౧౨. రాసియసుత్తం

౩౬౪. అథ ఖో రాసియో గామణి యేన భగవా తేనుపసఙ్కమి; ఉపసఙ్కమిత్వా భగవన్తం అభివాదేత్వా ఏకమన్తం నిసీది. ఏకమన్తం నిసిన్నో ఖో రాసియో గామణి భగవన్తం ఏతదవోచ – ‘‘సుతం మేతం, భన్తే, ‘సమణో గోతమో సబ్బం తపం గరహతి, సబ్బం తపస్సిం లూఖజీవిం ఏకంసేన ఉపవదతి ఉపక్కోసతీ’తి [ఉపక్కోసతి ఉపవదతీతి (దీ. ని. ౧.౩౮౧)]. యే తే, భన్తే, ఏవమాహంసు – ‘సమణో గోతమో సబ్బం తపం గరహతి, సబ్బం తపస్సిం లూఖజీవిం ఏకంసేన ఉపవదతి ఉపక్కోసతీ’తి, కచ్చి తే, భన్తే, భగవతో వుత్తవాదినో, న చ భగవన్తం అభూతేన అబ్భాచిక్ఖన్తి, ధమ్మస్స చానుధమ్మం బ్యాకరోన్తి, న చ కోచి సహధమ్మికో వాదానువాదో గారయ్హం ఠానం ఆగచ్ఛతీ’’తి? ‘‘యే తే, గామణి, ఏవమాహంసు – ‘సమణో గోతమో సబ్బం తపం గరహతి, సబ్బం తపస్సిం లూఖజీవిం ఏకంసేన ఉపవదతి ఉపక్కోసతీ’తి, న మే తే వుత్తవాదినో, అబ్భాచిక్ఖన్తి చ పన మం తే అసతా తుచ్ఛా అభూతేన’’.

‘‘ద్వేమే, గామణి, అన్తా పబ్బజితేన న సేవితబ్బా – యో చాయం కామేసు కామసుఖల్లికానుయోగో హీనో గమ్మో పోథుజ్జనికో అనరియో అనత్థసంహితో, యో చాయం అత్తకిలమథానుయోగో దుక్ఖో అనరియో అనత్థసంహితో. ఏతే తే, గామణి, ఉభో అన్తే అనుపగమ్మ మజ్ఝిమా పటిపదా తథాగతేన అభిసమ్బుద్ధా – చక్ఖుకరణీ ఞాణకరణీ ఉపసమాయ అభిఞ్ఞాయ సమ్బోధాయ నిబ్బానాయ సంవత్తతి. కతమా చ సా, గామణి, మజ్ఝిమా పటిపదా తథాగతేన అభిసమ్బుద్ధా – చక్ఖుకరణీ ఞాణకరణీ ఉపసమాయ అభిఞ్ఞాయ సమ్బోధాయ నిబ్బానాయ సంవత్తతి? అయమేవ అరియో అట్ఠఙ్గికో మగ్గో, సేయ్యథిదం – సమ్మాదిట్ఠి…పే… సమ్మాసమాధి. అయం ఖో సా, గామణి, మజ్ఝిమా పటిపదా తథాగతేన అభిసమ్బుద్ధా – చక్ఖుకరణీ ఞాణకరణీ ఉపసమాయ అభిఞ్ఞాయ సమ్బోధాయ నిబ్బానాయ సంవత్తతి.

‘‘తయో ఖో మే, గామణి, కామభోగినో సన్తో సంవిజ్జమానా లోకస్మిం. కతమే తయో? ఇధ, గామణి, ఏకచ్చో కామభోగీ అధమ్మేన భోగే పరియేసతి, సాహసేన అధమ్మేన భోగే పరియేసిత్వా సాహసేన న అత్తానం సుఖేతి న పీణేతి న సంవిభజతి న పుఞ్ఞాని కరోతి. ఇధ పన, గామణి, ఏకచ్చో కామభోగీ అధమ్మేన భోగే పరియేసతి సాహసేన. అధమ్మేన భోగే పరియేసిత్వా సాహసేన అత్తానం సుఖేతి పీణేతి, న సంవిభజతి న పుఞ్ఞాని కరోతి. ఇధ పన, గామణి, ఏకచ్చో కామభోగీ అధమ్మేన భోగే పరియేసతి సాహసేన. అధమ్మేన భోగే పరియేసిత్వా సాహసేన అత్తానం సుఖేతి పీణేతి సంవిభజతి పుఞ్ఞాని కరోతి.

