౧౦. ఉపస్సయసుత్తం

౧౫౩. ఏవం మే సుతం – ఏకం సమయం ఆయస్మా మహాకస్సపో సావత్థియం విహరతి జేతవనే అనాథపిణ్డికస్స ఆరామే. అథ ఖో ఆయస్మా ఆనన్దో పుబ్బణ్హసమయం నివాసేత్వా పత్తచీవరమాదాయ యేనాయస్మా మహాకస్సపో తేనుపసఙ్కమి; ఉపసఙ్కమిత్వా ఆయస్మన్తం మహాకస్సపం ఏతదవోచ – ‘‘ఆయామ, భన్తే కస్సప, యేన అఞ్ఞతరో భిక్ఖునుపస్సయో తేనుపసఙ్కమిస్సామా’’తి. ‘‘గచ్ఛ త్వం, ఆవుసో ఆనన్ద, బహుకిచ్చో త్వం బహుకరణీయో’’తి. దుతియమ్పి ఖో ఆయస్మా ఆనన్దో ఆయస్మన్తం మహాకస్సపం ఏతదవోచ – ‘‘ఆయామ, భన్తే కస్సప, యేన అఞ్ఞతరో భిక్ఖునుపస్సయో తేనుపసఙ్కమిస్సామా’’తి. ‘‘గచ్ఛ త్వం, ఆవుసో ఆనన్ద, బహుకిచ్చో త్వం బహుకరణీయో’’తి. తతియమ్పి ఖో ఆయస్మా ఆనన్దో ఆయస్మన్తం మహాకస్సపం ఏతదవోచ – ‘‘ఆయామ, భన్తే కస్సప, యేన అఞ్ఞతరో భిక్ఖునుపస్సయో తేనుపసఙ్కమిస్సామా’’తి.

అథ ఖో ఆయస్మా మహాకస్సపో పుబ్బణ్హసమయం నివాసేత్వా పత్తచీవరమాదాయ ఆయస్మతా ఆనన్దేన పచ్ఛాసమణేన యేన అఞ్ఞతరో భిక్ఖునుపస్సయో తేనుపసఙ్కమి; ఉపసఙ్కమిత్వా పఞ్ఞత్తే ఆసనే నిసీది. అథ ఖో సమ్బహులా భిక్ఖునియో యేనాయస్మా మహాకస్సపో తేనుపసఙ్కమింసు; ఉపసఙ్కమిత్వా ఆయస్మన్తం మహాకస్సపం అభివాదేత్వా ఏకమన్తం నిసీదింసు. ఏకమన్తం నిసిన్నా ఖో తా భిక్ఖునియో ఆయస్మా మహాకస్సపో ధమ్మియా కథాయ సన్దస్సేసి సమాదపేసి సముత్తేజేసి సమ్పహంసేసి. అథ ఖో ఆయస్మా మహాకస్సపో తా భిక్ఖునియో ధమ్మియా కథాయ సన్దస్సేత్వా సమాదపేత్వా సముత్తేజేత్వా సమ్పహంసేత్వా ఉట్ఠాయాసనా పక్కామి.

అథ ఖో థుల్లతిస్సా భిక్ఖునీ అనత్తమనా అనత్తమనవాచం నిచ్ఛారేసి – ‘‘కిం పన అయ్యో మహాకస్సపో, అయ్యస్స ఆనన్దస్స వేదేహమునినో సమ్ముఖా ధమ్మం భాసితబ్బం మఞ్ఞతి? సేయ్యథాపి నామ సూచివాణిజకో సూచికారస్స సన్తికే సూచిం విక్కేతబ్బం మఞ్ఞేయ్య; ఏవమేవ అయ్యో మహాకస్సపో అయ్యస్స ఆనన్దస్స వేదేహమునినో సమ్ముఖా ధమ్మం భాసితబ్బం మఞ్ఞతీ’’తి.

అస్సోసి ఖో ఆయస్మా మహాకస్సపో థుల్లతిస్సాయ భిక్ఖునియా ఇమం వాచం భాసమానాయ. అథ ఖో ఆయస్మా మహాకస్సపో ఆయస్మన్తం ఆనన్దం ఏతదవోచ – ‘‘కిం ను ఖో, ఆవుసో ఆనన్ద, అహం సూచివాణిజకో, త్వం సూచికారో; ఉదాహు అహం సూచికారో, త్వం సూచివాణిజకో’’తి? ‘‘ఖమ, భన్తే కస్సప, బాలో మాతుగామో’’తి. ‘‘ఆగమేహి త్వం, ఆవుసో ఆనన్ద, మా తే సఙ్ఘో ఉత్తరి ఉపపరిక్ఖి’’.

