౨. అనోత్తప్పీసుత్తం

౧౪౫. ఏవం మే సుతం – ఏకం సమయం ఆయస్మా చ మహాకస్సపో ఆయస్మా చ సారిపుత్తో బారాణసియం విహరన్తి ఇసిపతనే మిగదాయే. అథ ఖో ఆయస్మా సారిపుత్తో సాయన్హసమయం పటిసల్లానా వుట్ఠితో యేనాయస్మా మహాకస్సపో తేనుపసఙ్కమి; ఉపసఙ్కమిత్వా ఆయస్మతా మహాకస్సపేన సద్ధిం సమ్మోది. సమ్మోదనీయం కథం సారణీయం వీతిసారేత్వా ఏకమన్తం నిసీది. ఏకమన్తం నిసిన్నో ఖో ఆయస్మా సారిపుత్తో ఆయస్మన్తం మహాకస్సపం ఏతదవోచ – ‘‘వుచ్చతి హిదం, ఆవుసో కస్సప, అనాతాపీ అనోత్తప్పీ అభబ్బో సమ్బోధాయ అభబ్బో నిబ్బానాయ అభబ్బో అనుత్తరస్స యోగక్ఖేమస్స అధిగమాయ; ఆతాపీ చ ఖో ఓత్తప్పీ భబ్బో సమ్బోధాయ భబ్బో నిబ్బానాయ భబ్బో అనుత్తరస్స యోగక్ఖేమస్స అధిగమాయా’’తి.

‘‘కిత్తావతా ను ఖో, ఆవుసో, అనాతాపీ హోతి అనోత్తప్పీ అభబ్బో సమ్బోధాయ అభబ్బో నిబ్బానాయ అభబ్బో అనుత్తరస్స యోగక్ఖేమస్స అధిగమాయ; కిత్తావతా చ పనావుసో, ఆతాపీ హోతి ఓత్తప్పీ భబ్బో సమ్బోధాయ భబ్బో నిబ్బానాయ భబ్బో అనుత్తరస్స యోగక్ఖేమస్స అధిగమాయా’’తి? ‘‘ఇధావుసో, భిక్ఖు ‘అనుప్పన్నా మే పాపకా అకుసలా ధమ్మా ఉప్పజ్జమానా అనత్థాయ సంవత్తేయ్యు’న్తి న ఆతప్పం కరోతి, ‘ఉప్పన్నా మే పాపకా అకుసలా ధమ్మా అప్పహీయమానా అనత్థాయ సంవత్తేయ్యు’న్తి న ఆతప్పం కరోతి, ‘అనుప్పన్నా మే కుసలా ధమ్మానుప్పజ్జమానా అనత్థాయ సంవత్తేయ్యు’న్తి న ఆతప్పం కరోతి, ‘ఉప్పన్నా మే కుసలా ధమ్మా నిరుజ్ఝమానా అనత్థాయ సంవత్తేయ్యు’న్తి న ఆతప్పం కరోతి. ఏవం ఖో, ఆవుసో, అనాతాపీ హోతి’’.

‘‘కథఞ్చావుసో, అనోత్తప్పీ హోతి? ఇధావుసో, భిక్ఖు ‘అనుప్పన్నా మే పాపకా అకుసలా ధమ్మా ఉప్పజ్జమానా అనత్థాయ సంవత్తేయ్యు’న్తి న ఓత్తప్పతి, ‘ఉప్పన్నా మే పాపకా అకుసలా ధమ్మా అప్పహీయమానా అనత్థాయ సంవత్తేయ్యు’న్తి న ఓత్తప్పతి, ‘అనుప్పన్నా మే కుసలా ధమ్మానుప్పజ్జమానా అనత్థాయ సంవత్తేయ్యు’న్తి న ఓత్తప్పతి, ‘ఉప్పన్నా మే కుసలా ధమ్మా నిరుజ్ఝమానా అనత్థాయ సంవత్తేయ్యు’న్తి న ఓత్తప్పతి. ఏవం ఖో, ఆవుసో, అనోత్తప్పీ హోతి. ఏవం ఖో, ఆవుసో, అనాతాపీ అనోత్తప్పీ అభబ్బో సమ్బోధాయ అభబ్బో నిబ్బానాయ అభబ్బో అనుత్తరస్స యోగక్ఖేమస్స అధిగమాయ.

‘‘కథఞ్చావుసో, ఆతాపీ హోతి? ఇధావుసో, భిక్ఖు ‘అనుప్పన్నా మే పాపకా అకుసలా ధమ్మా ఉప్పజ్జమానా అనత్థాయ సంవత్తేయ్యు’న్తి ఆతప్పం కరోతి, ‘ఉప్పన్నా మే పాపకా అకుసలా ధమ్మా అప్పహీయమానా అనత్థాయ సంవత్తేయ్యు’న్తి ఆతప్పం కరోతి, అనుప్పన్నా మే కుసలా ధమ్మా…పే… ఆతప్పం కరోతి. ఏవం ఖో, ఆవుసో, ఆతాపీ హోతి.

‘‘కథఞ్చావుసో, ఓత్తప్పీ హోతి? ఇధావుసో, భిక్ఖు ‘అనుప్పన్నా మే పాపకా అకుసలా ధమ్మా ఉప్పజ్జమానా అనత్థాయ సంవత్తేయ్యు’న్తి ఓత్తప్పతి, ‘ఉప్పన్నా మే పాపకా అకుసలా ధమ్మా అప్పహీయమానా అనత్థాయ సంవత్తేయ్యు’న్తి ఓత్తప్పతి, ‘అనుప్పన్నా మే కుసలా ధమ్మా అనుప్పజ్జమానా అనత్థాయ సంవత్తేయ్యు’న్తి ఓత్తప్పతి, ‘ఉప్పన్నా మే కుసలా ధమ్మా నిరుజ్ఝమానా అనత్థాయ సంవత్తేయ్యు’న్తి ఓత్తప్పతి. ఏవం ఖో, ఆవుసో, ఓత్తప్పీ హోతి. ఏవం ఖో, ఆవుసో, ఆతాపీ ఓత్తప్పీ భబ్బో సమ్బోధాయ భబ్బో నిబ్బానాయ భబ్బో అనుత్తరస్స యోగక్ఖేమస్స అధిగమాయా’’తి. దుతియం.