‘‘ఇధ పన, గామణి, ఏకచ్చో కామభోగీ ధమ్మాధమ్మేన భోగే పరియేసతి సాహసేనపి అసాహసేనపి. ధమ్మాధమ్మేన భోగే పరియేసిత్వా సాహసేనపి అసాహసేనపి న అత్తానం సుఖేతి, న పీణేతి, న సంవిభజతి, న పుఞ్ఞాని కరోతి. ఇధ పన, గామణి, ఏకచ్చో కామభోగీ ధమ్మాధమ్మేన భోగే పరియేసతి సాహసేనపి అసాహసేనపి. ధమ్మాధమ్మేన భోగే పరియేసిత్వా సాహసేనపి అసాహసేనపి అత్తానం సుఖేతి పీణేతి, న సంవిభజతి, న పుఞ్ఞాని కరోతి. ఇధ పన, గామణి, ఏకచ్చో కామభోగీ ధమ్మాధమ్మేన భోగే పరియేసతి, సాహసేనపి అసాహసేనపి. ధమ్మాధమ్మేన భోగే పరియేసిత్వా సాహసేనపి అసాహసేనపి అత్తానం సుఖేతి పీణేతి సంవిభజతి పుఞ్ఞాని కరోతి.

‘‘ఇధ పన, గామణి, ఏకచ్చో కామభోగీ ధమ్మేన భోగే పరియేసతి అసాహసేన. ధమ్మేన భోగే పరియేసిత్వా అసాహసేన న అత్తానం సుఖేతి, న పీణేతి, న సంవిభజతి, న పుఞ్ఞాని కరోతి. ఇధ పన, గామణి, ఏకచ్చో కామభోగీ ధమ్మేన భోగే పరియేసతి అసాహసేన. ధమ్మేన భోగే పరియేసిత్వా అసాహసేన అత్తానం సుఖేతి పీణేతి, న సంవిభజతి, న పుఞ్ఞాని కరోతి. ఇధ పన, గామణి, ఏకచ్చో కామభోగీ ధమ్మేన భోగే పరియేసతి అసాహసేన. ధమ్మేన భోగే పరియేసిత్వా అసాహసేన అత్తానం సుఖేతి పీణేతి సంవిభజతి పుఞ్ఞాని కరోతి. తే చ భోగే గధితో [గథితో (సీ.)] ముచ్ఛితో అజ్ఝోపన్నో అనాదీనవదస్సావీ అనిస్సరణపఞ్ఞో పరిభుఞ్జతి. ఇధ పన, గామణి, ఏకచ్చో కామభోగీ ధమ్మేన భోగే పరియేసతి అసాహసేన. ధమ్మేన భోగే పరియేసిత్వా అసాహసేన అత్తానం సుఖేతి పీణేతి సంవిభజతి పుఞ్ఞాని కరోతి. తే చ భోగే అగధితో అముచ్ఛితో అనజ్ఝోపన్నో ఆదీనవదస్సావీ నిస్సరణపఞ్ఞో పరిభుఞ్జతి.

‘‘తత్ర, గామణి, య్వాయం కామభోగీ అధమ్మేన భోగే పరియేసతి సాహసేన, అధమ్మేన భోగే పరియేసిత్వా సాహసేన న అత్తానం సుఖేతి, న పీణేతి, న సంవిభజతి, న పుఞ్ఞాని కరోతి. అయం, గామణి, కామభోగీ తీహి ఠానేహి గారయ్హో. కతమేహి తీహి ఠానేహి గారయ్హో? అధమ్మేన భోగే పరియేసతి సాహసేనాతి, ఇమినా పఠమేన ఠానేన గారయ్హో. న అత్తానం సుఖేతి న పీణేతీతి, ఇమినా దుతియేన ఠానేన గారయ్హో. న సంవిభజతి, న పుఞ్ఞాని కరోతీతి, ఇమినా తతియేన ఠానేన గారయ్హో. అయం, గామణి, కామభోగీ ఇమేహి తీహి ఠానేహి గారయ్హో.

