౭. దుతియఓవాదసుత్తం

౧౫౦. రాజగహే విహరతి వేళువనే [సావత్థి, తత్ర-ఏతదవోచ (సీ.)]. అథ ఖో ఆయస్మా మహాకస్సపో యేన భగవా తేనుపసఙ్కమి…పే… ఏకమన్తం నిసిన్నం ఖో ఆయస్మన్తం మహాకస్సపం భగవా ఏతదవోచ – ‘‘ఓవద, కస్సప, భిక్ఖూ; కరోహి, కస్సప, భిక్ఖూనం ధమ్మిం కథం. అహం వా, కస్సప, భిక్ఖూ ఓవదేయ్యం త్వం వా; అహం వా భిక్ఖూనం ధమ్మిం కథం కరేయ్యం త్వం వా’’తి.

‘‘దుబ్బచా ఖో, భన్తే, ఏతరహి భిక్ఖూ, దోవచస్సకరణేహి ధమ్మేహి సమన్నాగతా అక్ఖమా అప్పదక్ఖిణగ్గాహినో అనుసాసనిం. యస్స కస్సచి, భన్తే, సద్ధా నత్థి కుసలేసు ధమ్మేసు, హిరీ [హిరి (సబ్బత్థ)] నత్థి కుసలేసు ధమ్మేసు, ఓత్తప్పం నత్థి కుసలేసు ధమ్మేసు, వీరియం నత్థి కుసలేసు ధమ్మేసు, పఞ్ఞా నత్థి కుసలేసు ధమ్మేసు, తస్స యా రత్తి వా దివసో వా ఆగచ్ఛతి [ఆగచ్ఛన్తి (సీ.)], హానియేవ పాటికఙ్ఖా కుసలేసు ధమ్మేసు, నో వుద్ధి.

‘‘సేయ్యథాపి, భన్తే, కాళపక్ఖే చన్దస్స యా రత్తి వా దివసో వా ఆగచ్ఛతి, హాయతేవ వణ్ణేన, హాయతి మణ్డలేన, హాయతి ఆభాయ, హాయతి ఆరోహపరిణాహేన. ఏవమేవ ఖో, భన్తే, యస్స కస్సచి సద్ధా నత్థి కుసలేసు ధమ్మేసు…పే… హిరీ నత్థి… ఓత్తప్పం నత్థి … వీరియం నత్థి… పఞ్ఞా నత్థి… కుసలేసు ధమ్మేసు తస్స యా రత్తి వా దివసో వా ఆగచ్ఛతి, హానియేవ పాటికఙ్ఖా కుసలేసు ధమ్మేసు, నో వుద్ధి.

‘‘‘అస్సద్ధో పురిసపుగ్గలో’తి, భన్తే, పరిహానమేతం; ‘అహిరికో పురిసపుగ్గలో’తి, భన్తే, పరిహానమేతం; ‘అనోత్తప్పీ పురిసపుగ్గలో’తి, భన్తే, పరిహానమేతం; ‘కుసీతో పురిసపుగ్గలో’తి, భన్తే, పరిహానమేతం; ‘దుప్పఞ్ఞో పురిసపుగ్గలో’తి, భన్తే, పరిహానమేతం; ‘కోధనో పురిసపుగ్గలో’తి, భన్తే, పరిహానమేతం; ‘ఉపనాహీ పురిసపుగ్గలో’తి, భన్తే, పరిహానమేతం; ‘న సన్తి భిక్ఖూ ఓవాదకా’తి, భన్తే, పరిహానమేతం.

‘‘యస్స కస్సచి, భన్తే, సద్ధా అత్థి కుసలేసు ధమ్మేసు, హిరీ అత్థి కుసలేసు ధమ్మేసు, ఓత్తప్పం అత్థి కుసలేసు ధమ్మేసు, వీరియం అత్థి కుసలేసు ధమ్మేసు, పఞ్ఞా అత్థి కుసలేసు ధమ్మేసు, తస్స యా రత్తి వా దివసో వా ఆగచ్ఛతి, వుద్ధియేవ పాటికఙ్ఖా కుసలేసు ధమ్మేసు, నో పరిహాని.

‘‘సేయ్యథాపి, భన్తే, జుణ్హపక్ఖే చన్దస్స యా రత్తి వా దివసో వా ఆగచ్ఛతి, వడ్ఢతేవ వణ్ణేన, వడ్ఢతి మణ్డలేన, వడ్ఢతి ఆభాయ, వడ్ఢతి ఆరోహపరిణాహేన. ఏవమేవ ఖో, భన్తే, యస్స కస్సచి సద్ధా అత్థి కుసలేసు ధమ్మేసు… హిరీ అత్థి…పే… ఓత్తప్పం అత్థి… వీరియం అత్థి… పఞ్ఞా అత్థి కుసలేసు ధమ్మేసు తస్స యా రత్తి వా దివసో వా ఆగచ్ఛతి, వుద్ధియేవ పాటికఙ్ఖా కుసలేసు ధమ్మేసు, నో పరిహాని.

