౬. ఓవాదసుత్తం

౧౪౯. రాజగహే వేళువనే. అథ ఖో ఆయస్మా మహాకస్సపో యేన భగవా తేనుపసఙ్కమి; ఉపసఙ్కమిత్వా భగవన్తం అభివాదేత్వా ఏకమన్తం నిసీది. ఏకమన్తం నిసిన్నం ఖో ఆయస్మన్తం మహాకస్సపం భగవా ఏతదవోచ – ‘‘ఓవద, కస్సప, భిక్ఖూ; కరోహి, కస్సప, భిక్ఖూనం ధమ్మిం కథం. అహం వా, కస్సప, భిక్ఖూ ఓవదేయ్యం త్వం వా; అహం వా భిక్ఖూనం ధమ్మిం కథం కరేయ్యం త్వం వా’’తి.

‘‘దుబ్బచా ఖో, భన్తే, ఏతరహి భిక్ఖూ, దోవచస్సకరణేహి ధమ్మేహి సమన్నాగతా, అక్ఖమా, అప్పదక్ఖిణగ్గాహినో అనుసాసనిం. ఇధాహం, భన్తే, అద్దసం భణ్డఞ్చ [భణ్డుఞ్చ (సీ.)] నామ భిక్ఖుం ఆనన్దస్స సద్ధివిహారిం అభిజికఞ్చ [ఆభిఞ్జికఞ్చ (సీ. క.), ఆభిజ్జికఞ్చ (స్యా. కం.)] నామ భిక్ఖుం అనురుద్ధస్స సద్ధివిహారిం అఞ్ఞమఞ్ఞం సుతేన అచ్చావదన్తే – ‘ఏహి, భిక్ఖు, కో బహుతరం భాసిస్సతి, కో సున్దరతరం భాసిస్సతి, కో చిరతరం భాసిస్సతీ’’’తి.

అథ ఖో భగవా అఞ్ఞతరం భిక్ఖుం ఆమన్తేసి – ‘‘ఏహి త్వం, భిక్ఖు, మమ వచనేన భణ్డఞ్చ భిక్ఖుం ఆనన్దస్స సద్ధివిహారిం అభిజికఞ్చ భిక్ఖుం అనురుద్ధస్స సద్ధివిహారిం ఆమన్తేహి – ‘సత్థా ఆయస్మన్తే ఆమన్తేతీ’’’తి. ‘‘ఏవం, భన్తే’’తి ఖో సో భిక్ఖు భగవతో పటిస్సుత్వా యేన తే భిక్ఖూ తేనుపసఙ్కమి; ఉపసఙ్కమిత్వా తే భిక్ఖూ ఏతదవోచ – ‘‘సత్థా ఆయస్మన్తే ఆమన్తేతీ’’తి.

‘‘ఏవమావుసో’’తి ఖో తే భిక్ఖూ తస్స భిక్ఖునో పటిస్సుత్వా యేన భగవా తేనుపసఙ్కమింసు; ఉపసఙ్కమిత్వా భగవన్తం అభివాదేత్వా ఏకమన్తం నిసీదింసు. ఏకమన్తం నిసిన్నే ఖో తే భిక్ఖూ భగవా ఏతదవోచ – ‘‘సచ్చం కిర తుమ్హే, భిక్ఖవే, అఞ్ఞమఞ్ఞం సుతేన అచ్చావదథ – ‘ఏహి, భిక్ఖు, కో బహుతరం భాసిస్సతి, కో సున్దరతరం భాసిస్సతి, కో చిరతరం భాసిస్సతీ’’’తి? ‘‘ఏవం, భన్తే’’. ‘‘కిం ను ఖో మే తుమ్హే, భిక్ఖవే, ఏవం ధమ్మం దేసితం ఆజానాథ – ‘ఏథ తుమ్హే, భిక్ఖవే, అఞ్ఞమఞ్ఞం సుతేన అచ్చావదథ – ఏహి, భిక్ఖు, కో బహుతరం భాసిస్సతి, కో సున్దరతరం భాసిస్సతి, కో చిరతరం భాసిస్సతీ’’’తి? ‘‘నో హేతం, భన్తే’’. ‘‘నో చే కిర మే తుమ్హే, భిక్ఖవే, ఏవం ధమ్మం దేసితం ఆజానాథ, అథ కిం చరహి తుమ్హే, మోఘపురిసా, కిం జానన్తా కిం పస్సన్తా ఏవం స్వాక్ఖాతే ధమ్మవినయే పబ్బజితా సమానా అఞ్ఞమఞ్ఞం సుతేన అచ్చావదథ – ‘ఏహి, భిక్ఖు, కో బహుతరం భాసిస్సతి, కో సున్దరతరం భాసిస్సతి, కో చిరతరం భాసిస్సతీ’’’తి.

అథ ఖో తే భిక్ఖూ భగవతో పాదేసు సిరసా నిపతిత్వా భగవన్తం ఏతదవోచుం – ‘‘అచ్చయో నో, భన్తే, అచ్చగమా, యథాబాలే యథామూళ్హే యథాఅకుసలే [యథా బాలే యథా మూళ్హే యథా అకుసలే (పీ.), యథాబాలం యథామూళ్హం యథాఅకుసలం (?)], యే మయం ఏవం స్వాక్ఖాతే ధమ్మవినయే పబ్బజితా సమానా అఞ్ఞమఞ్ఞం సుతేన అచ్చావదిమ్హ – ‘ఏహి, భిక్ఖు, కో బహుతరం భాసిస్సతి, కో సున్దరతరం భాసిస్సతి, కో చిరతరం భాసిస్సతీ’తి. తేసం నో, భన్తే, భగవా అచ్చయం అచ్చయతో పటిగ్గణ్హాతు ఆయతిం సంవరాయా’’తి.

‘‘తగ్ఘ తుమ్హే, భిక్ఖవే, అచ్చయో అచ్చగమా యథాబాలే యథామూళ్హే యథాఅకుసలే, యే తుమ్హే ఏవం స్వాక్ఖాతే ధమ్మవినయే పబ్బజితా సమానా అఞ్ఞమఞ్ఞం సుతేన అచ్చావదిత్థ – ‘ఏహి, భిక్ఖు, కో బహుతరం భాసిస్సతి, కో సున్దరతరం భాసిస్సతి, కో చిరతరం భాసిస్సతీ’తి. యతో చ ఖో తుమ్హే, భిక్ఖవే, అచ్చయం అచ్చయతో దిస్వా యథాధమ్మం పటికరోథ, తం వో మయం [మయం అచ్చయం (సీ.)] పటిగ్గణ్హామ. వుద్ధి హేసా, భిక్ఖవే, అరియస్స వినయే యో అచ్చయం అచ్చయతో దిస్వా యథాధమ్మం పటికరోతి ఆయతిఞ్చ సంవరం ఆపజ్జతీ’’తి. ఛట్ఠం.