‘‘తత్ర, గామణి, య్వాయం కామభోగీ అధమ్మేన భోగే పరియేసతి సాహసేన, అధమ్మేన భోగే పరియేసిత్వా సాహసేన అత్తానం సుఖేతి పీణేతి, న సంవిభజతి, న పుఞ్ఞాని కరోతి. అయం, గామణి, కామభోగీ ద్వీహి ఠానేహి గారయ్హో, ఏకేన ఠానేన పాసంసో. కతమేహి ద్వీహి ఠానేహి గారయ్హో? అధమ్మేన భోగే పరియేసతి సాహసేనాతి, ఇమినా పఠమేన ఠానేన గారయ్హో. న సంవిభజతి, న పుఞ్ఞాని కరోతీతి, ఇమినా దుతియేన ఠానేన గారయ్హో. కతమేన ఏకేన ఠానేన పాసంసో? అత్తానం సుఖేతి పీణేతీతి, ఇమినా ఏకేన ఠానేన పాసంసో. అయం, గామణి, కామభోగీ ఇమేహి ద్వీహి ఠానేహి గారయ్హో, ఇమినా ఏకేన ఠానేన పాసంసో.

‘‘తత్ర, గామణి, య్వాయం కామభోగీ అధమ్మేన భోగే పరియేసతి సాహసేన, అధమ్మేన భోగే పరియేసిత్వా సాహసేన అత్తానం సుఖేతి పీణేతి సంవిభజతి పుఞ్ఞాని కరోతి. అయం, గామణి, కామభోగీ ఏకేన ఠానేన గారయ్హో, ద్వీహి ఠానేహి పాసంసో. కతమేన ఏకేన ఠానేన గారయ్హో? అధమ్మేన భోగే పరియేసతి సాహసేనాతి, ఇమినా ఏకేన ఠానేన గారయ్హో. కతమేహి ద్వీహి ఠానేహి పాసంసో? అత్తానం సుఖేతి పీణేతీతి, ఇమినా పఠమేన ఠానేన పాసంసో. సంవిభజతి పుఞ్ఞాని కరోతీతి, ఇమినా దుతియేన ఠానేన పాసంసో. అయం, గామణి, కామభోగీ, ఇమినా ఏకేన ఠానేన గారయ్హో, ఇమేహి ద్వీహి ఠానేహి పాసంసో.

‘‘తత్ర, గామణి, య్వాయం కామభోగీ ధమ్మాధమ్మేన భోగే పరియేసతి సాహసేనపి అసాహసేనపి, ధమ్మాధమ్మేన భోగే పరియేసిత్వా సాహసేనపి అసాహసేనపి న అత్తానం సుఖేతి, న పీణేతి, న సంవిభజతి, న పుఞ్ఞాని కరోతి. అయం, గామణి, కామభోగీ ఏకేన ఠానేన పాసంసో, తీహి ఠానేహి గారయ్హో. కతమేన ఏకేన ఠానేన పాసంసో? ధమ్మేన భోగే పరియేసతి అసాహసేనాతి, ఇమినా ఏకేన ఠానేన పాసంసో. కతమేహి తీహి ఠానేహి గారయ్హో? అధమ్మేన భోగే పరియేసతి సాహసేనాతి, ఇమినా పఠమేన ఠానేన గారయ్హో. న అత్తానం సుఖేతి, న పీణేతీతి, ఇమినా దుతియేన ఠానేన గారయ్హో. న సంవిభజతి, న పుఞ్ఞాని కరోతీతి, ఇమినా తతియేన ఠానేన గారయ్హో. అయం, గామణి, కామభోగీ ఇమినా ఏకేన ఠానేన పాసంసో, ఇమేహి తీహి ఠానేహి గారయ్హో.

