౫. అఙ్గసుత్తం

౩౦౮. ‘‘పఞ్చిమాని, భిక్ఖవే, మాతుగామస్స బలాని. కతమాని పఞ్చ? రూపబలం, భోగబలం, ఞాతిబలం, పుత్తబలం, సీలబలం. రూపబలేన చ, భిక్ఖవే, మాతుగామో సమన్నాగతో హోతి, న చ భోగబలేన – ఏవం సో తేనఙ్గేన అపరిపూరో హోతి. యతో చ ఖో, భిక్ఖవే, మాతుగామో రూపబలేన చ సమన్నాగతో హోతి, భోగబలేన చ – ఏవం సో తేనఙ్గేన పరిపూరో హోతి. రూపబలేన చ, భిక్ఖవే, మాతుగామో సమన్నాగతో హోతి, భోగబలేన చ, న చ ఞాతిబలేన – ఏవం సో తేనఙ్గేన అపరిపూరో హోతి. యతో చ ఖో, భిక్ఖవే, మాతుగామో రూపబలేన చ సమన్నాగతో హోతి, భోగబలేన చ, ఞాతిబలేన చ – ఏవం సో తేనఙ్గేన పరిపూరో హోతి. రూపబలేన చ, భిక్ఖవే, మాతుగామో సమన్నాగతో హోతి, భోగబలేన చ, ఞాతిబలేన చ, న చ పుత్తబలేన – ఏవం సో తేనఙ్గేన అపరిపూరో హోతి. యతో చ ఖో, భిక్ఖవే, మాతుగామో రూపబలేన చ సమన్నాగతో హోతి, భోగబలేన చ, ఞాతిబలేన చ, పుత్తబలేన చ – ఏవం సో తేనఙ్గేన పరిపూరో హోతి. రూపబలేన చ, భిక్ఖవే, మాతుగామో సమన్నాగతో హోతి, భోగబలేన చ, ఞాతిబలేన చ, పుత్తబలేన చ, న చ సీలబలేన – ఏవం సో తేనఙ్గేన అపరిపూరో హోతి. యతో చ ఖో, భిక్ఖవే, మాతుగామో రూపబలేన చ సమన్నాగతో హోతి, భోగబలేన చ, ఞాతిబలేన చ, పుత్తబలేన చ, సీలబలేన చ – ఏవం సో తేనఙ్గేన పరిపూరో హోతి. ఇమాని ఖో, భిక్ఖవే, పఞ్చ మాతుగామస్స బలానీ’’తి. పఞ్చమం.