౧౦. మణిచూళకసుత్తం

౩౬౨. ఏకం సమయం భగవా రాజగహే విహరతి వేళువనే కలన్దకనివాపే. తేన ఖో పన సమయేన రాజన్తేపురే రాజపరిసాయ సన్నిసిన్నానం సన్నిపతితానం అయమన్తరాకథా ఉదపాది – ‘‘కప్పతి సమణానం సక్యపుత్తియానం జాతరూపరజతం, సాదియన్తి సమణా సక్యపుత్తియా జాతరూపరజతం, పటిగ్గణ్హన్తి సమణా సక్యపుత్తియా జాతరూపరజత’’న్తి!

తేన ఖో పన సమయేన మణిచూళకో గామణి తస్సం పరిసాయం నిసిన్నో హోతి. అథ ఖో మణిచూళకో గామణి తం పరిసం ఏతదవోచ – ‘‘మా అయ్యో [అయ్యా (సీ. పీ.)] ఏవం అవచుత్థ. న కప్పతి సమణానం సక్యపుత్తియానం జాతరూపరజతం, న సాదియన్తి సమణా సక్యపుత్తియా జాతరూపరజతం, నప్పటిగ్గణ్హన్తి సమణా సక్యపుత్తియా జాతరూపరజతం, నిక్ఖిత్తమణిసువణ్ణా సమణా సక్యపుత్తియా అపేతజాతరూపరజతా’’తి. అసక్ఖి ఖో మణిచూళకో గామణి తం పరిసం సఞ్ఞాపేతుం. అథ ఖో మణిచూళకో గామణి యేన భగవా తేనుపసఙ్కమి; ఉపసఙ్కమిత్వా భగవన్తం అభివాదేత్వా ఏకమన్తం నిసీది. ఏకమన్తం నిసిన్నో ఖో మణిచూళకో గామణి భగవన్తం ఏతదవోచ – ‘‘ఇధ, భన్తే, రాజన్తేపురే రాజపరిసాయ సన్నిసిన్నానం సన్నిపతితానం అయమన్తరాకథా ఉదపాది – ‘కప్పతి సమణానం సక్యపుత్తియానం జాతరూపరజతం, సాదియన్తి సమణా సక్యపుత్తియా జాతరూపరజతం, పటిగ్గణ్హన్తి సమణా సక్యపుత్తియా జాతరూపరజత’న్తి. ఏవం వుత్తే, అహం, భన్తే, తం పరిసం ఏతదవోచం – ‘మా అయ్యో ఏవం అవచుత్థ. న కప్పతి సమణానం సక్యపుత్తియానం జాతరూపరజతం, న సాదియన్తి సమణా సక్యపుత్తియా జాతరూపరజతం, నప్పటిగ్గణ్హన్తి సమణా సక్యపుత్తియా జాతరూపరజతం, నిక్ఖిత్తమణిసువణ్ణా సమణా సక్యపుత్తియా అపేతజాతరూపరజతా’తి. అసక్ఖిం ఖ్వాహం, భన్తే, తం పరిసం సఞ్ఞాపేతుం. కచ్చాహం, భన్తే, ఏవం బ్యాకరమానో వుత్తవాదీ చేవ భగవతో హోమి, న చ భగవన్తం అభూతేన అబ్భాచిక్ఖామి, ధమ్మస్స చానుధమ్మం బ్యాకరోమి, న చ కోచి సహధమ్మికో వాదానువాదో గారయ్హం ఠానం ఆగచ్ఛతీ’’తి?

‘‘తగ్ఘ త్వం, గామణి, ఏవం బ్యాకరమానో వుత్తవాదీ చేవ మే హోసి, న చ మం అభూతేన అబ్భాచిక్ఖసి, ధమ్మస్స చానుధమ్మం బ్యాకరోసి, న చ కోచి సహధమ్మికో వాదానువాదో గారయ్హం ఠానం ఆగచ్ఛతి. న హి, గామణి, కప్పతి సమణానం సక్యపుత్తియానం జాతరూపరజతం, న సాదియన్తి సమణా సక్యపుత్తియా జాతరూపరజతం, నప్పటిగ్గణ్హన్తి సమణా సక్యపుత్తియా జాతరూపరజతం, నిక్ఖిత్తమణిసువణ్ణా సమణా సక్యపుత్తియా అపేతజాతరూపరజతా. యస్స ఖో, గామణి, జాతరూపరజతం కప్పతి, పఞ్చపి తస్స కామగుణా కప్పన్తి. యస్స పఞ్చ కామగుణా కప్పన్తి ( ) [(తస్సపి జాతరూపరజతం కప్పతి,) (స్యా. కం.)], ఏకంసేనేతం, గామణి, ధారేయ్యాసి అస్సమణధమ్మో అసక్యపుత్తియధమ్మోతి. అపి చాహం, గామణి, ఏవం వదామి – తిణం తిణత్థికేన పరియేసితబ్బం, దారు దారుత్థికేన పరియేసితబ్బం, సకటం సకటత్థికేన పరియేసితబ్బం, పురిసో పురిసత్థికేన పరియేసితబ్బో [పరియేసితబ్బో’’తి (?)]. నత్వేవాహం, గామణి, కేనచి పరియాయేన ‘జాతరూపరజతం సాదితబ్బం పరియేసితబ్బ’న్తి వదామీ’’తి. దసమం.