౧. సన్తుట్ఠసుత్తం

౧౪౪. సావత్థియం విహరతి…పే… ‘‘సన్తుట్ఠాయం [సన్తుట్ఠోయం (సీ.)], భిక్ఖవే, కస్సపో ఇతరీతరేన చీవరేన, ఇతరీతరచీవరసన్తుట్ఠియా చ వణ్ణవాదీ; న చ చీవరహేతు అనేసనం అప్పతిరూపం ఆపజ్జతి; అలద్ధా చ చీవరం న పరితస్సతి; లద్ధా చ చీవరం అగధితో [అగథితో (సీ.)] అముచ్ఛితో అనజ్ఝాపన్నో ఆదీనవదస్సావీ నిస్సరణపఞ్ఞో పరిభుఞ్జతి’’.

‘‘సన్తుట్ఠాయం, భిక్ఖవే, కస్సపో ఇతరీతరేన పిణ్డపాతేన, ఇతరీతరపిణ్డపాతసన్తుట్ఠియా చ వణ్ణవాదీ; న చ పిణ్డపాతహేతు అనేసనం అప్పతిరూపం ఆపజ్జతి; అలద్ధా చ పిణ్డపాతం న పరితస్సతి; లద్ధా చ పిణ్డపాతం అగధితో అముచ్ఛితో అనజ్ఝాపన్నో ఆదీనవదస్సావీ నిస్సరణపఞ్ఞో పరిభుఞ్జతి.

‘‘సన్తుట్ఠాయం, భిక్ఖవే, కస్సపో ఇతరీతరేన సేనాసనేన, ఇతరీతరసేనాసనసన్తుట్ఠియా చ వణ్ణవాదీ; న చ సేనాసనహేతు అనేసనం అప్పతిరూపం ఆపజ్జతి; అలద్ధా చ సేనాసనం న పరితస్సతి; లద్ధా చ సేనాసనం అగధితో అముచ్ఛితో అనజ్ఝాపన్నో ఆదీనవదస్సావీ నిస్సరణపఞ్ఞో పరిభుఞ్జతి.

‘‘సన్తుట్ఠాయం, భిక్ఖవే, కస్సపో ఇతరీతరేన గిలానప్పచ్చయభేసజ్జపరిక్ఖారేన, ఇతరీతరగిలానప్పచ్చయభేసజ్జపరిక్ఖారసన్తుట్ఠియా చ వణ్ణవాదీ; న చ గిలానప్పచ్చయభేసజ్జపరిక్ఖారహేతు అనేసనం అప్పతిరూపం ఆపజ్జతి; అలద్ధా చ గిలానప్పచ్చయభేసజ్జపరిక్ఖారం న పరితస్సతి; లద్ధా చ గిలానప్పచ్చయభేసజ్జపరిక్ఖారం అగధితో అముచ్ఛితో అనజ్ఝాపన్నో ఆదీనవదస్సావీ నిస్సరణపఞ్ఞో పరిభుఞ్జతి.

‘‘తస్మాతిహ, భిక్ఖవే, ఏవం సిక్ఖితబ్బం – ‘సన్తుట్ఠా భవిస్సామ ఇతరీతరేన చీవరేన, ఇతరీతరచీవరసన్తుట్ఠియా చ వణ్ణవాదినో; న చ చీవరహేతు అనేసనం అప్పతిరూపం ఆపజ్జిస్సామ; అలద్ధా చ చీవరం న చ పరితస్సిస్సామ; లద్ధా చ చీవరం అగధితా అముచ్ఛితా అనజ్ఝాపన్నా ఆదీనవదస్సావినో నిస్సరణపఞ్ఞా పరిభుఞ్జిస్సామ’’’. (ఏవం సబ్బం కాతబ్బం).

‘‘‘సన్తుట్ఠా భవిస్సామ ఇతరీతరేన పిణ్డపాతేన…పే… సన్తుట్ఠా భవిస్సామ ఇతరీతరేన సేనాసనేన…పే… సన్తుట్ఠా భవిస్సామ ఇతరీతరేన గిలానప్పచ్చయభేసజ్జపరిక్ఖారేన, ఇతరీతరగిలానప్పచ్చయభేసజ్జపరిక్ఖారసన్తుట్ఠియా చ వణ్ణవాదినో; న చ గిలానప్పచ్చయభేసజ్జపరిక్ఖారహేతు అనేసనం అప్పతిరూపం ఆపజ్జిస్సామ అలద్ధా చ గిలానప్పచ్చయభేసజ్జపరిక్ఖారం న పరితస్సిస్సామ; లద్ధా చ గిలానప్పచ్చయభేసజ్జపరిక్ఖారం అగధితా అముచ్ఛితా అనజ్ఝాపన్నా ఆదీనవదస్సావినో నిస్సరణపఞ్ఞా పరిభుఞ్జిస్సామా’తి. ఏవఞ్హి వో, భిక్ఖవే, సిక్ఖితబ్బం. కస్సపేన వా హి వో, భిక్ఖవే, ఓవదిస్సామి యో వా పనస్స [యో వా పన (సీ.), యో వా (పీ.)] కస్సపసదిసో, ఓవదితేహి చ పన వో తథత్తాయ పటిపజ్జితబ్బ’’న్తి. పఠమం.