౧. చణ్డసుత్తం

౩౫౩. సావత్థినిదానం. అథ ఖో చణ్డో గామణి యేన భగవా తేనుపసఙ్కమి; ఉపసఙ్కమిత్వా భగవన్తం అభివాదేత్వా ఏకమన్తం నిసీది. ఏకమన్తం నిసిన్నో ఖో చణ్డో గామణి భగవన్తం ఏతదవోచ – ‘‘కో ను ఖో, భన్తే, హేతు, కో పచ్చయో యేన మిధేకచ్చో చణ్డో చణ్డోత్వేవ [యేన మిధేకచ్చో చణ్డోతేవ (సీ. పీ.)] సఙ్ఖం గచ్ఛతి. కో పన, భన్తే, హేతు, కో పచ్చయో యేన మిధేకచ్చో సోరతో సోరతోత్వేవ [యేన మిధేకచ్చో సురతోతేవ (సీ. పీ.)] సఙ్ఖం గచ్ఛతీ’’తి? ‘‘ఇధ, గామణి, ఏకచ్చస్స రాగో అప్పహీనో హోతి. రాగస్స అప్పహీనత్తా పరే కోపేన్తి, పరేహి కోపియమానో కోపం పాతుకరోతి. సో చణ్డోత్వేవ సఙ్ఖం గచ్ఛతి. దోసో అప్పహీనో హోతి. దోసస్స అప్పహీనత్తా పరే కోపేన్తి, పరేహి కోపియమానో కోపం పాతుకరోతి. సో చణ్డోత్వేవ సఙ్ఖం గచ్ఛతి. మోహో అప్పహీనో హోతి. మోహస్స అప్పహీనత్తా పరే కోపేన్తి, పరేహి కోపియమానో కోపం పాతుకరోతి. సో చణ్డోత్వేవ సఙ్ఖం గచ్ఛతి. అయం ఖో, గామణి, హేతు, అయం పచ్చయో యేన మిధేకచ్చో చణ్డో చణ్డోత్వేవ సఙ్ఖం గచ్ఛతి’’.

‘‘ఇధ పన, గామణి, ఏకచ్చస్స రాగో పహీనో హోతి. రాగస్స పహీనత్తా పరే న కోపేన్తి, పరేహి కోపియమానో కోపం న పాతుకరోతి. సో సోరతోత్వేవ సఙ్ఖం గచ్ఛతి. దోసో పహీనో హోతి. దోసస్స పహీనత్తా పరే న కోపేన్తి, పరేహి కోపియమానో కోపం న పాతుకరోతి. సో సోరతోత్వేవ సఙ్ఖం గచ్ఛతి. మోహో పహీనో హోతి. మోహస్స పహీనత్తా పరే న కోపేన్తి, పరేహి కోపియమానో కోపం న పాతుకరోతి. సో సోరతోత్వేవ సఙ్ఖం గచ్ఛతి. అయం ఖో, గామణి, హేతు అయం పచ్చయో యేన మిధేకచ్చో సోరతో సోరతోత్వేవ సఙ్ఖం గచ్ఛతీ’’తి.

ఏవం వుత్తే, చణ్డో గామణి భగవన్తం ఏతదవోచ – ‘‘అభిక్కన్తం, భన్తే, అభిక్కన్తం, భన్తే! సేయ్యథాపి, భన్తే, నిక్కుజ్జితం వా ఉక్కుజ్జేయ్య, పటిచ్ఛన్నం వా వివరేయ్య, మూళ్హస్స వా మగ్గం ఆచిక్ఖేయ్య, అన్ధకారే వా తేలపజ్జోతం ధారేయ్య – చక్ఖుమన్తో రూపాని దక్ఖన్తీతి; ఏవమేవం భగవతా అనేకపరియాయేన ధమ్మో పకాసితో. ఏసాహం, భన్తే, భగవన్తం సరణం గచ్ఛామి ధమ్మఞ్చ భిక్ఖుసఙ్ఘఞ్చ. ఉపాసకం మం భగవా ధారేతు అజ్జతగ్గే పాణుపేతం సరణం గత’’న్తి. పఠమం.