౮. తతియఓవాదసుత్తం

౧౫౧. రాజగహే కలన్దకనివాపే [సావత్థి, ఆరామే (సీ.)]. అథ ఖో ఆయస్మా మహాకస్సపో యేన భగవా తేనుపసఙ్కమి; ఉపసఙ్కమిత్వా భగవన్తం అభివాదేత్వా ఏకమన్తం నిసీది. ఏకమన్తం నిసిన్నం ఖో ఆయస్మన్తం మహాకస్సపం భగవా ఏతదవోచ – ‘‘ఓవద, కస్సప, భిక్ఖూ; కరోహి, కస్సప, భిక్ఖూనం ధమ్మిం కథం. అహం వా, కస్సప, భిక్ఖూనం ఓవదేయ్యం త్వం వా; అహం వా భిక్ఖూనం ధమ్మిం కథం కరేయ్యం త్వం వా’’తి.

‘‘దుబ్బచా ఖో, భన్తే, ఏతరహి భిక్ఖూ, దోవచస్సకరణేహి ధమ్మేహి సమన్నాగతా, అక్ఖమా, అప్పదక్ఖిణగ్గాహినో అనుసాసనీ’’న్తి. ‘‘తథా హి పన, కస్సప, పుబ్బే థేరా భిక్ఖూ ఆరఞ్ఞికా చేవ అహేసుం ఆరఞ్ఞికత్తస్స చ వణ్ణవాదినో, పిణ్డపాతికా చేవ అహేసుం పిణ్డపాతికత్తస్స చ వణ్ణవాదినో, పంసుకూలికా చేవ అహేసుం పంసుకూలికత్తస్స చ వణ్ణవాదినో, తేచీవరికా చేవ అహేసుం తేచీవరికత్తస్స చ వణ్ణవాదినో, అప్పిచ్ఛా చేవ అహేసుం అప్పిచ్ఛతాయ చ వణ్ణవాదినో, సన్తుట్ఠా చేవ అహేసుం సన్తుట్ఠియా చ వణ్ణవాదినో, పవివిత్తా చేవ అహేసుం పవివేకస్స చ వణ్ణవాదినో, అసంసట్ఠా చేవ అహేసుం అసంసగ్గస్స చ వణ్ణవాదినో, ఆరద్ధవీరియా చేవ అహేసుం వీరియారమ్భస్స చ వణ్ణవాదినో.

‘‘తత్ర యో హోతి భిక్ఖు ఆరఞ్ఞికో చేవ ఆరఞ్ఞికత్తస్స చ వణ్ణవాదీ, పిణ్డపాతికో చేవ పిణ్డపాతికత్తస్స చ వణ్ణవాదీ, పంసుకూలికో చేవ పంసుకూలికత్తస్స చ వణ్ణవాదీ, తేచీవరికో చేవ తేచీవరికత్తస్స చ వణ్ణవాదీ, అప్పిచ్ఛో చేవ అప్పిచ్ఛతాయ చ వణ్ణవాదీ, సన్తుట్ఠో చేవ సన్తుట్ఠియా చ వణ్ణవాదీ, పవివిత్తో చేవ పవివేకస్స చ వణ్ణవాదీ, అసంసట్ఠో చేవ అసంసగ్గస్స చ వణ్ణవాదీ, ఆరద్ధవీరియో చేవ వీరియారమ్భస్స చ వణ్ణవాదీ, తం థేరా భిక్ఖూ ఆసనేన నిమన్తేన్తి – ‘ఏహి, భిక్ఖు, కో నామాయం భిక్ఖు, భద్దకో వతాయం భిక్ఖు, సిక్ఖాకామో వతాయం భిక్ఖు; ఏహి, భిక్ఖు, ఇదం ఆసనం నిసీదాహీ’’’తి.