‘‘‘సద్ధో పురిసపుగ్గలో’తి, భన్తే, అపరిహానమేతం; ‘హిరిమా పురిసపుగ్గలో’తి, భన్తే, అపరిహానమేతం; ‘ఓత్తప్పీ పురిసపుగ్గలో’తి, భన్తే, అపరిహానమేతం; ‘ఆరద్ధవీరియో పురిసపుగ్గలో’తి, భన్తే, అపరిహానమేతం; ‘పఞ్ఞవా పురిసపుగ్గలో’తి, భన్తే, అపరిహానమేతం; ‘అక్కోధనో పురిసపుగ్గలో’తి, భన్తే, అపరిహానమేతం; ‘అనుపనాహీ పురిసపుగ్గలో’తి, భన్తే, అపరిహానమేతం; ‘సన్తి భిక్ఖూ ఓవాదకా’తి, భన్తే, అపరిహానమేత’’న్తి.

‘‘సాధు సాధు, కస్సప. యస్స కస్సచి, కస్సప, సద్ధా నత్థి కుసలేసు ధమ్మేసు…పే… హిరీ నత్థి… ఓత్తప్పం నత్థి… వీరియం నత్థి… పఞ్ఞా నత్థి కుసలేసు ధమ్మేసు తస్స యా రత్తి వా దివసో వా ఆగచ్ఛతి, హానియేవ పాటికఙ్ఖా కుసలేసు ధమ్మేసు, నో వుద్ధి.

‘‘సేయ్యథాపి, కస్సప, కాళపక్ఖే చన్దస్స యా రత్తి వా దివసో వా ఆగచ్ఛతి, హాయతేవ వణ్ణేన…పే… హాయతి ఆరోహపరిణాహేన. ఏవమేవ ఖో, కస్సప, యస్స కస్సచి సద్ధా నత్థి కుసలేసు ధమ్మేసు…పే… హిరీ నత్థి… ఓత్తప్పం నత్థి… వీరియం నత్థి… పఞ్ఞా నత్థి కుసలేసు ధమ్మేసు తస్స యా రత్తి వా దివసో వా ఆగచ్ఛతి, హానియేవ పాటికఙ్ఖా కుసలేసు ధమ్మేసు, నో వుద్ధి. ‘అస్సద్ధో పురిసపుగ్గలో’తి, కస్సప, పరిహానమేతం; అహిరికో…పే… అనోత్తప్పీ… కుసీతో… దుప్పఞ్ఞో… కోధనో… ‘ఉపనాహీ పురిసపుగ్గలో’తి, కస్సప, పరిహానమేతం; ‘న సన్తి భిక్ఖూ ఓవాదకా’తి, కస్సప, పరిహానమేతం.

‘‘యస్స కస్సచి, కస్సప, సద్ధా అత్థి కుసలేసు ధమ్మేసు…పే… హిరీ అత్థి… ఓత్తప్పం అత్థి… వీరియం అత్థి… పఞ్ఞా అత్థి కుసలేసు ధమ్మేసు తస్స యా రత్తి వా దివసో వా ఆగచ్ఛతి, వుద్ధియేవ పాటికఙ్ఖా కుసలేసు ధమ్మేసు, నో పరిహాని.

‘‘సేయ్యథాపి, కస్సప, జుణ్హపక్ఖే చన్దస్స యా రత్తి వా దివసో వా ఆగచ్ఛతి, వడ్ఢతేవ వణ్ణేన, వడ్ఢతి మణ్డలేన, వడ్ఢతి ఆభాయ, వడ్ఢతి ఆరోహపరిణాహేన. ఏవమేవ ఖో, కస్సప, యస్స కస్సచి సద్ధా అత్థి కుసలేసు ధమ్మేసు హిరీ అత్థి… ఓత్తప్పం అత్థి… వీరియం అత్థి… పఞ్ఞా అత్థి కుసలేసు ధమ్మేసు తస్స యా రత్తి వా దివసో వా ఆగచ్ఛతి, వుద్ధియేవ పాటికఙ్ఖా కుసలేసు ధమ్మేసు, నో పరిహాని.

‘‘‘సద్ధో పురిసపుగ్గలో’తి, కస్సప, అపరిహానమేతం; హిరిమా…పే… ఓత్తప్పీ… ఆరద్ధవీరియో… పఞ్ఞవా… అక్కోధనో… ‘అనుపనాహీ పురిసపుగ్గలో’తి, కస్సప, అపరిహానమేతం; ‘సన్తి భిక్ఖూ ఓవాదకా’తి, కస్సప, అపరిహానమేత’’న్తి. సత్తమం.