౧౧-౨౦. అణ్డజదానూపకారసుత్తదసకం

౩౫౨-౩౬౧. ఏకమన్తం నిసిన్నో ఖో సో భిక్ఖు భగవన్తం ఏతదవోచ – ‘‘కో ను ఖో, భన్తే, హేతు, కో పచ్చయో, యేన మిధేకచ్చో కాయస్స భేదా పరం మరణా అణ్డజానం నాగానం సహబ్యతం ఉపపజ్జతీ’’తి?

‘‘ఇధ, భిక్ఖు, ఏకచ్చో కాయేన ద్వయకారీ హోతి, వాచాయ ద్వయకారీ, మనసా ద్వయకారీ. తస్స సుతం హోతి – ‘అణ్డజా నాగా దీఘాయుకా వణ్ణవన్తో సుఖబహులా’తి. తస్స ఏవం హోతి – ‘అహో వతాహం కాయస్స భేదా పరం మరణా అణ్డజానం నాగానం సహబ్యతం ఉపపజ్జేయ్య’న్తి. సో అన్నం దేతి. సో కాయస్స భేదా పరం మరణా అణ్డజానం నాగానం సహబ్యతం ఉపపజ్జతి. అయం ఖో, భిక్ఖు, హేతు…పే… ఉపపజ్జతీతి…పే… సో పానం దేతి…పే… వత్థం దేతి…పే… యానం దేతి…పే… మాలం దేతి…పే… గన్ధం దేతి…పే… విలేపనం దేతి…పే… సేయ్యం దేతి…పే… ఆవసథం దేతి…పే… పదీపేయ్యం దేతి. సో కాయస్స భేదా పరం మరణా అణ్డజానం నాగానం సహబ్యతం ఉపపజ్జతి. అయం ఖో, భిక్ఖు, హేతు, అయం పచ్చయో, యేన మిధేకచ్చో కాయస్స భేదా పరం మరణా అణ్డజానం నాగానం సహబ్యతం ఉపపజ్జతీ’’తి. వీసతిమం.