‘‘తత్ర, గామణి, య్వాయం కామభోగీ ధమ్మాధమ్మేన భోగే పరియేసతి సాహసేనపి అసాహసేనపి, ధమ్మాధమ్మేన భోగే పరియేసిత్వా సాహసేనపి అసాహసేనపి అత్తానం సుఖేతి పీణేతి, న సంవిభజతి, న పుఞ్ఞాని కరోతి. అయం, గామణి, కామభోగీ ద్వీహి ఠానేహి పాసంసో, ద్వీహి ఠానేహి గారయ్హో. కతమేహి ద్వీహి ఠానేహి పాసంసో? ధమ్మేన భోగే పరియేసతి అసాహసేనాతి, ఇమినా పఠమేన ఠానేన పాసంసో. అత్తానం సుఖేతి పీణేతీతి, ఇమినా దుతియేన ఠానేన పాసంసో. కతమేహి ద్వీహి ఠానేహి గారయ్హో? అధమ్మేన భోగే పరియేసతి సాహసేనాతి, ఇమినా పఠమేన ఠానేన గారయ్హో. న సంవిభజతి, న పుఞ్ఞాని కరోతీతి, ఇమినా దుతియేన ఠానేన గారయ్హో. అయం, గామణి, కామభోగీ ఇమేహి ద్వీహి ఠానేహి పాసంసో, ఇమేహి ద్వీహి ఠానేహి గారయ్హో.

‘‘తత్ర, గామణి, య్వాయం కామభోగీ ధమ్మాధమ్మేన భోగే పరియేసతి సాహసేనపి అసాహసేనపి, ధమ్మాధమ్మేన భోగే పరియేసిత్వా సాహసేనపి అసాహసేనపి అత్తానం సుఖేతి పీణేతి సంవిభజతి పుఞ్ఞాని కరోతి. అయం, గామణి, కామభోగీ తీహి ఠానేహి పాసంసో, ఏకేన ఠానేన గారయ్హో. కతమేహి తీహి ఠానేహి పాసంసో? ధమ్మేన భోగే పరియేసతి అసాహసేనాతి, ఇమినా పఠమేన ఠానేన పాసంసో. అత్తానం సుఖేతి పీణేతీతి, ఇమినా దుతియేన ఠానేన పాసంసో. సంవిభజతి పుఞ్ఞాని కరోతీతి, ఇమినా తతియేన ఠానేన పాసంసో. కతమేన ఏకేన ఠానేన గారయ్హో? అధమ్మేన భోగే పరియేసతి సాహసేనాతి, ఇమినా ఏకేన ఠానేన గారయ్హో. అయం, గామణి, కామభోగీ ఇమేహి తీహి ఠానేహి పాసంసో, ఇమినా ఏకేన ఠానేన గారయ్హో.

‘‘తత్ర, గామణి, య్వాయం కామభోగీ ధమ్మేన భోగే పరియేసతి అసాహసేన, ధమ్మేన భోగే పరియేసిత్వా అసాహసేన, న అత్తానం సుఖేతి, న పీణేతి, న సంవిభజతి, న పుఞ్ఞాని కరోతి. అయం, గామణి, కామభోగీ ఏకేన ఠానేన పాసంసో, ద్వీహి ఠానేహి గారయ్హో. కతమేన ఏకేన ఠానేన పాసంసో? ధమ్మేన భోగే పరియేసతి అసాహసేనాతి, ఇమినా ఏకేన ఠానేన పాసంసో. కతమేహి ద్వీహి ఠానేహి గారయ్హో? న అత్తానం సుఖేతి, న పీణేతీతి, ఇమినా పఠమేన ఠానేన గారయ్హో. న సంవిభజతి, న పుఞ్ఞాని కరోతీతి, ఇమినా దుతియేన ఠానేన గారయ్హో. అయం, గామణి, కామభోగీ ఇమినా ఏకేన ఠానేన పాసంసో, ఇమేహి ద్వీహి ఠానేహి గారయ్హో.

‘‘తత్ర, గామణి, య్వాయం కామభోగీ ధమ్మేన భోగే పరియేసతి అసాహసేన, ధమ్మేన భోగే పరియేసిత్వా అసాహసేన అత్తానం సుఖేతి పీణేతి, న సంవిభజతి, న పుఞ్ఞాని కరోతి. అయం, గామణి, కామభోగీ ద్వీహి ఠానేహి పాసంసో, ఏకేన ఠానేన గారయ్హో. కతమేహి ద్వీహి ఠానేహి పాసంసో? ధమ్మేన భోగే పరియేసతి అసాహసేనాతి, ఇమినా పఠమేన ఠానేన పాసంసో. అత్తానం సుఖేతి పీణేతీతి, ఇమినా దుతియేన ఠానేన పాసంసో. కతమేన ఏకేన ఠానేన గారయ్హో? న సంవిభజతి, న పుఞ్ఞాని కరోతీతి, ఇమినా ఏకేన ఠానేన గారయ్హో. అయం, గామణి, కామభోగీ ఇమేహి ద్వీహి ఠానేహి పాసంసో, ఇమినా ఏకేన ఠానేన గారయ్హో.

