౧. నతుమ్హాకంసుత్తం

౩౩. సావత్థినిదానం. ‘‘యం, భిక్ఖవే, న తుమ్హాకం, తం పజహథ. తం వో పహీనం హితాయ సుఖాయ భవిస్సతి. కిఞ్చ, భిక్ఖవే, న తుమ్హాకం? రూపం, భిక్ఖవే, న తుమ్హాకం, తం పజహథ. తం వో పహీనం హితాయ సుఖాయ భవిస్సతి. వేదనా న తుమ్హాకం, తం పజహథ. సా వో పహీనా హితాయ సుఖాయ భవిస్సతి. సఞ్ఞా న తుమ్హాకం… సఙ్ఖారా న తుమ్హాకం, తే పజహథ. తే వో పహీనా హితాయ సుఖాయ భవిస్సన్తి. విఞ్ఞాణం న తుమ్హాకం, తం పజహథ. తం వో పహీనం హితాయ సుఖాయ భవిస్సతి’’.

‘‘సేయ్యథాపి, భిక్ఖవే, యం ఇమస్మిం జేతవనే తిణకట్ఠసాఖాపలాసం తం జనో హరేయ్య వా డహేయ్య వా యథాపచ్చయం వా కరేయ్య. అపి ను తుమ్హాకం ఏవమస్స – ‘అమ్హే జనో హరతి వా డహతి వా యథాపచ్చయం వా కరోతీ’’’తి? ‘‘నో హేతం, భన్తే’’. ‘‘తం కిస్స హేతు’’? ‘‘న హి నో ఏతం, భన్తే, అత్తా వా అత్తనియం వా’’తి. ‘‘ఏవమేవ ఖో, భిక్ఖవే, రూపం న తుమ్హాకం, తం పజహథ. తం వో పహీనం హితాయ సుఖాయ భవిస్సతి. వేదనా న తుమ్హాకం, తం పజహథ. సా వో పహీనా హితాయ సుఖాయ భవిస్సతి. సఞ్ఞా న తుమ్హాకం… సఙ్ఖారా న తుమ్హాకం… విఞ్ఞాణం న తుమ్హాకం, తం పజహథ. తం వో పహీనం హితాయ సుఖాయ భవిస్సతీ’’తి. పఠమం.