౩. కులసుత్తం

౨౨౫. సావత్థియం విహరతి…పే… ‘‘సేయ్యథాపి, భిక్ఖవే, యాని కానిచి కులాని బహుత్థికాని అప్పపురిసాని తాని సుప్పధంసియాని హోన్తి చోరేహి కుమ్భత్థేనకేహి; ఏవమేవ ఖో, భిక్ఖవే, యస్స కస్సచి భిక్ఖునో మేత్తాచేతోవిముత్తి అభావితా అబహులీకతా సో సుప్పధంసియో హోతి అమనుస్సేహి. సేయ్యథాపి, భిక్ఖవే, యాని కానిచి కులాని అప్పిత్థికాని బహుపురిసాని తాని దుప్పధంసియాని హోన్తి చోరేహి కుమ్భత్థేనకేహి, ఏవమేవ ఖో, భిక్ఖవే, యస్స కస్సచి భిక్ఖునో మేత్తాచేతోవిముత్తి భావితా బహులీకతా సో దుప్పధంసియో హోతి అమనుస్సేహి. తస్మాతిహ, భిక్ఖవే, ఏవం సిక్ఖితబ్బం – ‘మేత్తా నో చేతోవిముత్తి భావితా భవిస్సతి బహులీకతా యానీకతా వత్థుకతా అనుట్ఠితా పరిచితా సుసమారద్ధా’తి. ఏవఞ్హి వో, భిక్ఖవే, సిక్ఖితబ్బ’’న్తి. తతియం.