‘‘తత్ర, గామణి, య్వాయం కామభోగీ ధమ్మేన భోగే పరియేసతి అసాహసేన, ధమ్మేన భోగే పరియేసిత్వా అసాహసేన అత్తానం సుఖేతి పీణేతి సంవిభజతి పుఞ్ఞాని కరోతి, తే చ భోగే గధితో ముచ్ఛితో అజ్ఝోపన్నో అనాదీనవదస్సావీ అనిస్సరణపఞ్ఞో పరిభుఞ్జతి. అయం, గామణి, కామభోగీ తీహి ఠానేహి పాసంసో, ఏకేన ఠానేన గారయ్హో. కతమేహి తీహి ఠానేహి పాసంసో? ధమ్మేన భోగే పరియేసతి అసాహసేనాతి, ఇమినా పఠమేన ఠానేన పాసంసో. అత్తానం సుఖేతి పీణేతీతి, ఇమినా దుతియేన ఠానేన పాసంసో. సంవిభజతి పుఞ్ఞాని కరోతీతి, ఇమినా తతియేన ఠానేన పాసంసో. కతమేన ఏకేన ఠానేన గారయ్హో? తే చ భోగే గధితో ముచ్ఛితో అజ్ఝోపన్నో అనాదీనవదస్సావీ అనిస్సరణపఞ్ఞో పరిభుఞ్జతీతి, ఇమినా ఏకేన ఠానేన గారయ్హో. అయం, గామణి, కామభోగీ ఇమేహి తీహి ఠానేహి పాసంసో, ఇమినా ఏకేన ఠానేన గారయ్హో.

‘‘తత్ర, గామణి, య్వాయం కామభోగీ ధమ్మేన భోగే పరియేసతి అసాహసేన, ధమ్మేన భోగే పరియేసిత్వా అసాహసేన అత్తానం సుఖేతి పీణేతి సంవిభజతి పుఞ్ఞాని కరోతి. తే చ భోగే అగధితో అముచ్ఛితో అనజ్ఝోపన్నో ఆదీనవదస్సావీ నిస్సరణపఞ్ఞో పరిభుఞ్జతి. అయం, గామణి, కామభోగీ చతూహి ఠానేహి పాసంసో. కతమేహి చతూహి ఠానేహి పాసంసో? ధమ్మేన భోగే పరియేసతి అసాహసేనాతి, ఇమినా పఠమేన ఠానేన పాసంసో. అత్తానం సుఖేతి పీణేతీతి, ఇమినా దుతియేన ఠానేన పాసంసో. సంవిభజతి పుఞ్ఞాని కరోతీతి, ఇమినా తతియేన ఠానేన పాసంసో. తే చ భోగే అగధితో అముచ్ఛితో అనజ్ఝోపన్నో ఆదీనవదస్సావీ నిస్సరణపఞ్ఞో పరిభుఞ్జతీతి, ఇమినా చతుత్థేన ఠానేన పాసంసో. అయం, గామణి, కామభోగీ ఇమేహి చతూహి ఠానేహి పాసంసో.

‘‘తయోమే, గామణి, తపస్సినో లూఖజీవినో సన్తో సంవిజ్జమానా లోకస్మిం. కతమే తయో? ఇధ, గామణి, ఏకచ్చో తపస్సీ లూఖజీవీ సద్ధా అగారస్మా అనగారియం పబ్బజితో హోతి – ‘అప్పేవ నామ కుసలం ధమ్మం అధిగచ్ఛేయ్యం, అప్పేవ నామ ఉత్తరిమనుస్సధమ్మా అలమరియఞాణదస్సనవిసేసం సచ్ఛికరేయ్య’న్తి. సో అత్తానం ఆతాపేతి పరితాపేతి, కుసలఞ్చ ధమ్మం నాధిగచ్ఛతి, ఉత్తరి చ మనుస్సధమ్మా అలమరియఞాణదస్సనవిసేసం న సచ్ఛికరోతి.

