౮. కోట్ఠికసుత్తం

౧౩౩. బారాణసియం విహరన్తి ఇసిపతనే మిగదాయే. అథ ఖో ఆయస్మా సారిపుత్తో సాయన్హసమయం…పే… ఏకమన్తం నిసిన్నో ఖో ఆయస్మా సారిపుత్తో ఆయస్మన్తం మహాకోట్ఠికం ఏతదవోచ – ‘‘‘అవిజ్జా, అవిజ్జా’తి, ఆవుసో కోట్ఠిక, వుచ్చతి. కతమా ను ఖో, ఆవుసో, అవిజ్జా, కిత్తావతా చ అవిజ్జాగతో హోతీ’’తి?

‘‘ఇధావుసో, అస్సుతవా పుథుజ్జనో రూపస్స అస్సాదఞ్చ ఆదీనవఞ్చ నిస్సరణఞ్చ యథాభూతం నప్పజానాతి. వేదనాయ…పే… సఞ్ఞాయ… సఙ్ఖారానం… విఞ్ఞాణస్స అస్సాదఞ్చ ఆదీనవఞ్చ నిస్సరణఞ్చ యథాభూతం నప్పజానాతి. అయం వుచ్చతావుసో, అవిజ్జా; ఏత్తావతా చ అవిజ్జాగతో హోతీ’’తి.

ఏవం వుత్తే, ఆయస్మా సారిపుత్తో ఆయస్మన్తం మహాకోట్ఠికం ఏతదవోచ – ‘‘‘విజ్జా, విజ్జా’తి, ఆవుసో కోట్ఠిక, వుచ్చతి. కతమా ను ఖో, ఆవుసో, విజ్జా, కిత్తావతా చ విజ్జాగతో హోతీ’’తి?

‘‘ఇధావుసో సుతవా అరియసావకో రూపస్స అస్సాదఞ్చ ఆదీనవఞ్చ నిస్సరణఞ్చ యథాభూతం పజానాతి. వేదనాయ…పే… సఞ్ఞాయ… సఙ్ఖారానం… విఞ్ఞాణస్స అస్సాదఞ్చ ఆదీనవఞ్చ నిస్సరణఞ్చ యథాభూతం పజానాతి. అయం వుచ్చతావుసో, విజ్జా; ఏత్తావతా చ విజ్జాగతో హోతీ’’తి. అట్ఠమం.