‘‘తత్ర, కస్సప, నవానం భిక్ఖూనం ఏవం హోతి – ‘యో కిర సో హోతి భిక్ఖు ఆరఞ్ఞికో చేవ ఆరఞ్ఞికత్తస్స చ వణ్ణవాదీ, పిణ్డపాతికో చేవ…పే… పంసుకూలికో చేవ… తేచీవరికో చేవ… అప్పిచ్ఛో చేవ… సన్తుట్ఠో చేవ… పవివిత్తో చేవ… అసంసట్ఠో చేవ… ఆరద్ధవీరియో చేవ వీరియారమ్భస్స చ వణ్ణవాదీ, తం థేరా భిక్ఖూ ఆసనేన నిమన్తేన్తి – ఏహి, భిక్ఖు, కో నామాయం భిక్ఖు, భద్దకో వతాయం భిక్ఖు, సిక్ఖాకామో వతాయం భిక్ఖు; ఏహి, భిక్ఖు, ఇదం ఆసనం నిసీదాహీ’తి. తే తథత్తాయ పటిపజ్జన్తి; తేసం తం హోతి దీఘరత్తం హితాయ సుఖాయ.

‘‘ఏతరహి పన, కస్సప, థేరా భిక్ఖూ న చేవ ఆరఞ్ఞికా న చ ఆరఞ్ఞికత్తస్స వణ్ణవాదినో, న చేవ పిణ్డపాతికా న చ పిణ్డపాతికత్తస్స వణ్ణవాదినో, న చేవ పంసుకూలికా న చ పంసుకూలికత్తస్స వణ్ణవాదినో, న చేవ తేచీవరికా న చ తేచీవరికత్తస్స వణ్ణవాదినో, న చేవ అప్పిచ్ఛా న చ అప్పిచ్ఛతాయ వణ్ణవాదినో, న చేవ సన్తుట్ఠా న చ సన్తుట్ఠియా వణ్ణవాదినో, న చేవ పవివిత్తా న చ పవివేకస్స వణ్ణవాదినో, న చేవ అసంసట్ఠా న చ అసంసగ్గస్స వణ్ణవాదినో, న చేవ ఆరద్ధవీరియా న చ వీరియారమ్భస్స వణ్ణవాదినో.

‘‘తత్ర యో హోతి భిక్ఖు ఞాతో యసస్సీ లాభీ చీవర-పిణ్డపాత-సేనాసనగిలానప్పచ్చయభేసజ్జపరిక్ఖారానం తం థేరా భిక్ఖూ ఆసనేన నిమన్తేన్తి – ‘ఏహి, భిక్ఖు, కో నామాయం భిక్ఖు, భద్దకో వతాయం భిక్ఖు, సబ్రహ్మచారికామో వతాయం భిక్ఖు; ఏహి, భిక్ఖు, ఇదం ఆసనం నిసీదాహీ’’’తి.

‘‘తత్ర, కస్సప, నవానం భిక్ఖూనం ఏవం హోతి – ‘యో కిర సో హోతి భిక్ఖు ఞాతో యసస్సీ లాభీ చీవర-పిణ్డపాత-సేనాసన-గిలానప్పచ్చయభేసజ్జపరిక్ఖారానం తం థేరా భిక్ఖూ ఆసనేన నిమన్తేన్తి – ఏహి, భిక్ఖు, కో నామాయం భిక్ఖు, భద్దకో వతాయం భిక్ఖు, సబ్రహ్మచారికామో వతాయం భిక్ఖు; ఏహి, భిక్ఖు, ఇదం ఆసనం నిసీదాహీ’తి. తే తథత్తాయ పటిపజ్జన్తి. తేసం తం హోతి దీఘరత్తం అహితాయ దుక్ఖాయ. యఞ్హి తం, కస్సప, సమ్మా వదమానో వదేయ్య – ‘ఉపద్దుతా బ్రహ్మచారీ బ్రహ్మచారూపద్దవేన అభిపత్థనా [అభిభవనా (సీ.)] బ్రహ్మచారీ బ్రహ్మచారిఅభిపత్థనేనా’తి [బ్రహ్మచారిఅభిభవనేనాతి (సీ.)], ఏతరహి తం, కస్సప, సమ్మా వదమానో వదేయ్య – ‘ఉపద్దుతా బ్రహ్మచారీ బ్రహ్మచారూపద్దవేన అభిపత్థనా బ్రహ్మచారీ బ్రహ్మచారిఅభిపత్థనేనా’’’తి. అట్ఠమం.