ఖవే, అసఙ్ఖతగామిమగ్గో…పే…. ఛట్ఠం.

౭. ఇద్ధిపాదసుత్తం

౩౭౨. ‘‘కతమో చ, భిక్ఖవే, అసఙ్ఖతగామిమగ్గో? చత్తారో ఇద్ధిపాదా. అయం వుచ్చతి, భిక్ఖవే, అసఙ్ఖతగామిమగ్గో…పే…. సత్తమం.

౮. ఇన్ద్రియసుత్తం

౩౭౩. ‘‘కతమో చ, భిక్ఖవే, అసఙ్ఖతగామిమగ్గో? పఞ్చిన్ద్రియాని. అయం వుచ్చతి, భిక్ఖవే, అసఙ్ఖతగామిమగ్గో…పే…. అట్ఠమం.

౯. బలసుత్తం

౩౭౪. ‘‘కతమో చ, భిక్ఖవే, అసఙ్ఖతగామిమగ్గో? పఞ్చ బలాని. అయం వుచ్చతి, భిక్ఖవే, అసఙ్ఖతగామిమగ్గో…పే…. నవమం.

౧౦. బోజ్ఝఙ్గసుత్తం

౩౭౫. ‘‘కతమో చ, భిక్ఖవే, అసఙ్ఖతగామిమగ్గో? సత్త బోజ్ఝఙ్గా. అయం వుచ్చతి, భిక్ఖవే, అసఙ్ఖతగామిమగ్గో…పే…. దసమం.

౧౧. మగ్గఙ్గసుత్తం

౩౭౬. ‘‘కతమో చ, భిక్ఖవే, అసఙ్ఖతగామిమగ్గో? అరియో అట్ఠఙ్గికో మగ్గో. అయం వుచ్చతి, భిక్ఖవే, అసఙ్ఖతగామిమగ్గో. ఇతి ఖో, భిక్ఖవే, దేసితం వో మయా అసఙ్ఖతం, దేసితో అసఙ్ఖతగామిమగ్గో. యం, భిక్ఖవే, సత్థారా కరణీయం సావకానం హితేసినా అనుకమ్పకేన అనుకమ్పం ఉపాదాయ కతం వో తం మయా. ఏతాని, భిక్ఖవే, రుక్ఖమూలాని, ఏతాని సుఞ్ఞాగారాని. ఝాయథ, భిక్ఖవే, మా పమాదత్థ; మా పచ్ఛా విప్పటిసారినో అహువత్థ. అయం వో అమ్హాకం అనుసాసనీ’’తి. ఏకాదసమం.

పఠమో వగ్గో.

తస్సుద్దానం –

కాయో సమథో సవితక్కో, సుఞ్ఞతో సతిపట్ఠానా;

సమ్మప్పధానా ఇద్ధిపాదా, ఇన్ద్రియబలబోజ్ఝఙ్గా;

మగ్గేన ఏకాదసమం, తస్సుద్దానం పవుచ్చతి.