౧౨. నిరోధధమ్మసుత్తం

౧౮౧. సావత్థినిదానం. ఏకమన్తం నిసిన్నో ఖో ఆయస్మా రాధో భగవన్తం ఏతదవోచ – ‘‘‘నిరోధధమ్మో, నిరోధధమ్మో’తి, భన్తే, వుచ్చతి. కతమో ను ఖో, భన్తే, నిరోధధమ్మో’’తి? ‘‘రూపం ఖో, రాధ, నిరోధధమ్మో, వేదనా నిరోధధమ్మో, సఞ్ఞా నిరోధధమ్మో, సఙ్ఖారా నిరోధధమ్మో, విఞ్ఞాణం నిరోధధమ్మో. ఏవం పస్సం…పే… నాపరం ఇత్థత్తాయాతి పజానాతీ’’తి. ద్వాదసమం.

రాధసంయుత్తస్స దుతియో వగ్గో.

తస్సుద్దానం –

మారో చ మారధమ్మో చ, అనిచ్చేన అపరే దువే;

దుక్ఖేన చ దువే వుత్తా, అనత్తేన [అనత్తేహి (సీ. స్యా. కం.)] తథేవ చ;

ఖయవయసముదయం, నిరోధధమ్మేన ద్వాదసాతి.