౧౨. నిరోధధమ్మసుత్తం

౨౦౫. సావత్థినిదానం. ఏకమన్తం నిసిన్నం ఖో ఆయస్మన్తం రాధం భగవా ఏతదవోచ – ‘‘యో ఖో, రాధ, నిరోధధమ్మో; తత్ర తే ఛన్దో పహాతబ్బో, రాగో పహాతబ్బో, ఛన్దరాగో పహాతబ్బో. కో చ, రాధ, నిరోధధమ్మో? రూపం ఖో, రాధ, నిరోధధమ్మో; తత్ర తే ఛన్దో పహాతబ్బో, రాగో పహాతబ్బో, ఛన్దరాగో పహాతబ్బో. వేదనా…పే… సఞ్ఞా…పే… సఙ్ఖారా…పే… విఞ్ఞాణం నిరోధధమ్మో; తత్ర తే ఛన్దో పహాతబ్బో, రాగో పహాతబ్బో, ఛన్దరాగో పహాతబ్బో. యో ఖో, రాధ, నిరోధధమ్మో; తత్ర తే ఛన్దో పహాతబ్బో, రాగో పహాతబ్బో, ఛన్దరాగో పహాతబ్బో’’తి.

ఉపనిసిన్నవగ్గో చతుత్థో.

తస్సుద్దానం –

మారో చ మారధమ్మో చ, అనిచ్చేన అపరే దువే;

దుక్ఖేన చ దువే వుత్తా, అనత్తేన తథేవ చ;

ఖయవయసముదయం, నిరోధధమ్మేన ద్వాదసాతి.

రాధసంయుత్తం సమత్తం.