‘‘ఇధ పన, గామణి, ఏకచ్చో తపస్సీ లూఖజీవీ సద్ధా అగారస్మా అనగారియం పబ్బజితో హోతి – ‘అప్పేవ నామ కుసలం ధమ్మం అధిగచ్ఛేయ్యం, అప్పేవ నామ ఉత్తరిమనుస్సధమ్మా అలమరియఞాణదస్సనవిసేసం సచ్ఛికరేయ్య’న్తి. సో అత్తానం ఆతాపేతి పరితాపేతి, కుసలఞ్హి ఖో ధమ్మం అధిగచ్ఛతి, ఉత్తరిమనుస్సధమ్మా అలమరియఞాణదస్సనవిసేసం న సచ్ఛికరోతి.

‘‘ఇధ పన, గామణి, ఏకచ్చో తపస్సీ లూఖజీవీ సద్ధా అగారస్మా అనగారియం పబ్బజితో హోతి – ‘అప్పేవ నామ కుసలం ధమ్మం అధిగచ్ఛేయ్యం, అప్పేవ నామ ఉత్తరిమనుస్సధమ్మా అలమరియఞాణదస్సనవిసేసం సచ్ఛికరేయ్య’న్తి. సో అత్తానం ఆతాపేతి పరితాపేతి, కుసలఞ్చ ధమ్మం అధిగచ్ఛతి, ఉత్తరి చ మనుస్సధమ్మా అలమరియఞాణదస్సనవిసేసం సచ్ఛికరోతి.

‘‘తత్ర, గామణి, య్వాయం తపస్సీ లూఖజీవీ అత్తానం ఆతాపేతి పరితాపేతి, కుసలఞ్చ ధమ్మం నాధిగచ్ఛతి, ఉత్తరి చ మనుస్సధమ్మా అలమరియఞాణదస్సనవిసేసం న సచ్ఛికరోతి. అయం, గామణి, తపస్సీ లూఖజీవీ తీహి ఠానేహి గారయ్హో. కతమేహి తీహి ఠానేహి గారయ్హో? అత్తానం ఆతాపేతి పరితాపేతీతి, ఇమినా పఠమేన ఠానేన గారయ్హో. కుసలఞ్చ ధమ్మం నాధిగచ్ఛతీతి, ఇమినా దుతియేన ఠానేన గారయ్హో. ఉత్తరి చ మనుస్సధమ్మా అలమరియఞాణదస్సనవిసేసం న సచ్ఛికరోతీతి, ఇమినా తతియేన ఠానేన గారయ్హో. అయం, గామణి, తపస్సీ లూఖజీవీ, ఇమేహి తీహి ఠానేహి గారయ్హో.

‘‘తత్ర, గామణి, య్వాయం తపస్సీ లూఖజీవీ అత్తానం ఆతాపేతి పరితాపేతి, కుసలఞ్హి ఖో ధమ్మం అధిగచ్ఛతి, ఉత్తరి చ మనుస్సధమ్మా అలమరియఞాణదస్సనవిసేసం న సచ్ఛికరోతి. అయం, గామణి, తపస్సీ లూఖజీవీ ద్వీహి ఠానేహి గారయ్హో, ఏకేన ఠానేన పాసంసో. కతమేహి ద్వీహి ఠానేహి గారయ్హో? అత్తానం ఆతాపేతి పరితాపేతీతి, ఇమినా పఠమేన ఠానేన గారయ్హో. ఉత్తరి చ మనుస్సధమ్మా అలమరియఞాణదస్సనవిసేసం న సచ్ఛికరోతీతి, ఇమినా దుతియేన ఠానేన గారయ్హో. కతమేన ఏకేన ఠానేన పాసంసో? కుసలఞ్హి ఖో ధమ్మం అధిగచ్ఛతీతి, ఇమినా ఏకేన ఠానేన పాసంసో. అయం, గామణి, తపస్సీ లూఖజీవీ ఇమేహి ద్వీహి ఠానేహి గారయ్హో, ఇమినా ఏకేన ఠానేన పాసంసో.