‘‘తం కిం మఞ్ఞసి, ఆవుసో ఆనన్ద, అపి ను త్వం భగవతో సమ్ముఖా భిక్ఖుసఙ్ఘే ఉపనీతో – ‘అహం, భిక్ఖవే, యావదేవ ఆకఙ్ఖామి వివిచ్చేవ కామేహి వివిచ్చ అకుసలేహి ధమ్మేహి సవితక్కం సవిచారం వివేకజం పీతిసుఖం పఠమం ఝానం ఉపసమ్పజ్జ విహరామి. ఆనన్దోపి, భిక్ఖవే, యావదేవ ఆకఙ్ఖతి వివిచ్చేవ కామేహి వివిచ్చ అకుసలేహి ధమ్మేహి సవితక్కం సవిచారం వివేకజం పీతిసుఖం పఠమం ఝానం ఉపసమ్పజ్జ విహరతీ’’’తి? ‘‘నో హేతం, భన్తే’’.

‘‘అహం ఖో, ఆవుసో, భగవతో సమ్ముఖా భిక్ఖుసఙ్ఘే ఉపనీతో – ‘అహం, భిక్ఖవే, యావదేవ ఆకఙ్ఖామి వివిచ్చేవ కామేహి వివిచ్చ అకుసలేహి ధమ్మేహి సవితక్కం సవిచారం వివేకజం పీతిసుఖం పఠమం ఝానం ఉపసమ్పజ్జ విహరామి. కస్సపోపి, భిక్ఖవే, యావదేవ ఆకఙ్ఖతి వివిచ్చేవ కామేహి వివిచ్చ అకుసలేహి ధమ్మేహి…పే… పఠమం ఝానం ఉపసమ్పజ్జ విహరతీ’తి…పే…. (నవన్నం అనుపుబ్బవిహారసమాపత్తీనం పఞ్చన్నఞ్చ అభిఞ్ఞానం ఏవం విత్థారో వేదితబ్బో.)

‘‘తం కిం మఞ్ఞసి, ఆవుసో ఆనన్ద, అపి ను త్వం భగవతో సమ్ముఖా భిక్ఖుసఙ్ఘే ఉపనీతో – ‘అహం, భిక్ఖవే, ఆసవానం ఖయా అనాసవం చేతోవిముత్తిం పఞ్ఞావిముత్తిం దిట్ఠేవ ధమ్మే సయం అభిఞ్ఞా సచ్ఛికత్వా ఉపసమ్పజ్జ విహరామి. ఆనన్దోపి, భిక్ఖవే, ఆసవానం ఖయా అనాసవం చేతోవిముత్తిం పఞ్ఞావిముత్తిం దిట్ఠేవ ధమ్మే సయం అభిఞ్ఞా సచ్ఛికత్వా ఉపసమ్పజ్జ విహరతీ’’’తి? ‘‘నో హేతం, భన్తే’’.

‘‘అహం ఖో, ఆవుసో, భగవతో సమ్ముఖా భిక్ఖుసఙ్ఘే ఉపనీతో – ‘అహం, భిక్ఖవే, ఆసవానం ఖయా అనాసవం చేతోవిముత్తిం పఞ్ఞావిముత్తిం దిట్ఠేవ ధమ్మే సయం అభిఞ్ఞా సచ్ఛికత్వా ఉపసమ్పజ్జ విహరామి. కస్సపోపి, భిక్ఖవే, ఆసవానం ఖయా అనాసవం చేతోవిముత్తిం పఞ్ఞావిముత్తిం దిట్ఠేవ ధమ్మే సయం అభిఞ్ఞా సచ్ఛికత్వా ఉపసమ్పజ్జ విహరతీ’’’తి.

‘‘సత్తరతనం వా, ఆవుసో, నాగం అడ్ఢట్ఠమరతనం వా తాలపత్తికాయ ఛాదేతబ్బం మఞ్ఞేయ్య, యో మే ఛ అభిఞ్ఞా ఛాదేతబ్బం మఞ్ఞేయ్యా’’తి.

చవిత్థ చ పన థుల్లతిస్సా భిక్ఖునీ బ్రహ్మచరియమ్హాతి. దసమం.