౪. కులూపకసుత్తం

౧౪౭. సావత్థియం విహరతి…పే… ‘‘తం కిం మఞ్ఞథ, భిక్ఖవే, కథంరూపో భిక్ఖు అరహతి కులూపకో హోతుం, కథంరూపో భిక్ఖు న అరహతి కులూపకో హోతు’’న్తి? భగవంమూలకా నో, భన్తే, ధమ్మా…పే… భగవా ఏతదవోచ –

‘‘యో హి కోచి, భిక్ఖవే, భిక్ఖు ఏవంచిత్తో కులాని ఉపసఙ్కమతి – ‘దేన్తుయేవ మే, మా నాదంసు; బహుకఞ్ఞేవ మే దేన్తు, మా థోకం; పణీతఞ్ఞేవ మే దేన్తు, మా లూఖం; సీఘఞ్ఞేవ మే దేన్తు, మా దన్ధం; సక్కచ్చఞ్ఞేవ మే దేన్తు, మా అసక్కచ్చ’న్తి. తస్స చే, భిక్ఖవే, భిక్ఖునో ఏవంచిత్తస్స కులాని ఉపసఙ్కమతో న దేన్తి, తేన భిక్ఖు సన్దీయతి; సో తతోనిదానం దుక్ఖం దోమనస్సం పటిసంవేదయతి. థోకం దేన్తి, నో బహుకం…పే… లూఖం దేన్తి, నో పణీతం… దన్ధం దేన్తి, నో సీఘం, తేన భిక్ఖు సన్దీయతి; సో తతోనిదానం దుక్ఖం దోమనస్సం పటిసంవేదయతి. అసక్కచ్చం దేన్తి, నో సక్కచ్చం; తేన భిక్ఖు సన్దీయతి; సో తతోనిదానం దుక్ఖం దోమనస్సం పటిసంవేదయతి. ఏవరూపో ఖో, భిక్ఖవే, భిక్ఖు న అరహతి కూలూపకో హోతుం.

‘‘యో చ ఖో, భిక్ఖవే, భిక్ఖు ఏవంచిత్తో కులాని ఉపసఙ్కమతి – ‘తం కుతేత్థ లబ్భా పరకులేసు – దేన్తుయేవ మే, మా నాదంసు; బహుకఞ్ఞేవ మే దేన్తు, మా థోకం; పణీతఞ్ఞేవ మే దేన్తు, మా లూఖం; దీఘఞ్ఞేవ మే దేన్తు, మా దన్ధం; సక్కచ్చఞ్ఞేవ మే దేన్తు, మా అసక్కచ్చ’న్తి. తస్స చే, భిక్ఖవే, భిక్ఖునో ఏవంచిత్తస్స కులాని ఉపసఙ్కమతో న దేన్తి; తేన భిక్ఖు న సన్దీయతి; సో న తతోనిదానం దుక్ఖం దోమనస్సం పటిసంవేదయతి. థోకం దేన్తి, నో బహుకం; తేన భిక్ఖు న సన్దీయతి; సో న తతోనిదానం దుక్ఖం దోమనస్సం పటిసంవేదయతి. లూఖం దేన్తి, నో పణీతం; తేన భిక్ఖు న సన్దీయతి; సో న తతోనిదానం దుక్ఖం దోమనస్సం పటిసంవేదయతి. దన్ధం దేన్తి, నో సీఘం; తేన భిక్ఖు న సన్దీయతి; సో న తతోనిదానం దుక్ఖం దోమనస్సం పటిసంవేదయతి. అసక్కచ్చం దేన్తి, నో సక్కచ్చం; తేన భిక్ఖు న సన్దీయతి; సో న తతోనిదానం దుక్ఖం దోమనస్సం పటిసంవేదయతి. ఏవరూపో ఖో, భిక్ఖవే, భిక్ఖు అరహతి కులూపకో హోతుం.

‘‘కస్సపో, భిక్ఖవే, ఏవంచిత్తో కులాని ఉపసఙ్కమతి – ‘తం కుతేత్థ లబ్భా పరకులేసు – దేన్తుయేవ మే, మా నాదంసు; బహుకఞ్ఞేవ మే దేన్తు, మా థోకం; పణీతఞ్ఞేవ మే దేన్తు, మా లూఖం; సీఘఞ్ఞేవ మే దేన్తు, మా దన్ధం; సక్కచ్చఞ్ఞేవ మే దేన్తు, మా అసక్కచ్చ’న్తి. తస్స చే, భిక్ఖవే, కస్సపస్స ఏవంచిత్తస్స కులాని ఉపసఙ్కమతో న దేన్తి; తేన కస్సపో న సన్దీయతి; సో న తతోనిదానం దుక్ఖం దోమనస్సం పటిసంవేదయతి. థోకం దేన్తి, నో బహుకం; తేన కస్సపో న సన్దీయతి; సో న తతోనిదానం దుక్ఖం దోమనస్సం పటిసంవేదయతి. లూఖం దేన్తి, నో పణీతం; తేన కస్సపో న సన్దీయతి; సో న తతోనిదానం దుక్ఖం దోమనస్సం పటిసంవేదయతి. దన్ధం దేన్తి, నో సీఘం; తేన కస్సపో న సన్దీయతి; సో న తతోనిదానం దుక్ఖం దోమనస్సం పటిసంవేదయతి. అసక్కచ్చం దేన్తి, నో సక్కచ్చం; తేన కస్సపో న సన్దీయతి; సో న తతోనిదానం దుక్ఖం దోమనస్సం పటిసంవేదయతి. కస్సపేన వా హి వో, భిక్ఖవే, ఓవదిస్సామి యో వా పనస్స కస్సపసదిసో. ఓవదితేహి చ పన వో తథత్తాయ పటిపజ్జితబ్బ’’న్తి. చతుత్థం.