౩. తతియసముదయధమ్మసుత్తం

౧౨౮. ఏకం సమయం ఆయస్మా చ సారిపుత్తో ఆయస్మా చ మహాకోట్ఠికో బారాణసియం విహరన్తి ఇసిపతనే మిగదాయే…పే… ఏకమన్తం నిసిన్నో ఖో ఆయస్మా మహాకోట్ఠికో ఆయస్మన్తం సారిపుత్తం ఏతదవోచ – ‘‘‘విజ్జా, విజ్జా’తి, ఆవుసో సారిపుత్త, వుచ్చతి. కతమా ను ఖో, ఆవుసో, విజ్జా, కిత్తావతా చ విజ్జాగతో హోతీ’’తి?

‘‘ఇధావుసో, సుతవా అరియసావకో సముదయధమ్మం రూపం ‘సముదయధమ్మం రూప’న్తి యథాభూతం పజానాతి; వయధమ్మం రూపం…పే… సముదయవయధమ్మం రూపం ‘సముదయవయధమ్మం రూప’న్తి యథాభూతం పజానాతి; సముదయధమ్మం వేదనం…పే… సముదయవయధమ్మా వేదనా … సముదయధమ్మం సఞ్ఞం…పే… సముదయధమ్మే సఙ్ఖారే… వయధమ్మే సఙ్ఖారే… సముదయవయధమ్మే సఙ్ఖారే ‘సముదయవయధమ్మా సఙ్ఖారా’తి యథాభూతం పజానాతి. సముదయధమ్మం విఞ్ఞాణం… వయధమ్మం విఞ్ఞాణం… సముదయవయధమ్మం విఞ్ఞాణం ‘సముదయవయధమ్మం విఞ్ఞాణ’న్తి యథాభూతం పజానాతి. అయం వుచ్చతావుసో, విజ్జా; ఏత్తావతా చ విజ్జాగతో హోతీ’’తి. తతియం.