౬. పరిపుచ్ఛితసుత్తం

౧౧౮. సావత్థినిదానం. ‘‘తం కిం మఞ్ఞథ, భిక్ఖవే, రూపం ‘ఏతం మమ, ఏసోహమస్మి, ఏసో మే అత్తా’తి సమనుపస్సథా’’తి? ‘‘నో హేతం, భన్తే’’. ‘‘సాధు, భిక్ఖవే! రూపం, భిక్ఖవే, ‘నేతం మమ, నేసోహమస్మి, న మేసో అత్తా’తి ఏవమేతం యథాభూతం సమ్మప్పఞ్ఞాయ దట్ఠబ్బం. ‘‘వేదనం… సఞ్ఞం… సఙ్ఖారే… విఞ్ఞాణం ‘ఏతం మమ, ఏసోహమస్మి, ఏసో మే అత్తా’తి సమనుపస్సథా’’తి? ‘‘నో హేతం, భన్తే’’. ‘‘సాధు, భిక్ఖవే! విఞ్ఞాణం, భిక్ఖవే, ‘నేతం మమ, నేసోహమస్మి, న మేసో అత్తా’తి ఏవమేతం యథాభూతం సమ్మప్పఞ్ఞాయ దట్ఠబ్బం…పే… ఏవం పస్సం…పే… కతం కరణీయం, నాపరం ఇత్థత్తాయాతి పజానాతీతి. ఛట్ఠం.