‘‘తత్ర, గామణి, య్వాయం తపస్సీ లూఖజీవీ అత్తానం ఆతాపేతి పరితాపేతి, కుసలఞ్చ ధమ్మం అధిగచ్ఛతి, ఉత్తరి చ మనుస్సధమ్మా అలమరియఞాణదస్సనవిసేసం సచ్ఛికరోతి. అయం, గామణి, తపస్సీ లూఖజీవీ ఏకేన ఠానేన గారయ్హో, ద్వీహి ఠానేహి పాసంసో. కతమేన ఏకేన ఠానేన గారయ్హో? అత్తానం ఆతాపేతి పరితాపేతీతి, ఇమినా ఏకేన ఠానేన గారయ్హో. కతమేహి ద్వీహి ఠానేహి పాసంసో? కుసలఞ్చ ధమ్మం అధిగచ్ఛతీతి, ఇమినా పఠమేన ఠానేన పాసంసో. ఉత్తరి చ మనుస్సధమ్మా అలమరియఞాణదస్సనవిసేసం సచ్ఛికరోతీతి, ఇమినా దుతియేన ఠానేన పాసంసో. అయం, గామణి, తపస్సీ లూఖజీవీ ఇమినా ఏకేన ఠానేన గారయ్హో, ఇమేహి ద్వీహి ఠానేహి పాసంసో.

‘‘తిస్సో ఇమా, గామణి, సన్దిట్ఠికా నిజ్జరా అకాలికా ఏహిపస్సికా ఓపనేయ్యికా పచ్చత్తం వేదితబ్బా విఞ్ఞూహి. కతమా తిస్సో? యం రత్తో రాగాధికరణం అత్తబ్యాబాధాయపి చేతేతి, పరబ్యాబాధాయపి చేతేతి, ఉభయబ్యాబాధాయపి చేతేతి. రాగే పహీనే నేవత్తబ్యాబాధాయ చేతేతి, న పరబ్యాబాధాయ చేతేతి, న ఉభయబ్యాబాధాయ చేతేతి. సన్దిట్ఠికా నిజ్జరా అకాలికా ఏహిపస్సికా ఓపనేయ్యికా పచ్చత్తం వేదితబ్బా విఞ్ఞూహి. యం దుట్ఠో దోసాధికరణం అత్తబ్యాబాధాయపి చేతేతి, పరబ్యాబాధాయపి చేతేతి, ఉభయబ్యాబాధాయపి చేతేతి. దోసే పహీనే నేవత్తబ్యాబాధాయ చేతేతి, న పరబ్యాబాధాయ చేతేతి, న ఉభయబ్యాబాధాయ చేతేతి. సన్దిట్ఠికా నిజ్జరా అకాలికా ఏహిపస్సికా ఓపనేయ్యికా పచ్చత్తం వేదితబ్బా విఞ్ఞూహి. యం మూళ్హో మోహాధికరణం అత్తబ్యాబాధాయపి చేతేతి, పరబ్యాబాధాయపి చేతేతి, ఉభయబ్యాబాధాయపి చేతేతి. మోహే పహీనే నేవత్తబ్యాబాధాయ చేతేతి, న పరబ్యాబాధాయ చేతేతి, న ఉభయబ్యాబాధాయ చేతేతి. సన్దిట్ఠికా నిజ్జరా అకాలికా ఏహిపస్సికా ఓపనేయ్యికా పచ్చత్తం వేదితబ్బా విఞ్ఞూహి. ఇమా ఖో, గామణి, తిస్సో సన్దిట్ఠికా నిజ్జరా అకాలికా ఏహిపస్సికా ఓపనేయ్యికా పచ్చత్తం వేదితబ్బా విఞ్ఞూహీ’’తి.

ఏవం వుత్తే, రాసియో గామణి భగవన్తం ఏతదవోచ – ‘‘అభిక్కన్తం, భన్తే…పే… ఉపాసకం మం భగవా ధారేతు అజ్జతగ్గే పాణుపేతం సరణం గత’’న్తి. ద్వాదసమం.